വാട്‌സാപ്പിലൂടെ നിരന്തരം അശ്ലീല സന്ദേശങ്ങൾ; പിഡിപി നേതാവിനെതിരെ മാധ്യമപ്രവർത്തകയുടെ പരാതി

വാട്‌സാപ്പിലൂടെ പിഡിപി പ്രവർത്തകൻ നിരന്തരം അശ്ലീല സന്ദേശങ്ങൾ അയക്കുന്നുവെന്ന് മാധ്യമപ്രവർത്തകയുടെ പരാതി. പിഡിപി സംസ്ഥാന ജനറൽ സെക്രട്ടറി നിസാർ മേത്തറിനെതിരെയാണ് പരാതി. രാത്രിയെന്നോ പകലെന്നോ ഇല്ലാതെ ഇയാൾ നിരന്തരം ശല്യം ചെയ്യുകയാണെന്നാണ് കൊച്ചിയിലെ മാധ്യമപ്രവർത്തക പരാതിയിൽ പറയുന്നത്. 

അബ്ദുൽ നാസർ മഅദനി കേരളത്തിൽ എത്തിയ ഘട്ടത്തിൽ മാധ്യമങ്ങളെ കോർഡിനേറ്റ് ചെയ്തിരുന്നത് നിസാർ മേത്തറാണ്. മഅദനിയുടെ ആരോഗ്യനില സംബന്ധിച്ച വിവരങ്ങൾ ഇയാളിൽ നിന്ന് മാധ്യമപ്രവർത്തക തേടിയിരുന്നു. എന്നാൽ രണ്ട് ദിവസങ്ങൾ കഴിഞ്ഞപ്പോൾ നിസാറിന്റെ രീതി മാറി. രാത്രി വൈകിയും അശ്ലീല സന്ദേശങ്ങൾ അയച്ചു. മാധ്യമപ്രവർത്തക വിലക്കിയിട്ടും ഇത് തുടർന്നതോടെയാണ് പോലീസിൽ പരാതി നൽകിയത്.