ഇന്ത്യൻ മത്സ്യത്തൊഴിലാളികളുടെ അറസ്റ്റ്; ഡൽഹി-ബംഗ്ലാദേശ് ബന്ധത്തിൽ വിള്ളൽ വീഴ്ത്തുന്നു
ന്യൂഡൽഹി: ബംഗ്ലാദേശ് സമുദ്രാതിർത്തി ലംഘിച്ച് മത്സ്യബന്ധനം നടത്തിയെന്നാരോപിച്ച് 34 ഇന്ത്യൻ മത്സ്യത്തൊഴിലാളികളെ ബംഗ്ലാദേശ് അറസ്റ്റ് ചെയ്തത് ഇന്ത്യ-ബംഗ്ലാദേശ് ബന്ധത്തിൽ പുതിയ തർക്കങ്ങൾക്ക് വഴിയൊരുക്കിയിരിക്കുകയാണ്. ഈ മാസം 14, 15 തീയതികളിലായിട്ടാണ് ഇവരെ പിടികൂടിയത്. ഇവരുടെ രണ്ട് മത്സ്യബന്ധന യാനങ്ങളും ബംഗ്ലാദേശ് പിടിച്ചെടുത്തിട്ടുണ്ട്.
പിടിയിലായവരെ ഉടൻ വിട്ടയക്കണമെന്ന് ഇന്ത്യ ബംഗ്ലാദേശിനോട് ആവശ്യപ്പെട്ടിട്ടുണ്ട്. സംഭവത്തെക്കുറിച്ചുള്ള വിവരം ലഭിച്ചയുടൻ, ബംഗ്ലാദേശിലെ ഇന്ത്യൻ ഹൈക്കമ്മീഷൻ നയതന്ത്ര മാർഗങ്ങളിലൂടെ മത്സ്യത്തൊഴിലാളികളെ മോചിപ്പിക്കുന്നതിനുള്ള നടപടികൾ ആരംഭിച്ചു.
സമുദ്രാതിർത്തി ലംഘനം പതിവാകുന്നതും തുടർന്നുണ്ടാകുന്ന അറസ്റ്റുകളും ഇരുരാജ്യങ്ങളും തമ്മിലുള്ള ബന്ധത്തിൽ ഇടയ്ക്കിടെ കല്ലുകടിയാകാറുണ്ട്. ഈ സംഭവം നിലവിൽ മികച്ച ബന്ധം പുലർത്തുന്ന ഡൽഹി-ധാക്ക ബന്ധത്തിൽ ചെറിയ രീതിയിലുള്ള അസ്വസ്ഥതകൾ സൃഷ്ടിക്കുമെന്നാണ് വിലയിരുത്തപ്പെടുന്നത്. മത്സ്യത്തൊഴിലാളികളുടെ മോചനം എത്രയും പെട്ടെന്ന് സാധ്യമാക്കാനുള്ള ശ്രമങ്ങൾ തുടരുകയാണ്.
