പിജെ ജോസഫിന്റെ അപ്പീൽ തള്ളി: രണ്ടില ചിഹ്നം ജോസ് കെ മാണിക്ക് അനുവദിച്ച് ഡിവിഷൻ ബഞ്ച് ഉത്തരവ്

രണ്ടില ചിഹ്നം ജോസ് കെ മാണി വിഭാഗത്തിന് തന്നെ അനുവദിച്ച് ഹൈക്കോടതി ഡിവിഷൻ ബഞ്ചിന്റെ ഉത്തരവ്. നേരത്തെ സിംഗിൾ ബഞ്ചും കേന്ദ്ര തെരഞ്ഞെടുപ്പ് കമ്മീഷന്റെ തീരുമാനത്തെ ശരിവെച്ചിരുന്നു. ഇതിനെതിരെ പി ജെ ജോസഫ് ഡിവിഷൻ ബഞ്ചിനെ സമീപിക്കുകയായിരുന്നു

തെരഞ്ഞെടുപ്പ് കമ്മീഷന്റെ തീരുമാനത്തിൽ ഇടപെടാൻ സാധിക്കില്ലെന്ന് കോടതി വ്യക്തമാക്കി. കേരളാ കോൺഗ്രസ് എം എന്ന പാർട്ടിയും രണ്ടില ചിഹ്നവും ജോസ് കെ മാണിക്ക് അവകാശപ്പെട്ടതാണ് എന്ന തെരഞ്ഞെടുപ്പ് കമ്മീഷന്റെ തീരുമാനം കോടതി അംഗീകരിച്ചു

കോടതി വിധി പാർട്ടി വലിയ കരുത്ത് നൽകുന്നതാണെന്ന് ജോസ് കെ മാണി പ്രതികരിച്ചു. നേരത്തെ തദ്ദേശ തെരഞ്ഞെടുപ്പ് സമയത്തായിരുന്നു സിംഗിൾ ബഞ്ച് വിധി ജോസ് കെ മാണിക്ക് അനുകൂലമായി വന്നത്. നിയമസഭാ തെരഞ്ഞെടുപ്പ് അടുത്തിരിക്കെ ഡിവിഷൻ ബഞ്ച് ഉത്തരവും ജോസ് കെ മാണിക്ക് അനുകൂലമായി വരികയാണ്.