💔 മൊഴിയിടറാതെ 💔 : ഭാഗം 35

എഴുത്തുകാരി: തമസാ

“” എന്താ….??? “”” കേൾക്കാത്തത് പോലെ ഒരിക്കൽ കൂടി മോളോട് ചോദിച്ചു… “” നിനിലാണോ കുഞ്ഞാറ്റേടെ അച്ഛൻന്ന്….. ഈ അമ്മയ്ക്ക് ചെവി കേട്ടൂടെ……??…. “” കുഞ്ഞുനെറ്റി ചുളുക്കിപ്പിടിച്ചുകൊണ്ട് മോള് പിന്നെയും ചോദിച്ചു…. ഒരുവേള ഉത്തരമില്ലാതെ ഗീതു പകച്ചു പോയിരുന്നു……… കുഞ്ഞു ശബ്ദത്തിന് വളർച്ച വന്നത് പോലെ ഗീതുവിന്‌ തോന്നി….തൊണ്ടക്കുഴി ഒരിറ്റ് വെള്ളത്തിനായി കേഴുന്നത് പോലെ…. ഇത്രയും നേരം ചലിച്ചുകൊണ്ടിരുന്ന ഘടികാരം നിലച്ചത്പോലെ…..എന്ത്‌ പറഞ്ഞു കൊടുക്കും എന്നതിനപ്പുറം അവൾ പ്രതീക്ഷിക്കുന്ന മറുപടി കൊടുക്കുവാനാകില്ലല്ലോ എന്ന സങ്കടമായിരുന്നു ഗീതുവിന്‌….

എന്റെ കുഞ്ഞ് ഒരച്ഛനെ ആഗ്രഹിക്കുന്നുണ്ടോ?….. എന്റെ സ്നേഹം കുറഞ്ഞു പോയിട്ടാണോ?…. അതോ ആരെങ്കിലും അവളോട് ചോദിച്ചോ ഈ ചോദ്യം? ഗീതുവിന്റെ മനസ് എങ്ങും നിലയുറയ്ക്കാതെ പാറി.. “”” കുഞ്ഞാറ്റയെന്താ അങ്ങനെ ചോദിച്ചത്? “”” തന്റെ വയറിന് മീതെ കമിഴ്ന്നു കിടന്ന് തന്നേ സൂക്ഷിച്ചു നോക്കുന്ന കുഞ്ഞിന്റെ നെറുകയിൽ തലോടിക്കൊണ്ട് ഗീതു ചോദിച്ചു… “”” അമേയേടെ അച്ഛനാ അവളെ അംഗമ്പാടീൽ കൊണ്ട് വിടുന്നത്… നന്ദു ചോദിച്ചപ്പോ അമേയ പറഞ്ഞല്ലോ… ബൈക്കിൽ അവളെ മുമ്പിലിരുത്തൂലോ.. ന്നിട്ട് തിരിച്ചു പോവുമ്പോ അമേയയ്ക്ക് ഉമ്മ കൊടുക്കും.. ടാറ്റാ കൊടുക്കും…. “””

ഗീതുവിന്റെ മുഖത്തേയ്ക്ക് ചിരിയില്ലാത്തൊരു മുഖം നീട്ടിപ്പിടിച്ചുകൊണ്ട് കുഞ്ഞു പറഞ്ഞു… “” അതിന്….? “”” “”” നിനിലും അങ്ങനെയാലോമ്മേ…. ബൈക്കീന്ന് എറക്കണേന് മുമ്പ് മോൾക്ക് നെറച്ചുമ്മ തരും.. നല്ല കുട്ടിയായിരിക്കണംന്ന് പറയും… വണ്ടീൽ പോവുമ്പോ തലേല് ഉമ്മ തരും… അപ്പോ നിനിലല്ലേ മോൾടെ അച്ഛൻ… “”” മോളേ കെട്ടിപ്പിടിച്ചു കൊണ്ട് തന്നെ ഗീതു ചെരിഞ്ഞു കിടന്നു…… മാറിൽ അമർന്നു കിടക്കുന്ന മോളേ തലോടിക്കൊണ്ട് ഗീതു പറഞ്ഞു നിനിൽ അല്ലടാ മോന്റെ അച്ഛൻ എന്ന്…. കൊതിച്ചു കിട്ടിയ പലഹാരം ചേറിലേക്ക് വീഴുന്നത് കാണുന്ന കുട്ടിയേ പോലെ അവളുടെ ചുണ്ടും കണ്ണും ഒരുപോലെ വിതുമ്പി …..

“”” നിനിലല്ലേമ്മേ….. അതെന്നാ നിനിലല്ലാത്തെ..””” കുഞ്ഞു പീലിക്കണ്ണുകളിൽ കണ്ണുനീർ അടിഞ്ഞു കൂടുന്നത് കണ്ട് ഗീതുവിന്‌ ഹൃദയം പൊട്ടിപ്പോകുന്നത് പോലെ തോന്നി…… “”” നിനിൽ മോന്റെ മാമനല്ലേ ടാ…. ഗിരി മാമനെ പോലെ….. “”” മിഴിയിൽ നിന്ന് ഉരുണ്ട് വീണ തുള്ളിയെ തന്റെ തള്ളവിരൽ കൊണ്ട് തുടച്ചു നീക്കി ഗീതു പിന്നെയും മോളേ പൊതിഞ്ഞു പിടിച്ചു…. “” മോക്ക് ഒരു മാമൻ ഇല്ലേ…. അച്ഛനല്ലേ ഇല്ലാത്തെ?… “”” ഹൃദയത്തിൽ പുകഞ്ഞു കൊണ്ടിരുന്ന തീക്കട്ടകളെ ആ കുഞ്ഞിന്റെ നോവുന്ന വാക്കുകൾ ഊതിയൂതി ഒടുവിൽ കത്തിച്ചു….. “”” ഗിരിമാമൻ നമ്മടെ കൂടെയില്ലാലോ മോളേ..

