ആലുവയിലെ പെൺകുട്ടിയുടെ മരണം: ദുഃഖകരമായ സംഭവം, രാഷ്ട്രീയവത്കരിക്കരുതെന്ന് ഇ പി ജയരാജൻ

ആലുവയിൽ പെൺകുട്ടിയെ തട്ടിക്കൊണ്ടുപോയി പീഡിപ്പിച്ച് കൊലപ്പെടുത്തിയത് ദുഃഖകരമായ സംഭവമെന്ന് എൽഡിഎഫ് കൺവീനർ ഇപി ജയരാജൻ. പെൺകുട്ടിയുടെ കുടുംബത്തെ സന്ദർശിച്ച ശേഷം മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. എന്തിനും പോലീസിനെ കുറ്റം പറയുന്നത് തെറ്റായ പ്രവണതയാണ്. അത് പോലീസിന്റെ മനോവീര്യം തകർക്കാനേ ഉപകരിക്കൂ എന്നും അദ്ദേഹം പറഞ്ഞു

കുട്ടിയെ കാണാതായെന്ന് പോലീസിന് പരാതി ലഭിച്ചത് വൈകുന്നേരം ഏഴര മണിക്കാണ്. രാത്രി 9 മണിക്ക് തന്നെ പ്രതിയെ പോലീസ് കസ്റ്റഡിയിലെടുത്തു. ചോദ്യം ചെയ്യലിൽ പോലീസിന് തെറ്റായ വിവരമാണ് പ്രതി നൽകിയത്. പിന്നീടാണ് മൃതദേഹം കണ്ടെത്തിയത്. ദുഃഖകരമായ സംഭവമാണ് നടന്നതെന്നും ഇതിനകത്ത് ആരും രാഷ്ട്രീയം കാണരുതെന്നും ഇപി പറഞ്ഞു.