ഇടതുപക്ഷത്തോടുള്ള വെറുപ്പാണ് പുതുപ്പള്ളിയിൽ വ്യക്തമായതെന്ന് കെ സുധാകരൻ

പുതുപ്പള്ളി വിജയം എൽഡിഎഫിനേറ്റ കനത്ത തിരിച്ചടിയെന്ന് കെപിസിസി പ്രസിഡന്റ് കെ സുധാകരൻ. യുഡിഎഫിനോടും ഉമ്മൻ ചാണ്ടിയോടും ആഭിമുഖ്യം കാണിക്കുന്നവരാണ് ഞങ്ങൾക്ക് വോട്ട് ചെയ്തത്. ബിജെപിയുടെയും സിപിഎമ്മിന്റെയും വോട്ടുകൾ കിട്ടിയിട്ടുണ്ട്. അവർ തന്നതല്ല, ഞങ്ങൾ പിടിച്ചു വാങ്ങിയതാണ്. ഇടതുപക്ഷത്തോടുള്ള വെറുപ്പാണ് പുതുപ്പള്ളിയിൽ വ്യക്തമായത്

ഭരിച്ച് ഭരിച്ച് പിണറായി വിജയനും എൽഡിഎഫും കേരളത്തെ കുട്ടിച്ചോറാക്കി. ഒരു തൊഴിലാളി വർഗ പാർട്ടിക്ക് അപമാനമാകുന്ന ഭരണമാണ് കേരളത്തിലുള്ളത്. പിണറായി വിജയന്റെ ധിക്കാരത്തിനും ഏകാധിപത്യത്തിനും കുടുംബാധിപത്യത്തിനും എതിരെ ജനം വോട്ട് ചെയ്‌തെന്നാണ് വിലയിരുത്താനാകുക. ഇത് രാഷ്ട്രീയ വിജയമാണ്. സഹതാപ തരംഗമില്ലെന്ന് പറയുന്നില്ല. പക്ഷേ സഹതാപ തരംഗത്തിൽ പാർട്ടി വോട്ടൊന്നും പോകില്ലെന്നും സുധാകരൻ പറഞ്ഞു.