നുപൂർ ശർമയെ പിന്തുണച്ച തയ്യൽക്കാരനെ കൊന്നവർക്ക് ബിജെപി ബന്ധമുണ്ടെന്ന് അശോക് ഗെഹ്ലോട്ട്

പ്രവാചക നിന്ദ നടത്തിയ ബിജെപി നേതാവ് നുപൂർ ശർമയെ പിന്തുണച്ച് സമൂഹ മാധ്യമത്തിൽ പോസ്റ്റിട്ട തയ്യൽക്കാരനെ കഴുത്തറുത്ത് കൊന്ന കേസിലെ പ്രതികൾക്ക് ബിജെപി ബന്ധമുണ്ടെന്ന് രാജസ്ഥാൻ മുഖ്യമന്ത്രി അശോക് ഗെഹ്ലോട്ട്. ഉദയ്പൂരിൽ തയ്യൽക്കട നടത്തിയിരുന്ന കനയ്യ ലാൽ ആണ് കൊല്ലപ്പെട്ടത്. രാജസ്ഥാനിൽ നിയമസഭാ തെരഞ്ഞെടുപ്പ് നടക്കാനിരിക്കെ വർഗീയ സംഘർഷമുണ്ടാക്കാനാണ് ബിജെപി ശ്രമിക്കുന്നതെന്നും ഗെഹ്ലോട്ട് ആരോപിച്ചു

സംഭവത്തിന് ഏതാനും ദിവസങ്ങൾക്ക് മുമ്പ് മറ്റൊരു കേസിൽ ഇവരെ പോലീസ് അറസ്റ്റ് ചെയ്തിരുന്നു. അന്ന് ബിജെപി നേതാക്കൾ എത്തിയാണ് മോചിപ്പിച്ചത്. എൻഐഎക്ക് പകരം രാജസ്ഥാനിലെ പോലീസ് ഏജൻസി അന്വേഷിച്ചിരുന്നുവെങ്കിൽ അന്വേഷണം യുക്തിസഹമായി നീങ്ങുമായിരുന്നുവെന്ന് ഗെഹ്ലോട്ട് പറഞ്ഞു. 2022 ജൂൺ 22നാണ് കനയ്യ ലാൽ കൊല്ലപ്പെട്ടത്. ഗൗസ് മുഹമ്മദ്, റിയാസ് അഖ്താരി, മുഹമ്മദ് റിയാസ് അൻസാരി തുടങ്ങി അഞ്ച് പ്രതികൾ കേസിൽ അറസ്റ്റിലായിരുന്നു.