ആർഎസ്എസിനെ വിമർശിച്ച് വാട്സപ്പ് സ്റ്റാറ്റസ്; മാധ്യമവിദ്യാർത്ഥിയെ 12 മണിക്കൂർ തടഞ്ഞുവച്ച് യുപി പൊലീസ്

ആർഎസ്എസിനെ വിമർശിച്ച് വാട്സപ്പ് സ്റ്റാറ്റസ് പോസ്റ്റ് ചെയ്തതിന് മാധ്യമവിദ്യാർത്ഥിയെ ഉത്തർപ്രദേശ് പൊലീസ് 12 മണിക്കൂർ തടഞ്ഞുവച്ചു എന്ന് പരാതി. സ്വാതന്ത്ര്യദിനമായ ഇന്നലെയാണ് മാധ്യമവിദ്യാർത്ഥിയായ മിസ്ബാഹ് സഫറിനെ പൊലീസ് തടഞ്ഞുവച്ചത്. രാത്രി വീട്ടിലെത്തിയാണ് മിസ്ബാഹിനെ പൊലീസ് സ്റ്റേഷനിലേക്ക് കൊണ്ടുപോയത്.

ഹൈദരാബാദ് മൗലാന ആസാദ് നാഷണൽ ഉർദു സർവകലാശാലയിലെ ഒന്നാം വർഷ മാധ്യമവിദ്യാർത്ഥിയാണ് മിസ്ബാഹ്. ക്യാമ്പസ് ഫ്രണ്ട് സംഘടിപ്പിക്കുന്ന സ്വാതന്ത്ര്യദിന ഫേസ്ബുക്ക് ലൈവ് പരിപാടിയുടെ പോസ്റ്റർ ഓഗസ്റ്റ് 14 ന് മിസ്ബാഹ് തൻ്റെ വാട്സപ്പ് സ്റ്റാറ്റസായി പോസ്റ്റ് ചെയ്തിരുന്നു. ‘ആർഎസ്എസിൽ നിന്ന് സ്വാതന്ത്ര്യം’ എന്ന ഹാഷ്ടാഗോടെയാണ് മിസ്ബാഹ് പോസ്റ്റർ പങ്കുവച്ചത്. ഇതേ തുടർന്ന് രാത്രി രണ്ട് മണിയോടെ പൊലീസ് വിദ്യാർത്ഥിയുടെ വീട്ടിലെത്തുകയായിരുന്നു. ചോദ്യം ചെയ്യണമെന്ന് വീട്ടുകാരെ അറിയിച്ച് തന്നെ ജർവാൾ പൊലീസ് സ്റ്റേഷനിലേക്ക് കൊണ്ടുപോയെന്ന് മിസ്ബാഹ് പറയുന്നു.