അതിതീവ്ര മഴ: കണ്ണൂരും കാസർകോടും റെഡ് അലർട്ട് പ്രഖ്യാപിച്ചു, ഏഴ് ജില്ലകളിൽ ഓറഞ്ച് അലർട്ട്

സംസ്ഥാനത്ത് അതിതീവ്ര മഴ തുടരുമെന്ന് കാലാവസ്ഥാ വിഭാഗത്തിന്റെ മുന്നറിയിപ്പ്. കണ്ണൂർ, കാസർകോട് ജില്ലകളിൽ റെഡ് അലർട്ട് പ്രഖ്യാപിച്ചു. എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ ഓറഞ്ച് അലർട്ടാണ്. കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്

വടക്കൻ കേരളത്തിൽ അതിശക്തമായ മഴയാണ് ലഭിക്കുന്നത്. കണ്ണൂർ പെരിങ്ങോം, കാസർകോട് വെള്ളരിക്കുണ്ട് മേഖലകളിൽ കഴിഞ്ഞ 24 മണിക്കൂറിൽ 228 മില്ലി മീറ്റർ വരെയുള്ള മഴയാണ് ലഭിച്ചത്. വടക്കൻ കേരളത്തിലെ തീരദേശ മേഖലകളിലും കനത്ത ജാഗ്രത വേണമെന്ന് നിർദേശം നൽകിയിട്ടുണ്ട്. 

മഴക്കെടുതിയിൽ രണ്ട് മരണവും റിപ്പോർട്ട് ചെയ്തിട്ടുണ്ട്. തിരുവനന്തപുരത്ത് ആര്യനാട് വിദ്യാർഥി കുളത്തിൽ മുങ്ങിമരിച്ചു. പാറശാലയിൽ വീടിന് മുകളിൽ വീണ മരക്കൊമ്പ് വെട്ടി മാറ്റുന്നതിനിടെ കാൽ വഴുതി വീണ് ഗൃഹനാഥൻ മരിച്ചു. ഇതോടെ ഒരാഴ്ചക്കിടെ മഴക്കെടുതിയിൽ മരിച്ചവരുടെ എണ്ണം 11 ആയി.