ദുബൈ കോണ്‍സുല്‍ ജനറലിന് വികാര നിര്‍ഭര യാത്രയയപ്പ്
ദുബൈ: മൂന്ന് വര്‍ഷം നീണ്ട സ്തുത്യര്‍ഹമായ സേവനത്തിന് ശേഷം ഇന്ത്യയിലേക്ക് തിരിച്ചുപോകുന്ന ദുബൈ കോണ്‍സുല്‍ ജനറല്‍ വിപുലിന് വികാര നിര്‍ഭര യാത്രയയപ്പ് നല്‍കി. 2017 മെയ് മാസത്തിലാണ് വിപുല്‍ ദുബൈ കോണ്‍സുല്‍ ജനറലായി ചുമതലയേറ്റത്. ജീവനക്കാര്‍ അദ്ദേഹത്തിന് യാത്രയയപ്പ് നല്‍കുന്ന ചിത്രങ്ങള്‍ കോണ്‍സുലേറ്റ് ജനറല്‍ ട്വിറ്ററില്‍ പങ്കുവെച്ചു.
വിപുല്‍ സാറിനും ഭാര്യ കീര്‍ത്തി മാമിനും യാത്രാ മംഗളങ്ങള്‍, നിങ്ങളുടെ അസാന്നിധ്യം എപ്പോഴും ഓര്‍മിക്കും തുടങ്ങിയ അടിക്കുറിപ്പുകളോടെയാണ് ചിത്രങ്ങള്‍ പങ്കുവെച്ചത്. കൃത്യനിര്‍വ്വഹണത്തിന്റെ എല്ലാ മണ്ഡലങ്ങളിലും പുഞ്ചിരിയോടെയും പരിചരണ മനോഭാവത്തോടെയുമാണ് അദ്ദേഹം ഇടപഴകിയതെന്നും എപ്പോഴും സമീപിക്കാവുന്ന വ്യക്തിത്വമായിരുന്നെന്നും സന്ദേശത്തില്‍ പറയുന്നു.
കോണ്‍സുല്‍ ജനറല്‍ എത്രമാത്രം ജനകീയനായിരുന്നുവെന്ന് സൂചിപ്പിക്കുന്നതാണ് ഈ പോസ്റ്റിന് താഴെ വന്ന കമന്റുകള്‍. കൊവിഡ് നിയന്ത്രണങ്ങള്‍ കാരണം ദുബൈയിലെ ഇന്ത്യക്കാര്‍ പ്രയാസം അനുഭവിച്ചപ്പോള്‍ കൂടെ നിന്ന് സാന്ത്വനവും നയതന്ത്ര ഇടപെടലുകളും നടത്തിയിരുന്നു അദ്ദേഹം. നിലവിലെ യു കെയിലെ ബര്‍മിംഗ്ഹാമിലെ ഇന്ത്യന്‍ കോണ്‍സുലേറ്റിലുള്ള അമന്‍ പുരിയാണ് പുതിയ കോണ്‍സുല്‍ ജനറല്‍. ഈ മാസം പകുതിയോടെ അദ്ദേഹം ചുമതലയേല്‍ക്കും.
