ദ്രുവസായൂജ്യം: ഭാഗം 1
Jul 23, 2020, 21:46 IST
നോവൽ
എഴുത്തുകാരി: ആർദ്ര നവനീത്‌
ദേവീകീർത്തനം ശ്രുതിസാന്ദ്രമായി ഒഴുകിക്കൊണ്ടിരുന്നു.
മണിയൊച്ചയ്ക്കിടയിൽ ചൈതന്യത്തോടെ വിളങ്ങിനിൽക്കുന്ന ദേവിയിൽ മിഴികളർപ്പിച്ച് ഭക്തിയോടെ അവൾ പ്രസാദം ഏറ്റുവാങ്ങി.
ഇലച്ചീന്തിൽ നിന്നും ചന്ദനം മോതിരവിരലാൽ പനിനീരിൽ ചാലിച്ച് നെറ്റിയിൽ വരച്ചു. ചന്ദനത്തിന്റെ നേർത്ത തണുപ്പ് നെറ്റിയിൽ വ്യാപിച്ചു.
ഇരുകൈകളും ഹൃദയത്തോട് ചേർത്തുവച്ച് ദേവീമന്ത്രം ഉരുവിട്ടശേഷം അവൾ പുറത്തേക്കിറങ്ങി.
കൈത്തോടിന് സമീപത്തായി തഴച്ചുവളർന്നു കിടക്കുന്ന കൈതയിൽ നിന്നും കൈതപ്പൂക്കളുടെ മാസ്മരിക ഗന്ധം പരന്നൊഴുകുന്നുണ്ടായിരുന്നു.
