2021 മുതൽ ഇന്ത്യക്കാർക്ക് ഇ-പാസ്പോർട്ടുകൾ മാത്രമെന്ന് കേന്ദ്രം
ഡല്‍ഹി: പ്രിന്‍റ് ചെയ്ത ബുക്ലറ്റ് പാസ്പോര്‍ട്ടുകള്‍ക്ക് പകരം 2021 മുതല്‍ ഇന്ത്യന്‍ പൗരന്‍മാര്‍ക്ക് ഇ-പാസ്പോര്‍ട്ടുകള്‍ മാത്രം വിതരണം ചെയ്യുന്നതിനായുള്ള തയാറെടുപ്പിലാണ് കേന്ദ്രമെന്ന് റിപ്പോര്‍ട്ട്.
പദ്ധതി നടപ്പിലാക്കാനായുള്ള വിവര സാങ്കേതിക സൗകര്യങ്ങള്‍ ഒരുക്കുന്നതിനായി അനുയോജ്യരായ ഏജന്‍സിയെയും കേന്ദ്രം അന്വേഷിച്ച്‌ തെരഞ്ഞെടുക്കും. ട്രയല്‍ അടിസ്ഥാനത്തില്‍ നിലവില്‍ 20,000 ഒഫീഷ്യല്‍, ഡിപ്ലോമാറ്റിക് ഇ-പാസ്പോര്‍ട്ടുകള്‍ രാജ്യം വിതരണം ചെയ്തിട്ടുണ്ട്.
വ്യാജ പാസ്പോര്‍ട്ടുകള്‍ തയാറാക്കുന്നത് തടയുന്നതിനും ഇമിഗ്രേഷന്‍ നടപടികള്‍ വേഗത്തിലാക്കുന്നതിനുമാണ് പുതിയ രീതിയിലേക്ക് മാറുന്നതെന്നാണ് വിശദീകരണം. ഇലക്‌ട്രോണിക് മൈക്രോപ്രൊസസര്‍ ചിപ്പുമായിട്ടാണ് ഇ-പാസ്പോര്‍ട്ടുകള്‍ വരാന്‍ പോകുന്നത്. അന്താരാഷ്ട്ര സിവില്‍ ഏവിയേഷന്‍ ഓര്‍ഗനൈസേഷന്‍ മാനദണ്ഡങ്ങള്‍ അടിസ്ഥാനമാക്കിയായിരുക്കും പാസ്പോര്‍ട്ടെന്നും അധികൃതര്‍ പറയുന്നു.
ഇ–പാസ്പോര്‍ട്ടുകള്‍ ഇന്ത്യയിലെ 36 പാസ്പോര്‍ട്ട് ഓഫീസുകളില്‍ നിന്നും വിതരണം ചെയ്യും. അതിനുള്ള സംവിധാനങ്ങള്‍ എല്ലാ ഓഫീസുകളിലും ലഭ്യമാക്കിയതിന് ശേഷമായിരിക്കുമത്. മണിക്കൂറില്‍ 10,000 മുതല്‍ 20,000 വരെ ഇ-പാസ്പോര്‍ട്ടുകള്‍ നല്‍കാനുള്ള പ്രത്യേക സംവിധാനം പാസ്പോര്‍ട്ട് ഓഫീസുകളില്‍ ഒരുക്കും. പുതുതായി പാസ്പോര്‍ട്ട് എടുക്കുന്നവര്‍ക്കും റീ-ഇഷ്യൂ ചെയ്യുന്നവര്‍ക്കും 2021 മുതല്‍ ഇ-പാസ്പോര്‍ട്ടുകളായിരിക്കും നല്‍കുകയെന്നും എക്കണോമിക് ടൈംസിന്‍റെ റിപ്പോര്‍ട്ടില്‍ പറയുന്നു.
