ജീപ്പിന്റെ ബോണറ്റിൽ കുട്ടിയെ ഇരുത്തി സാഹസിക യാത്ര; ഡ്രൈവറും ജീപ്പും പോലീസ് കസ്റ്റഡിയിൽ

തിരുവനന്തപുരം കഴക്കൂട്ടത്ത് തുറന്ന ജീപ്പിന്റെ ബോണറ്റിനു മുകളിൽ കുട്ടിയെ ഇരുത്തി യാത്ര ചെയ്ത സംഭവത്തിൽ ജീപ്പും ഡ്രൈവറും പൊലീസ് കസ്റ്റഡിയിൽ. കഴക്കൂട്ടം മേനംകുളം വാടിയിൽ നിന്നാണ് ജീപ്പ് കസ്റ്റഡിയിൽ എടുത്തത്. ഓണാഘോഷത്തിന്റെ ഭാഗമായിട്ടായിരുന്നു കുട്ടിയെ മുകളിൽ ഇരുത്തിയുള്ള യാത്ര. യാത്രയിൽ ഉടനീളം കുട്ടിയെ ബോണറ്റിന് മുകളിൽ ഇരുത്തിയിരുന്നു. 

ഇതിന്റെ വീഡിയോ ദൃശ്യങ്ങൾ സമൂഹ മാധ്യമങ്ങളിലൂടെ പ്രചരിച്ചതോടെയാണ് പോലീസ് കേസെടുത്തത്. ആറ്റിങ്ങൽ സ്വദേശിയുടേതാണ് ജീപ്പ്. വാഹനത്തിന് രൂപമാറ്റം വരുത്തിയതിന് മോട്ടോർ വാഹന വകുപ്പും നടപടി ആരംഭിച്ചിട്ടുണ്ട്.