നല്ല പാതി : ഭാഗം 12
നോവൽ
*******
എഴുത്തുകാരി: ധന്യ സുജിത്ത്‌
എ സോണ്‍ കലോത്സത്തിന് തിരി തെളിയാറായി..
ഞായറാഴ്ച മുതൽ വ്യാഴാഴ്ച വരെയാണ് മത്സരങ്ങള്‍. ഞായര്‍, തിങ്കള്‍ ദിവസങ്ങളില്‍ സ്റ്റേജിതര മത്സരങ്ങളും ചൊവ്വാഴ്ചമുതല്‍ വ്യാഴാഴ്ച വരെ സ്റ്റേജ് മത്സരങ്ങളും.. കലോത്സവം.. ക്യാമ്പസ്സിന് ലഹരിയാകുന്ന 5 ദിനങ്ങൾ.. എല്ലാവരും അതിന്റെ ഉത്സാഹത്തിലാണ്.. അവസാനവട്ട റിഹേഴ്സൽ പൊടി പൊടിയ്ക്കുന്നുണ്ട്.. നന്ദുവും കൂട്ടുകാരും കോർഡിനേഷൻ കമ്മിറ്റി അംഗങ്ങളായതിനാൽ തിരക്കിലാണ്…
ഞായറാഴ്ച രാവിലെ ഒന്‍പതു മുതല്‍ രജിസ്‌ട്രേഷന്‍ ആരംഭിക്കും. ഉച്ചയ്ക്ക് രണ്ടിന് സ്റ്റേജിതര മത്സരങ്ങളുടെ ഉദ്ഘാടനം.
ചൊവ്വാഴ്ച വൈകീട്ട് നാലിന് സ്റ്റേജ് മത്സരങ്ങളുടെ ഉദ്ഘാടനം.. നന്ദുവും പാറുവും സ്റ്റേജ് മത്സരങ്ങളുടെ കോർഡിനേറ്റർമാരായതിനാൽ ചൊവ്വാഴ്ച രാവിലെ ചിറ്റൂർ എത്തിയാൽ മതി.. ഉദ്ഘാടനദിവസം പോകണമെന്ന് ആഗ്രഹമുണ്ടായിരുന്നു നന്ദുവിന്..
അന്ന് അഭിയ്ക്ക് ചിത്രരചനാ മത്സരമുള്ളതിനാൽ ഉദ്ഘാടനത്തിന് ചെന്നാലും അഭിയെ കാണാൻ കിട്ടില്ല..
