ഈ സായാഹ്നം നമുക്കായി മാത്രം – ഭാഗം 15
എഴുത്തുകാരി: അമൃത അജയൻ
” പറഞ്ഞതൊക്കെ മനസിലായോ .. ”
നിവ മിണ്ടാതെ നിൽക്കുന്നത് കണ്ട് മയി ആവർത്തിച്ചു ചോദിച്ചു ..
നിവ മയിയെ രൂക്ഷമായി നോക്കി ..
” എന്ത് വേണമെന്ന് നിനക്ക് തീരുമാനിക്കാം … നിന്റെ തീരുമാനം പോലിരിക്കും ബാക്കി കാര്യങ്ങൾ ….”
” നിങ്ങളുടെ കോൾസ് എടുത്താൽ പോരേ … എടുക്കാം …… ” നിവ രോഷത്തോടെ പറഞ്ഞു …
” വെറുതെ എടുത്താൽ പോരാ… വിളിക്കുന്നത് വീഡിയോ കോൾ ആണെങ്കിൽ അതെടുക്കണം … അന്നത്തെപ്പോലെ റിസോർട്ടിലോ ബീച്ചിലോ ഒക്കെയാണെങ്കിൽ നിന്റെ അവിടുത്തെ പൊറുതി അവസാനിപ്പിക്കും ഞാൻ …..
” ഛെ ………” കൈയ്യിലിരുന്ന ചീർപ് അവൾ ദേഷ്യത്തിൽ വലിച്ചെറിഞ്ഞു ..
” നിങ്ങൾ ജയിച്ചൂന്ന് കരുതണ്ട .. ഒരു ദിവസം നിങ്ങളുടെ മുന്നിൽ ഞാൻ നിവർന്ന് നിന്ന് സംസാരിക്കും .. നോക്കിക്കോ ….” നിവ പകയോടെ പറഞ്ഞു …
മയി അതിനു പുഞ്ചിരിക്കുക മാത്രം ചെയ്തു …..
* * * * * * * * * * * * * * *
നിവയെ ബസ് കയറ്റി വിടുന്നത് നിഷിനായിരുന്നു … മയിയും അവർക്കൊപ്പമുണ്ടായിരുന്നു …
നിവയുടെ ബാഗ് ഡിക്കിയിലെടുത്തു വച്ച് ഡിക്കിയടച്ചു … നവീൻ ഹോസ്പിറ്റലിലായിരുന്നു .. അമ്മയോടും അച്ഛനോടും അപ്പൂസിനോടും ഹരിതയോടും അവൾ യാത്ര പറഞ്ഞു കാറിലേക്ക് കയറി …
നിഷിനൊപ്പം ഫ്രണ്ടിൽ മയിയും….
ഇടയ്ക്ക് കാർ നിർത്തി , നിവയ്ക്ക് മിനറൽ വാട്ടറും , സ്നാക്സും വാങ്ങിക്കൊടുത്തു .. അവളത് ഹാന്റ് ബാഗിൽ വച്ചു ..
ബസ്സ്റ്റേഷനിൽ എത്തിയ ശേഷം , കാറിന്റെ ഡിക്കിയിൽ നിന്ന് ബാഗെടുത്തു , നിവയെയും കൂട്ടി ബസിനടുത്തേക്ക് ചെന്നു …
ടിക്കറ്റ് ചെക്ക് ചെയ്ത ശേഷം , നിവയെ സീറ്റിൽ കൊണ്ടിരുത്തി അവർ യാത്ര പറഞ്ഞിറങ്ങി .. എങ്കിലും ബസ് പോകുന്നത് വരെ അവർ കാത്തു നിന്നു ..
ശേഷം , കാറെടുത്ത് നഗരത്തിന്റെ തിരക്കിലേക്കിറങ്ങി ..
മയി ചിന്തിച്ചത് നിവയെ കുറിച്ചാണ് .. അപകടത്തിലേക്കാണ് അവളുടെ പോക്ക് .. അവളെ രക്ഷിച്ചെടുക്കേണ്ട കടമ തനിക്കുണ്ട് ..
