സ്വര്‍ണക്കടത്ത് കേസില്‍ എന്‍ ഐ എ എഫ്.ഐ.ആര്‍ സമര്‍പ്പിച്ചു; സരിത്തും സ്വപ്‌നയും ഒന്നും രണ്ടും പ്രതികള്‍; മൂന്നാം പ്രതി ഫൈസല്‍ ഫരീദ്
സ്വര്‍ണക്കടത്ത് കേസില്‍ എഫ്.ഐ.ആര്‍ സമര്‍പ്പിച്ചു. കലൂരിലെ എന്‍ ഐ എ കോടതിയിലാണ് എഫ് ഐ ആര്‍ സമര്‍പ്പിച്ചിരിക്കുന്നത്. സരിത് കുമാര്‍ ഒന്നാം പ്രതിയും സ്വപ്‌ന സുരേഷ് രണ്ടാം പ്രതിയുമാണ്. വിദേശത്തുള്ള ഫൈസല്‍ ഫരീദാണ് കേസിലെ മൂന്നാംപ്രതി. സ്വപ്‌നയുടെ ബിനാമി സന്ദീപ് നായര്‍ നാലാം പ്രതിയാണെന്നും എന്‍ ഐ എ സമര്‍പ്പിച്ച എഫ് ഐ ആറില്‍ വ്യക്തമാക്കുന്നു
ഫൈസല്‍ ഫരീദ് കസ്റ്റംസ് കേസില്‍ പ്രതിയായിരുന്നില്ല. ഇയാളുടെ പങ്ക് എന്താണെന്നും കസ്റ്റംസ് പറഞ്ഞിരുന്നില്ല. എന്നാല്‍ ഇയാള്‍ക്ക് വേണ്ടിയാണ് സ്വര്‍ണം കടത്തിയതെന്ന് സരിത് മൊഴി നല്‍കിയതായി എന്‍ ഐ എ പറയുന്നു. കോണ്‍സുലേറ്റ് വിലാസത്തില്‍ കാര്‍ഗോ അയച്ചതും ഇയാളാണെന്ന് സരിത് മൊഴി നല്‍കിയിട്ടുണ്ട്
യുഎപിഎ 16, 17, 18 വകുപ്പുകള്‍ ചുമത്തിയാണ് ഇവരെ പ്രതി ചേര്‍ത്തിരിക്കുന്നത്. ഭീകരപ്രവര്‍ത്തനത്തിനായി ആളുകളെ ചേര്‍ക്കുക, ഇതിനായി ഫണ്ട് ചെലവഴിക്കുക തുടങ്ങിയ ഗുരുതര കുറ്റങ്ങള്‍ക്ക് ചുമത്തുന്ന വകുപ്പാണിത്.
