കൊൽക്കത്തയിൽ നരേന്ദ്രമോദിക്കെതിരെ വൻ പ്രതിഷേധത്തിന് ആഹ്വാനം; വഴിയിൽ തടയുമെന്നും മുന്നറിയിപ്പ്

കൊൽക്കത്തയിൽ പ്രധാനമന്ത്രി നരേന്ദ്രമോദിക്കെതിരെ വൻ പ്രതിഷേധത്തിന് ആഹ്വാനം. പ്രധാനമന്ത്രിയെ വഴിയിൽ തടയുമെന്ന് പ്രതിഷേധക്കാർ മുന്നറിയിപ്പ് നൽകി. പൗരത്വ ഭേദഗതിയിലാണ് പ്രതിഷേധം

നരേന്ദ്രമോദി എത്തുമ്പോൾ വിമാനത്താവളം വളയാനാണ് ആഹ്വാനം നൽകിയിരിക്കുന്നത്. ശനി, ഞായർ ദിവസങ്ങളിലായി നാല് പരിപാടികളാണ് നരേന്ദ്രമോദിക്ക് കൊൽക്കത്തയിലുള്ളത്. മോദിക്കെതിരെ പ്രതിഷേധം ശക്തമാക്കുമെന്ന് ഇടതുപാർട്ടികളും വ്യക്തമാക്കിയിട്ടുണ്ട്.

പൗരത്വ നിയമഭേദഗതിക്കെതിരെ പ്രതിഷേധിക്കുന്ന വിവിധ സംഘടനകളാണ് കൊൽക്കത്തയിൽ മോദിക്കെതിരെ പ്രതിഷേധത്തിന് ആഹ്വാനം ചെയ്തിരിക്കുന്നത്. 17 ഇടതുപാർട്ടികളുടെ സംയുക്ത ഫോറവും പ്രതിഷേധത്തിന് ആഹ്വാനം നൽകിയിട്ടുണ്ട്.

നരേന്ദ്രമോദി ഗോ ബാക്ക് എന്ന മുദ്രവാക്യമുയർത്തി പ്രതിഷേധിക്കാനാണ് സമൂഹ മാധ്യമങ്ങളിലടക്കം ആഹ്വാനം ഉയർത്തിയിരിക്കുന്നത്. നേരത്തെ പ്രതിഷേധക്കാരെ ഭയന്ന് അസമിലെ ഗുവാഹത്തി സന്ദർശനം നരേന്ദ്രമോദി റദ്ദാക്കിയിരുന്നു.