കെ മുരളീധരന് സ്ത്രീധനം കിട്ടിയതല്ല കേരളം, കിങ്ങിണിക്കുട്ടന്റെ ഭീഷണി ഗൗനിക്കുന്നില്ലെന്നും കെ സുരേന്ദ്രൻ

ഗവർണർ ആരിഫ് മുഹമ്മദ് ഖാനെ വിമർശിച്ച കെ മുരളീധരൻ എംപിക്കെതിരെ ബിജെപി നേതാവ് കെ സുരേന്ദ്രൻ. കെ മുരളീധരന് സ്ത്രീധനം കിട്ടിയതല്ല കേരളമെന്ന് സുരേന്ദ്രൻ ഫേസ്ബുക്ക് കുറിപ്പിൽ വിമർശിച്ചു

മുരളീധരന്റെ പിതാവ് കെ കരുണാകരനെ ഗൗനിച്ചിട്ടില്ല ഞങ്ങൾ, പിന്നെയല്ലെ ഈ കിങ്ങിണിക്കുട്ടന്റെ ഭീഷണിയെന്നായിരുന്നു സുരേന്ദ്രന്റെ ഫേസ്ബുക്ക് കുറിപ്പ്. പൗരത്വ നിയമ ഭേദഗതി വിഷയത്തെ അനുകൂലിച്ച ഗവർണർ ആരിഫ് മുഹമ്മദ് ഖാനെതിരെ കെ മുരളീധരൻ രൂക്ഷ വിമർശനം ഉന്നയിച്ചിരുന്നു.

രാജിവെച്ച് പോകാൻ തയ്യാറായില്ലെങ്കിൽ ഗവർണർക്ക് തെരുവിലിറങ്ങി നടക്കാൻ കഴിയില്ലെന്നായിരുന്നു മുരളീധരൻ വിമർശനം. മോദിയുടെയും അമിത് ഷായുടെയും ഏജന്റായ ആരിഫ് മുഹമ്മദ് ഖാനെ ഗവർണറെന്ന് വിളിക്കുന്നില്ല. ഗവർണർ പരിധിവിട്ടാൽ നിയന്ത്രിക്കാൻ ഭരണഘടനാപ്രകാരം കൂടുതൽ അധികാരമുള്ള മുഖ്യമന്ത്രി തയ്യാറാകണമെന്നും കെ മുരളീധരൻ ആവശ്യപ്പെട്ടിരുന്നു