പുരാവസ്തു തട്ടിപ്പ് കേസ്: കെ സുധാകരനെ ഇഡി വീണ്ടും ചോദ്യം ചെയ്യും

പുരാവസ്തു തട്ടിപ്പ് കേസിൽ കെപിസിസി പ്രസിഡന്റ് കെ സുധാകരനെ ഇ ഡി തിങ്കളാഴ്ച വീണ്ടും ചോദ്യം ചെയ്യും. രാവിലെ 11 മണിക്ക് ഹാജരാകാനാണ് നിർദേശം നൽകിയിരിക്കുന്നത്. അഞ്ച് വർഷത്തെ ബാങ്ക് ഇടപാട് വിവരങ്ങൾ ഉൾപ്പെടെ ഹാജരാക്കാൻ ഇഡി സുധാകരനോട് ആവശ്യപ്പെട്ടിരുന്നു. 

ഓഗസ്റ്റ് 22ന് കേസിൽ സുധാകരനെ ഇഡി വിശദമായി ചോദ്യം ചെയ്തിരുന്നു. മോൻസണുമായുള്ള സാമ്പത്തിക ഇടപാടുകൾ എന്തെല്ലാം, മോൻസന്റെ ബിസിനസ് ഇടപാടുകളെ കുറിച്ച് എന്തെല്ലാം അറിയാം, കൂട്ടുക്കച്ചവടക്കാർ ആരെല്ലാമാണ് തുടങ്ങിയ ചോദ്യങ്ങളാണ് ഇഡി സുധാകരനോട് ചോദിച്ചത്. സുധാകരന് പുറമെ ഐജി ലക്ഷ്മൺ, മുൻ ഡിഐജി എസ് സുരേന്ദ്രൻ, സുരേന്ദ്രന്റെ ഭാര്യ ബിന്ദുലേഖ എന്നിവരും കേസിൽ പ്രതികളാണ്.