ഇവരെക്കാളൊക്കെ മുമ്പ് മന്ത്രിയായിരുന്നു താൻ; മന്ത്രി റിയാസിനെ പരസ്യമായി വിമർശിച്ച് ഗണേഷ് കുമാർ
പൊതുമരാമത്ത് വകുപ്പ് മന്ത്രി പിഎ മുഹമ്മദ് റിയാസിനെ പരസ്യമായി വിമർശിച്ച് കെബി ഗണേഷ് കുമാർ എംഎൽഎ. തന്നെ പോലെ സീനിയറായ ജനപ്രതിനിധികളുടെ ആവശ്യങ്ങൾ മന്ത്രി പരിഗണിക്കുന്നില്ലെന്ന് ഗണേഷ് കുമാർ പറഞ്ഞു. പത്തനാപുരം ബ്ലോക്കിൽ 100 മീറ്റർ റോഡ് പോലും ഈ വർഷം പിഡബ്ല്യുഡി അനുവദിച്ചില്ല. മുൻ മന്ത്രി ജി സുധാകരൻ സ്‌നേഹവും പരിഗണനയും നൽകിയിരുന്നു. റോഡ് ഉദ്ഘാടന ചടങ്ങിൽ ഫണ്ട് അനുവദിച്ച ജി സുധാകരന്റെ ചിത്രം വെക്കാതിരുന്ന സംഘാടകരെ ഗണേഷ് വിമർശിക്കുകയും ചെയ്തു
പത്തനാപുരത്ത് ഈസ്റ്റ്-കോക്കുളത്ത് ഏല-പട്ടമല റോഡിന്റെ ഉദ്ഘാടന ചടങ്ങിനിടെയാണ് വിമർശനം. മന്ത്രിയായിരിക്കെ ജി സുധാകരനാണ് റോഡിന് പണം അനുവദിച്ചത്. അദ്ദേഹത്തിനുള്ള നന്ദി കയ്യടിച്ച് അറിയിക്കണം. ബാനറിൽ റിയാസിന്റെ പടം വെച്ച സ്ഥാനത്ത് യഥാർഥത്തിൽ ജി സുധാകരന്റെ പടമായിരുന്നു വെക്കേണ്ടിയിരുന്നത്. ഇവരെക്കാളൊക്കെ 20 വർഷം മുമ്പ് താൻ മന്ത്രിയായിരുന്നു. നിയമസഭയിൽ സീനിയോറിറ്റിയൊക്കെയുണ്ട്. ആ ഒരു മര്യാദ റോഡ് ആവശ്യങ്ങൾ പരിഗണിക്കുന്നതിൽ കാണിക്കണമെന്നും ഗണേഷ് കുമാർ പറഞ്ഞു.
