ആശ്വസിപ്പിക്കാനെത്തിയവരുടെ കൂട്ടത്തിൽ ഗസ്റ്റ് റോളിൽ പോലും മുല്ലപ്പള്ളി ഉണ്ടായിരുന്നില്ല; ടീച്ചറുടേത് വെറും വാക്കായിരുന്നില്ലെന്നും ലിനിയുടെ ഭർത്താവ്

ആരോഗ്യമന്ത്രി കെ കെ ശൈലജക്കെതിരായ മുല്ലപ്പള്ളി രാമചന്ദ്രന്റെ അധിക്ഷേപ പരാമർശത്തിൽ വ്യാപക പ്രതിഷേധം ഉയരുന്നതിനിടെ ശ്രദ്ധേയമായ കുറിപ്പുമായി നഴ്‌സ് ലിനിയുടെ ഭർത്താവ് സജീഷ്. നിപ പ്രതിരോധ പ്രവർത്തനങ്ങൾക്കിടെ ലിനി രക്തസാക്ഷിത്വം വരിച്ച സമയത്ത് രാഷ്ട്രീയഭേദമന്യേ ആശ്വസിപ്പിക്കാനായി ഒരുപാട് പേർ എത്തിയിരുന്നു. എന്നാൽ അന്നത്തെ വടകര എംപിയായിരുന്ന മുല്ലപ്പള്ളി രാമചന്ദ്രൻ ഗസ്റ്റ് ഒരു ഗസ്റ്റ് റോളിൽ പോലുമുണ്ടായിരുന്നില്ലെന്ന് സജീഷ് പറയുന്നു

കുറിപ്പിന്റെ പൂർണരൂപം

നിപയുടെ കാലത്ത്‌ ലിനിയുമായി ബന്ധപ്പെട്ട ഓർമ്മയിൽ നിന്നും ചിലത്‌ ചികഞ്ഞെടുത്തപ്പോൾ പക്ഷെ, ഇപ്പോൾ വിവാദങ്ങൾക്ക്‌ കാരണമായ ചിലരുടെ മുഖങ്ങൾ അതിന്റെ പരിസരത്ത്‌ പോലും ഉണ്ടായിരുന്നില്ല. എന്നാൽ കരുതലുമായി ഒപ്പമുണ്ടായിരുന്ന, ഏറ്റവും തണലായി അനുഭവപ്പെട്ടിരുന്ന ചിലരുടെ പേര്‌ വിപരീതമായി പരാമർശിക്കപ്പെട്ടപ്പോൾ വളരെ പ്രയാസം തോന്നുകയും ചെയ്‌തു. കക്ഷി രാഷ്ട്രീയത്തിന്‌ അതീതമായി ഭരണ പ്രതിപക്ഷ ഭേദങ്ങൾ മറന്ന് ആശ്വസിപ്പിക്കാൻ എത്തിവരുടെ കൂട്ടത്തിൽ ഒന്നും ഞാൻ ജീവിക്കുന്ന, അന്ന് വടകര പാർലിമെന്റ്‌ മണ്ഡലത്തെ പ്രതിനിധീകരിക്കുന്ന ശ്രീ: മുല്ലപ്പളളി രാമചന്ദ്രൻ സർ ഉണ്ടായിരുന്നില്ല. ഒരു ഗസ്റ്റ്‌ റോളിൽ പോലും! നേരിട്ടോ ടെലിഫോൺ വഴിയോ ഒരു ആശ്വാസവാക്ക്‌ അദ്ദേഹത്തിന്റെ ഭാഗത്ത്‌ നിന്ന് ഒരു എം പി എന്ന നിലയിൽ ഉണ്ടായിട്ടില്ല.