മുൻ മന്ത്രിയും മുതിർന്ന കോൺഗ്രസ് നേതാവുമായ കെ കെ രാമചന്ദ്രൻ മാസ്റ്റർ അന്തരിച്ചു

മുൻ മന്ത്രിയും മുതിർന്ന കോൺഗ്രസ് നേതാവുമായ കെ കെ രാമചന്ദ്രൻ മാസ്റ്റർ അന്തരിച്ചു. 78 വയസ്സായിരുന്നു. പുലർച്ചെ മൂന്നരയോടെയാണ് മരണം സംഭവിച്ചത്. ഹൃദയാഘാതമാണ് മരണകാരണം

എ കെ ആന്റണി മന്ത്രിസഭയിൽ 1995 മുതൽ ഭക്ഷ്യ, പൊതുവിതരണ വകുപ്പ് മന്ത്രിയായിരുന്നു. 2004ൽ ഉമ്മൻ ചാണ്ടി മന്ത്രിസഭയിൽ ആരോഗ്യവകുപ്പ് മന്ത്രിയായി. 2006 ജനുവരിയിൽ രാജിവെച്ചു. മൂന്ന് തവണ ബത്തേരിയിൽ നിന്നും മൂന്ന് തവണ കൽപ്പറ്റയിൽ നിന്നും എംഎൽഎ ആയി.

വയനാട്ടിൽ നിന്നുള്ള നേതാവായ അദ്ദേഹം കോഴിക്കോട് കക്കോടിയിലാണ് അടുത്ത കാലത്തായി താമസിക്കുന്നത്. കോൺഗ്രസ് നേതാക്കൾക്കെതിരെ 2011ൽ ടൈറ്റാനിയം അടക്കമുള്ള അഴിമതി കേസുകളിൽ ആരോപണം ഉയർത്തിയതോടെ പാർട്ടിയിൽ നിന്ന് പുറത്തായി. പിന്നീട് തിരിച്ചെടുത്തുവെങ്കിലും കാര്യമായ ചുമതലകൾ നൽകിയിരുന്നില്ല.