” നമുക്ക് എന്തെങ്കിലും കഴിച്ചാലോ …? ” നിഷിൻ ചോദിച്ചു …
അവൾ എതിർത്തില്ല …
നഗരത്തിലെ പേരെടുത്ത റസ്റ്റൊറന്റിന്റെ പാർക്കിംഗ് ഏരിയായിലേക്ക് നിഷിന്റെ കാർ കടന്നു ചെന്ന് നിന്നു …
തൊപ്പി വച്ച് , ഡോറിനരികിൽ നിന്ന മനുഷ്യൻ അവരെ അകത്തേക്ക് വെൽക്കം ചെയ്തു …
സെക്കൻറ് ഫ്ലോറിലെ ഫാമിലി ഹട്ടിലാണ് അവർ ഇരുന്നത് …
” നിവ എന്താ ഫാഷൻ ഡിസൈനിംഗ് തിരഞ്ഞെടുത്തത് ….?” വെയ്റ്റർ വന്ന് ഓർഡർ എടുത്തു പോയിക്കഴിഞ്ഞപ്പോൾ മയി ചോദിച്ചു …
സംസാരിക്കാൻ എന്തെങ്കിലുമൊന്ന് തുറന്നു കിട്ടാൻ കാത്തിരിക്കുകയായിരുന്നു നിഷിനും …
” അവൾ പെട്ടന്നെടുത്തൊരു തീരുമാനമായിരുന്നു .. എൻജിനിയറിംഗിന് പോകാനിരുന്നതാ .. അവളുടെ ക്ലോസ് ഫ്രണ്ട്സ് ഇതാ ചെയ്യുന്നേന്ന് പറഞ്ഞ് വീടെടുത്ത് തല തിരിച്ചു വച്ചു .. വീട്ടിൽ ആർക്കും ഇൻട്രസ്റ്റ് ഉണ്ടായിട്ടല്ല … അവളുടെ ഇഷ്ടം നടക്കട്ടെ എന്ന് വച്ചു … ”
മയി തല കുലുക്കി …
” അത് നല്ലൊരു ഫീൽഡാണ് .. കുറച്ച് ടാലന്റ്സ് വേണം .. ക്രിയേറ്റീവ് ആകണം … എങ്കിലേ പിടിച്ചു നിൽക്കാൻ പറ്റൂ ….”
” അവൾ കോൺഫിഡന്റ് ആണെന്നാ പറച്ചിൽ …..” നിഷിൻ പറഞ്ഞു …
” അവളുടെ കോളേജിലേക്ക് അടുത്തെങ്ങാനും പോയിരുന്നോ ….” മയി ചോദിച്ചു …
” ഞാൻ പോയില്ല .. അച്ഛൻ ഇടയ്ക്ക് പോയിരുന്നു … എന്തേ ..”
” ഇടയ്ക്ക് ഹോസ്റ്റലിലും കോളേജിലുമൊക്കെ വിസിറ്റ് ചെയ്യുന്നത് നല്ലതാ … പുറത്ത് തനിയെ നിന്ന് പഠിക്കുന്ന കുട്ടിയല്ലേ …..”
” അവളങ്ങനെ വേണ്ടാത്ത പണിയ്ക്കൊന്നും പോകില്ല … വീട്ടിൽ ഉള്ളതേയുള്ളു … പുറത്ത് സൈലന്റാണ് ….. എന്നും അമ്മയുടെ ശബ്ദം കേൾക്കാതെ ഉറങ്ങില്ല അവൾ … ” നിഷിൻ പറഞ്ഞപ്പോൾ മയിക്ക് അത്ഭുതമൊന്നും തോന്നിയില്ല …
വാവയെ എത്രമാത്രം കൊഞ്ചിച്ചും ലാളിച്ചുമാണ് അവർ വച്ചിരിക്കുന്നതെന്ന് അവൾ കണ്ടതാണ് … അത്ര തന്നെ വിശ്വാസവുമാണ് അവളെ … അവൾ വളർന്നു പോയി എന്നവർക്ക് ഇന്നും തോന്നിയിട്ടില്ല …
അവളാ വീടിന് ഒരു കണ്ണീരാകരുതേയെന്ന് അവൾ ആഗ്രഹിച്ചു … രാജശേഖറിന് മകളെന്നാൽ ജീവനാണ് …
വെയ്റ്റർ ഫുഡ് കൊണ്ട് വന്ന് , ഇരുവർക്കുമായി സെർവ് ചെയ്തു കൊടുത്തു ..
