കർഷകരുടെ ഭാരത് ബന്ദിന് പിന്തുണയുമായി ഇടത് പാർട്ടികൾ; കേരളത്തെ ഒഴിവാക്കി

കേന്ദ്രസർക്കാരിന്റെ കർഷക വിരുദ്ധ നയങ്ങളിൽ പ്രതിഷേധിച്ച് കർഷക സംഘടനകൾ ചൊവ്വാഴ്ച നടത്താൻ ആഹ്വാനം ചെയ്ത ഭാരത ബന്ദിന് പിന്തുണ പ്രഖ്യാപിച്ച് ഇടതുപാർട്ടികൾ. സിപിഎം, സിപിഐ, സിപിഐഎംഎൽ, ആർഎസ്പി, ഫോർവേഡ് ബ്ലോക്ക് എന്നീ പാർട്ടികളാണ് ബന്ദിന് പിന്തുണ പ്രഖ്യാപിച്ചത്.

ഇടതുപാർട്ടികൾ സംയുക്ത പ്രസ്താവന പുറത്തിറക്കിയിട്ടുണ്ട്. കർഷക ദ്രോഹകരമായ നിയമവും, ഇലക്ട്രിസിറ്റ് ഭേദഗതി നിയമവും പിൻവലിക്കണമെന്ന് ഇടതു പാർട്ടികൾ ആവശ്യപ്പെട്ടു. കർഷക സമരത്തിന് പിന്തുണ നൽകാൻ രാജ്യത്തെ മറ്റു പാർട്ടികളോട് ഇടതുപാർട്ടികൾ അഭ്യർത്ഥിച്ചു.

അതേസമയം ഭാരത ബന്ദിൽ നിന്ന് കേരളത്തെ ഒഴിവാക്കിയിട്ടുണ്ട്. സംസ്ഥാനത്ത് തദ്ദേശ തെരഞ്ഞെടുപ്പിന്റെ ആദ്യഘട്ട വോട്ടെടുപ്പ് നടക്കുന്നതിനാലാണിത്. ബന്ദിന് പകരം മറ്റ് സമരമാർഗങ്ങൾ ആലോചിക്കുമെന്ന് കേരള കർഷക സംഘം സംസ്ഥാന സെക്രട്ടറി കെ എൻ ബാലഗോപാൽ പറഞ്ഞു.