ബൈഡനെ ചേർത്ത് പിടിച്ചതു പോലെ മണിപ്പൂരിലെ സഹോദരിമാരെയും മോദി ചേർത്ത് പിടിക്കണം: പാംപ്ലാനി

ജി20 ഉച്ചകോടിയിൽ അമേരിക്കൻ പ്രസിഡന്റ് ജോ ബൈഡനെ ചേർത്തു പിടിച്ചത് പോലെ മണിപ്പൂരിൽ ആക്രമണത്തിന് വിധേയരായ സഹോദരിമാരെ ചേർത്ത് പിടിക്കാൻ പ്രധാനമന്ത്രി നരേന്ദ്രമോദി തയ്യാറാകണമെന്ന് തലശ്ശേരി അതിരൂപത ആർച്ച് ബിഷപ് മാർ ജോസഫ് പാംപ്ലാനി. ഏക സിവിൽ കോഡ് നടപ്പാക്കാനുള്ള കേന്ദ്ര നീക്കത്തിനെതിരെയും മണിപ്പൂരിലെ വംശീയ അതിക്രമങ്ങൾക്കെതിരെയും രാജ് മോഹൻ ഉണ്ണിത്താൻ എംപി നടത്തിയ ഏകദിന ഉപവാസത്തിന്റെ സമാപന യോഗത്തിൽ സംസാരിക്കുകയായിരുന്നു അദ്ദേഹം

മണിപ്പൂർ കലാപബാധിത പ്രദേശങ്ങളിൽ രാഹുൽ ഗാന്ധി നടത്തിയ സന്ദർശനം ന്യൂനപക്ഷങ്ങൾക്കൊപ്പം അദ്ദേഹം ഉണ്ടെന്ന ഉറപ്പാണ്. ഏതെങ്കിലും ഒരു വിഭാഗത്തിന്റെ പ്രധാനമന്ത്രി അല്ല നരേന്ദ്രമോദി. ഭാരതം എന്ന് പേര് മാറ്റിയതു കൊണ്ട് മാത്രം കാര്യമില്ലെന്നും പാംപ്ലാനി പറഞ്ഞു.