” അത് പോട്ടെ നമ്മുടെ കാര്യം പറ …. എന്നാ സത്യം തെളിയിക്കുന്നത് …. ?” മയി ചോദിച്ചു …
നിഷിൻ അവളെ നിസഹായനായി നോക്കി …
” എന്നെങ്കിലും തെളിയിക്കാം എന്ന് പറഞ്ഞാൽ പോരാ … ഒരു ഡെഡ് ലൈൻ വേണം … അതുവരെ നിങ്ങൾക്ക് ടൈമുണ്ടാവും … അതിനുള്ളിൽ നിങ്ങൾക്ക് കഴിഞ്ഞില്ലെങ്കിൽ ഞാൻ നിങ്ങളുടെ ലൈഫിൽ നിന്ന് പോകും .. എനിക്ക് എന്റെ ലൈഫ് സ്പോയിൽ ചെയ്യാൻ കഴിയില്ല …. ” മയി തറപ്പിച്ച് പറഞ്ഞു …
നിഷിന്റെ മുഖം കുനിഞ്ഞു …
” മയീ … ഞാൻ സത്യം പറയാം .. വെറുമൊരു ഊമക്കത്ത് വച്ച് ഞാനെവിടെ പോയി സത്യം തെളിയിക്കാനാ .. നീ തന്ന കത്തിലെ സീൽ നോക്കി , അത് കോഴിക്കോട് , പുല്ലാളൂർ എന്ന സ്ഥലത്ത് നിന്നാണ് … അവിടെ അന്വേഷിച്ചു .. പക്ഷെ പ്രത്യേകിച്ച് കാര്യമൊന്നുമില്ല … ദിവസം എത്രയോ കത്തുകൾ അവിടെ നിന്ന് പോകുന്നുണ്ട് …..” അവൻ തുറന്നു പറഞ്ഞു ..
” കത്ത് ഫേക്കാണെന്ന് തെളിയിച്ചില്ലെങ്കിലും , അതിലുള്ള കാര്യങ്ങൾ സത്യമല്ല എന്ന് തെളിയിച്ചാൽ മതി …..” മയി പറഞ്ഞു …
” എനിക്ക് അങ്ങനെയൊരു റിലേഷൻ ഇല്ല എന്ന് ഞാൻ പറഞ്ഞിട്ടും താൻ വിശ്വസിക്കുന്നില്ലല്ലോ .. ഇല്ലാത്ത ഒന്നിന് എന്ത് തെളിവാ കാണിക്കാനുണ്ടാവുക .. ഉള്ള കാര്യങ്ങൾക്കല്ലെ തെളിവുണ്ടാകൂ … ”
” ശരി … നമ്മൾ ഒന്നിച്ചു ജീവിച്ചു തുടങ്ങുമ്പോൾ ഒരു സ്ത്രീ കുഞ്ഞിനെയും കൊണ്ട് കയറി വന്നാൽ ഞാനെന്ത് ചെയ്യണം …? ”
” തനിക്കെന്നെ എങ്ങനെ വേണമെങ്കിലും ശിക്ഷിക്കാം … ”
” അത് പൊള്ളയായ വാക്കാണ് .. എങ്ങനെ വേണമെങ്കിലും ശിക്ഷിക്കാത്രേ … നിങ്ങളെ തല്ലാനോ കൊല്ലാനോ ഒന്നും ഞാൻ മുതിരില്ലാന്ന് നിങ്ങൾക്കുമറിയാം … ”
” അതിലും വലിയ ആയുധം നിനക്കുണ്ടല്ലോ മയി … നീയൊരു ജേർണലിസ്റ്റാണ് .. ഭാര്യയായ ജേർണലിസ്റ്റ് വിചാരിച്ചാൽ തീരാവുന്നതേയുള്ളു നിഷിൻ രാജശേഖർ IAS .. ”
” എന്റെ കരിയർ ഞാൻ പ്രതികാരം തീർക്കാൻ ഉപയോഗിക്കില്ല … ഒരിക്കലും .. ”
നിഷിൻ മിണ്ടാതിരുന്നു …
” ശരി …. സമ്മതിച്ചു … നിങ്ങൾ ഈ കാര്യത്തിൽ പെർഫെക്ട് ആണ് … പക്ഷെ എനിക്ക് വിശ്വാസക്കുറവുണ്ട് … കാരണം മറ്റൊരു പെൺകുട്ടിയുടെയും കുഞ്ഞിന്റെയും ജീവിതം ഞാൻ നശിപ്പിച്ചു എന്നൊരു കുറ്റബോധം എനിക്കുണ്ടാവാതിരിക്കാൻ , ആ കത്തിന്റെ പിന്നാലെ ഞാനൊന്നു പോയി നോക്കട്ടെ ….?”
