എസ് സി ഒ ഉച്ചകോടിയിലേക്ക് പാക് പ്രധാനമന്ത്രി ഇമ്രാൻ ഖാനെ ക്ഷണിക്കുമെന്ന് ഇന്ത്യ

ന്യൂഡൽഹിയിൽ നടക്കാനിരിക്കുന്ന ഷാങ്ഹായി കോർപറേഷൻ ഓർഗനൈസേഷൻ( എസ് സി ഒ) ഉച്ചകോടിയിലേക്ക് പാക് പ്രധാനമന്ത്രി ഇമ്രാൻ ഖാനെ ഇന്ത്യ ക്ഷണിക്കും. ഉച്ചകോടിയിൽ ആകെയുള്ള എട്ട് അംഗരാജ്യങ്ങളെയും നാല് നിരീക്ഷകരെയും ക്ഷണിക്കുമെന്ന് കേന്ദ്ര വിദേശകാര്യ മന്ത്രാലയം അറിയിച്ചു

ഈ വർഷമവസാനം ഇന്ത്യ ഉച്ചകോടിക്ക് ആതിഥേയത്വം വഹിക്കും. നടപടിക്രമമനുസരിച്ച് എട്ട് അംഗങ്ങളെയും നാല് നിരീക്ഷകരെയും മറ്റ് അന്താരാഷ്ട്ര സംഭാഷണ പങ്കാളികളെയും ക്ഷണിക്കുമെന്ന് വിദേശകാര്യ വക്താവ് രവീഷ് കുമാർ വാർത്താ സമ്മേളനത്തിൽ പറഞ്ഞു.

ചൈനയുടെ നേതൃത്വത്തിലുള്ള എട്ടംഗ സാമ്പത്തിക സുരക്ഷാ കൂട്ടായ്മയാണ് എസ് സി ഒ. 2017ലാണ് ഇന്ത്യയും പാക്കിസ്ഥാനും കൂട്ടായ്മയിൽ അംഗമാകുന്നത്. കസാഖിസ്ഥാൻ, കിർഗിസ്ഥാൻ, റഷ്യ, തജികിസ്്ഥാൻ, ഉസ്‌ബെകിസ്ഥാൻ എന്നീ രാജ്യങ്ങളാണ് മറ്റ് സ്ഥിരാംഗങ്ങൾ. അഫ്ഗാനിസ്ഥാൻ, ഇറാൻ, മംഗോളിയ, ബെലാറസ് എന്നിവരാണ് നിരീക്ഷക രാജ്യങ്ങൾ