പുല്‍വാമയില്‍ ഏറ്റുമുട്ടല്‍; സുരക്ഷാസേന മൂന്നു ഭീകരരെ വധിച്ചു
Apr 2, 2021, 13:55 IST
ജമ്മു കശ്മീരിലെ പുല്‍വാമ ജില്ലയില്‍ സുരക്ഷാസേനയും ഭീകരരും തമ്മില്‍ ഏറ്റുമുട്ടി. മൂന്നു ഭീകരരെ സുരക്ഷാസേന വധിച്ചു. പുല്‍വാമ ജില്ലയിലെ ഗാത്ത് മുഹല്ല ഏരിയായിലാണ് ഏറ്റുമുട്ടല്‍ നടന്നത്. സൈന്യം, സി.ആര്‍.പി.എഫ്, പൊലീസ് എന്നീ വിഭാഗങ്ങള്‍ സംയുക്തമായാണ് തിരച്ചില്‍ നടത്തിയത്. ഭീകരര്‍ വെടിയുയര്‍ത്തിയതിന് പിന്നാലെ സേന തിരിച്ചടിക്കുകയായിരുന്നു.
ഏറ്റുമുട്ടലിനിടെ ഒരു പെണ്‍കുട്ടി ഉള്‍പ്പെടെ രണ്ട് പ്രദേശവാസികള്‍ക്ക് പരിക്കേറ്റു. ഇവരെ ശ്രീനഗറിലെ എസ്.എം.എച്ച്‌.എസ് ആശുപത്രിയിലേക്ക് മാറ്റി. തെക്കന്‍ കശ്മീര്‍ ജില്ലകളായ ഷോപ്പിയാന്‍, പുല്‍വാമ എന്നിവിടങ്ങള്‍ കേന്ദ്രീകരിച്ച്‌ ഭീകരരെ പിടികൂടുന്നതിന് തുടര്‍ച്ചയായ തിരച്ചിലാണ് സുരക്ഷാസേന നടത്തുന്നത്. നേരത്തെ നടന്ന 10 ഓപ്പറേഷനുകളില്‍ നിന്നായി 20 ഭീകരരെ സേന വധിച്ചു.