നിഷിൻ അവളെ നോക്കി …
” ഭർത്താവിന്റെ പൂർവ്വ ചരിത്രം അന്വേഷിക്കുന്നത് അത്ര നല്ല കാര്യമല്ല .. അറിയാം …. പക്ഷെ ഇവിടെ മറു വശത്ത് നിസഹായയായ സ്ത്രീയും കുഞ്ഞും .. അതാണെന്റെ കൺസേൺ … അത് സത്യമായാൽ ഞാൻ കാരണം നശിക്കുന്നത് അവരുടെ ഭാവിയാണ് .. അതെനിക്ക് അംഗീകരിക്കാൻ കഴിയില്ല … സോ നിങ്ങളുടെ പൂർണ സമ്മതവും സഹായവും ഉണ്ടെങ്കിൽ ഞാനാ കത്തിന്റെ പിന്നാലെ ഒന്ന് പോയി നോക്കും … മറു വശത്ത് , അങ്ങനെ രണ്ട് വ്യക്തികൾ ഇല്ല എന്ന് തെളിഞ്ഞാൽ മറ്റൊന്നും എനിക്ക് പ്രശ്നമല്ല … സമ്മതമാണോ ….?” മയിയുടെ കണ്ണുകൾ നിഷിന്റെ കണ്ണിൽ തറഞ്ഞു നിന്നു …
അവൻ അൽപ നേരം മിണ്ടാതെയിരുന്നു …
” സമ്മതം …..” ഭക്ഷണം കഴിക്കുന്ന മയിയെ നോക്കി അവൻ പറഞ്ഞു ..
” ആലോചിച്ചു മതി … ഞാൻ ചോദിച്ചത് സമ്മതം മാത്രമല്ല … സഹായം കൂടിയാണ് ….” അവൾ ഓർമിപ്പിച്ചു …
” ഓർമയുണ്ട് …. ഇതിനു വേണ്ടി തനിക്ക് എന്നോട് എന്ത് വേണമെങ്കിലും ചോദിക്കാം .. തന്നെക്കാൾ കൂടുതൽ എന്റെ നിരപരാധിത്വം തെളിയിക്കേണ്ടത് എന്റെ ആവശ്യമാണ് … തനിക്കയച്ച കത്ത് ഒരു സൂചന മാത്രമായാണ് ഞാൻ കാണുന്നത് … നാളെ ചിലപ്പോ എനിക്ക് വേണ്ടപ്പെട്ട പലർക്കും ഇത് പോലെയൊരു കത്ത് അവർ അയച്ചേക്കും … എന്റെ കരിയർ തന്നെ സ്പോയിൽ ചെയ്യാൻ പറ്റുന്നത്ര ബ്ലാസ്റ്റിംഗ് എഫക്ട് ഉള്ള ബോംബ് ആണ് … ഒരു പക്ഷെ അങ്ങനെയൊരു സാഹചര്യം ഉണ്ടായാൽ താനെങ്കിലും എന്റെ കൂടെ ഉണ്ടാകുമല്ലൊ …”
” നിഷിൻ നിരപരാധിയാണെങ്കിൽ ഞാൻ കൂടെയുണ്ടാകും …. അല്ലെങ്കിൽ ഞാനാ സ്ത്രീയ്ക്കൊപ്പം നിൽക്കും …..”
” മതി … തന്റെ ഈ വാക്ക് മതി … ”
ഭക്ഷണം കഴിച്ച് കഴിഞ്ഞ് അവർ , വീട്ടിലേക്ക് തിരിച്ചു …
” ഈ ആദർശ് സത്യമൂർത്തി എന്ന ബിസിനസ് മാഗ്നറ്റുമായി നിഷിനെന്താ ബന്ധം …. ?” കാറിലിരുന്ന് മയി ചോദിച്ചു ..
” അന്വേഷണത്തിന്റെ ഭാഗമാണോ …? ”
” അല്ല … അറിയാനുള്ള കൗതുകം … ”
” ജേർണലിസ്റ്റിന്റെ കൗതുകം എനിക്ക് മനസിലാകും ….” അവൻ ചിരിച്ചു ..
” പറയാൻ ബുദ്ധിമുട്ടുണ്ടോ ….?”
” താൻ കരുതുന്ന പോലെ അവിശുദ്ധ ബന്ധമൊന്നുമല്ല .. അവന്റെ ബിസിനസിലൊന്നും എനിക്ക് യാതൊരു പങ്കുമില്ല … അവനെന്റെ ക്ലാസ്മേറ്റായിരുന്നു ….. യൂണിവേർസിറ്റി കോളേജിൽ ഞങ്ങളൊരേ ബാച്ചായിരുന്നു .. കോളേജിലെ ഫുഡ്ബോൾ ടീമിലും ഒരുമിച്ചുണ്ടായിരുന്നു .. അവന്റെ ഫാമിലി ചെന്നൈലാണ് … സോ അവന്റെ വീക്കെന്റുകൾ എന്റെ വീട്ടിലായിരുന്നു .. നാട്ടിൽ പോകുന്നത് ഓണം , ക്രിസ്തുമസ് വെക്കേഷന് മാത്രമായിരുന്നു .. ”
” ഓ …. അങ്ങനെ ….”
