പിവി അൻവർ കൈവശം വെച്ചിരിക്കുന്ന 90.3 സെന്റ് ഭൂമി കണ്ടുകെട്ടുന്ന നടപടി ആരംഭിച്ചു

നിലമ്പൂർ എംഎൽഎ പിവി അൻവർ കൈവശം വെച്ചിരിക്കുന്ന മിച്ച ഭൂമി കണ്ടുകെട്ടാനുള്ള നടപടികൾ തുടങ്ങി. കൂടരഞ്ഞി വില്ലേജിൽ അൻവർ കൈവശം വെച്ചിരിക്കുന്ന 90.3 സെന്റ് ഭൂമി കണ്ടുകെട്ടുന്ന നടപടിയാണ് തുടങ്ങിയത്. വിവിധ താലൂക്കുകളിലായി അൻവർ കൈവശം വെച്ചിരിക്കുന്ന 6.24 ഏക്കർ ഭൂമി കണ്ടുകെട്ടാനായിരുന്നു താലൂക്ക് ലാൻഡ് ബോർഡ് ചെയർമാന്റെ ഉത്തരവ്

ഭൂപരിഷ്‌കരണ നിയമം ലംഘിച്ച് പിവി അൻവർ കൈവശം വെച്ചിരിക്കുന്ന ഭൂമി സ്വമേധയാ സർക്കാരിലേക്ക് നൽകാൻ കഴിഞ്ഞ മാസം 26നാണ് താമരശ്ശേരി ലാൻഡ് ബോർഡ് ഉത്തരവിട്ടത്. ഒരാഴ്ചക്കുള്ളിൽ നടപടി പൂർത്തിയാക്കാനായില്ലെങ്കിൽ ഭൂമി കണ്ടുകെട്ടുമെന്നായിരുന്നു ഉത്തരവ്. സമയപരിധി കഴിഞ്ഞിട്ടും ഭൂമി തിരികെ നൽകാൻ അൻവർ തയ്യാറാകാതെ വന്നതോടെയാണ് തഹസിൽദാറുടെ നേതൃത്വത്തിൽ ഭൂമി ഏറ്റെടുക്കൽ നടപടി തുടങ്ങിയത്. 

ഈ ഭൂമിയുമായി അതിർത്തി പങ്കിടുന്ന സ്ഥലത്തിന്റെ ഉടമകൾക്ക് ഇനി നോട്ടീസ് അയക്കും. ഇവരുടെ ഭൂരേഖകളുമായി ഒത്തുനോക്കിയ ശേഷം അതിർത്തി നിർണയിച്ച് കല്ലിടുന്നതിന് വേണ്ടിയാണ് ഈ നടപടി. സർവേ വേഗത്തിൽ പൂർത്തിയാക്കാനാണ് ഉദ്യോഗസ്ഥർക്ക് ലഭിച്ചിരിക്കുന്ന നിർദേശം.