ജെ എൻ യു അക്രമം: മുഖംമൂടി ക്രിമിനലുകളിൽ ചിലരെ തിരിച്ചറിഞ്ഞതായി ഡൽഹി പോലീസ്

ജെ എൻ യു ക്യാമ്പസിനുള്ളിൽ മുഖംമൂടി ധരിച്ച് ആക്രമണം നടത്തിയ ക്രിമിനൽ സംഘത്തിലെ ചിലരെ തിരിച്ചറിഞ്ഞതായി ഡൽഹി പോലീസ് വൃത്തങ്ങൾ. ആക്രമണം നടന്ന് മൂന്ന് ദിവസം കഴിയുമ്പോഴാണ് പ്രതികളിൽ ചിലരെയെങ്കിലും തിരിച്ചറിഞ്ഞതായി ഡൽഹി പോലീസ് പറയുന്നത്. പ്രതികളെ പിടികൂടാത്ത പോലീസ് നടപടിക്കെതിരെ വ്യാപക വിമർശനമുയർന്ന സാഹചര്യത്തിലാണ് പോലീസ് നടപടി

ജനുവരി 5ന് സർവകലാശാലയിൽ നടന്ന ആക്രമണത്തിൽ യൂനിയൻ പ്രസിഡന്റ് ഐഷി ഘോഷ് അടക്കം നാൽപത് പേർക്ക് പരുക്കേറ്റിരുന്നു. മുഖംമൂടി ധരിച്ചെത്തിയ ക്രിമിനലുകൾ ഹോസ്റ്റലിലേക്ക് നുഴഞ്ഞുകയറി ആക്രമണം അഴിച്ചുവിടുകയായിരുന്നു.

തനിക്കെതിരെ നടന്ന ആക്രമണത്തിൽ ഐഷി ഘോഷ് പോലീസിൽ പരാതി നൽകി. വധശ്രമത്തിനാണ് പരാതി നൽകിയിരിക്കുന്നത്.