* * * * * * * * * * * * *
രാത്രി ….
നിഷിൻ ഫോണിൽ സംസാരിച്ചിരിക്കുമ്പോൾ മയി റൂമിൽ വന്നു .. യെല്ലോ സ്ലീവ്ലെസ് ബനിയനും ത്രീ ഫോർത്തുമായിരുന്നു അവളുടെ വേഷം …
അവൻ സംസാരിച്ചു കഴിയട്ടെ എന്ന് കരുതി , ഒരു ചെയർ വലിച്ചിട്ട് കാലിന്മേൽ കാൽ കയറ്റി വച്ച് മയി ഇരുന്നു …
അവൻ പെട്ടന്ന് തന്നെ കോൾ അവസാനിപ്പിച്ചു മയിയെ നോക്കി …
നീണ്ട സിൽക്ക് മുടിയിഴകൾ മയിയുടെ നെഞ്ചിലേക്ക് വീണു കിടപ്പുണ്ടായിരുന്നു .. ആ കാഴ്ച നിഷിനെ എവിടെയോ കൊണ്ടെത്തിച്ചു …
അവളുടെ വെളുത്ത കണംങ്കാലിലേക്കും , മാറിടത്തിലേക്കും ഇടറി വീണ കണ്ണുകളെ നിയന്ത്രിക്കാൻ അവൻ പാട് പെട്ടു …
” അന്വേഷണത്തിന്റെ ഭാഗമായി എനിക്ക് ചില ഡീറ്റെയിൽസ് വേണം … ” മയി മുഖവുരയില്ലാതെ പറഞ്ഞു ..
” എന്ത് ഡീറ്റെയിൽസ് ..?”
” നിഷിന്റെ കൂടെ കോളേജിലുണ്ടായിരുന്ന ഫ്രണ്ട്സിന്റെ മുഴുവൻ പേരും , അവരുടെ ഇപ്പോഴത്തെ ഐഡന്റിറ്റിയും .. ബോത്ത് മെയിൽ ആൻഡ് ഫീമെയിയിൽ ..fb ലോ ഇൻസ്റ്റയിലോ ഒക്കെ എല്ലാവരും ഉണ്ടാകും .. കിട്ടുന്ന എല്ലാവരുടേയും വേണം … ”
നിഷിന്റെ മുഖത്ത് ഒരു വല്ലായ്മയുണ്ടായി ..
” പേടിക്കണ്ട .. വല്ല ക്യാംപസ് ലവും ഉണ്ടായിരുന്നെങ്കിൽ , അതൊന്നും എനിക്ക് പ്രശ്നമല്ല … ഒന്നല്ല ഒരായിരം എണ്ണം ഉണ്ടായിരുന്നൂന്നറിഞ്ഞാലും ഐ ഡോണ്ട് കെയർ … ”
” തരാം … പക്ഷെ പെട്ടന്ന് പറഞ്ഞാൽ , സോഷ്യൽ മീഡിയയിലൊന്നും എല്ലാവരും ഇല്ല … ”
” ഉള്ളവരുടെ മതി ….”
” തരാം …. നാളെയോ മറ്റന്നാളോ …”
” നാളെ … നാളെ രാത്രിക്ക് മുന്നേ തരണം … ”
” ശരി ……”
” ദെൻ ഗുഡ് നൈറ്റ് ……”
” താനെവിടെയാ കിടക്കുന്നേ …. ”
” വാവേടെ റൂമിൽ … ഇന്നവളില്ലാത്തത് കൊണ്ട് ബോറടിക്കും …. സാരമില്ല … ” പറഞ്ഞിട്ട് അവൾ എഴുന്നേറ്റ് ഡോറിന് നേരെ നടന്നു ….
നിഷിൻ അവൾ പോകുന്നത് നോക്കിയിരുന്നു …തുടരും
കൊറോണ വൈറസിന്നും നിങ്ങൾ എത്രത്തോളം സുരക്ഷിതരാണെന്ന് ടെസ്റ്റ് ചെയ്യാൻ ഇവിടെ ക്ലിക്ക് ചെയ്യുക
Nb: നോവൽ ഇഷ്ടപ്പെടുന്നവരൊക്കെ ഒന്ന് ലൈക്ക് ചെയ്ത് പറ്റുന്നവർ ഷെയർ ചെയ്യണേ…