അപ്പോ നമുക്ക് വേറെ മാമനെ വേണ്ടേ….. അതുകൊണ്ട് തമ്പായി നമുക്ക് തന്നതാ നിനിൽ മാമനെ ….. “”””” തന്റെ കണ്ണുനീർ ഒലിച്ചിറങ്ങാതിരിക്കാൻ കൃഷ്ണമണികൾ ചലിപ്പിച്ചുകൊണ്ട് അവൾ പറഞ്ഞു കൊടുത്തു മോൾക്ക്….. “””” അപ്പൊ മോൾടെ അച്ഛനെവിടെ പോയി….നന്ദൂട്ടി കണ്ടിട്ടില്ലല്ലോ…… “”” എണീറ്റിരുന്ന് കൊണ്ട് മോൾ ഗീതുവിനെ മിഴിച്ചു നോക്കി….. ഉത്തരം ഇല്ലാത്ത എത്രയെത്ര ചോദ്യങ്ങൾ…. ഈ കുഞ്ഞു പ്രായത്തിൽ ഞാൻ എന്ത് പറഞ്ഞു കൊടുക്കും എന്റെ കുഞ്ഞിന്…….. “”” നന്ദൂട്ടിയുടെ അച്ഛൻ മരി………. “”” പറയുവാൻ ഒരുങ്ങിയത് വിഴുങ്ങി ഗീതു…. ഇന്ന് മരിച്ചെന്ന് പറഞ്ഞാൽ അവൾക്ക് താങ്ങാവുന്നതിലും അപ്പുറം ആകും അത്…

ഇത്രയും ചോദ്യങ്ങൾ ആ കുഞ്ഞുനാവ് ചോദിക്കുന്നത് ചിലപ്പോൾ നാളെ കൂട്ടുകാരോട് അവളുടെ അച്ഛന്റെ സ്നേഹത്തേക്കുറിച്ച് വാ തോരാതെ പറയുവാൻ ആകും…..അവളുടെ കുഞ്ഞു മനസിന്റെ പ്രതീക്ഷങ്ങളെ നോവുകളായി മാറ്റാൻ അവളുടെ മനസ് അനുവദിച്ചില്ല….. “”” നന്ദൂട്ടിയുടെ അച്ഛൻ തമ്പായിയാ….. “”” മോളുടെ നെറുകിൽ മുത്തിക്കൊണ്ട് അവൾ പറഞ്ഞു… “”” അയ്യപ്പശാമി ആണോമ്മേ…..?? “”” “”” മ്മ്മ്മ് “”” “”” അപ്പൊ എല്ലാരുടേം അച്ഛൻ തമ്പായി ആണോ….? സംശയങ്ങൾ ഒടുങ്ങാതെ കുഞ്ഞാറ്റ പിന്നെയും തുടർന്നു… “”” കിടന്നുറങ്ങിക്കെ നന്ദൂ വെറുതെ അമ്മേ ദേഷ്യം പിടിപ്പിക്കാതെ…. ഓരോ കോസ്രക്കൊള്ളി ആയിട്ട് നടക്കുവാ പെണ്ണ്….. “””

മോളേ കെട്ടിപ്പിടിച്ചു കിടന്നുകൊണ്ട് ഗീതു വഴക്ക് പറഞ്ഞു……… പക്ഷേ തന്റെ മറുപടികളിൽ കുഞ്ഞു തൃപ്ത അല്ലെന്ന് ഇടയ്ക്കിടെ അവളുടെ കുഞ്ഞു വിരലുകൾ തന്റെ ശരീരത്തിൽ നുള്ളിപ്പറിക്കുമ്പോൾ മനസിലാകുന്നുണ്ടായിരുന്നു ഗീതുവിന്‌…. കാരണം അവൾക്കും ഉറക്കം നഷ്ട്ടപെട്ടു കഴിഞ്ഞിരുന്നു……. നിനിലിനെ കുഞ്ഞിൽ നിന്ന് മാറ്റി നിർത്തിയാലോ….!!! വേണ്ട…… അത് ഇപ്പോൾ ഉള്ള അവളുടെ വിഷമം കൂട്ടാൻ മാത്രമേ സഹായിക്കൂ…. ഞാൻ ഇനി എന്ത്‌ പറയും ഈശ്വരാ എന്റെ കുഞ്ഞിനോട്……..!!! തലയിണയിലേക്ക് മുഖം പൂഴ്ത്തി ശബ്ദം അടക്കിപ്പിടിച്ചു വിതുമ്പി, ഗീതു…..

ഇതാണോ ദീപൻ പറഞ്ഞത് മോള് ഒരിക്കൽ അച്ഛനെ ചോദിക്കുമെന്ന്… പക്ഷേ ഇതുപോലെ തിരിച്ചു മറുപടി കൊടുക്കുവാൻ പറ്റാത്ത പ്രായത്തിൽ മോള് ചോദിക്കുമെന്ന് കരുതിയില്ല…. ഈ കുഞ്ഞിനോട് താൻ എന്ത്‌ പറയും അമ്മയെ പീഡിപ്പിച്ചവൻ ആണ് അച്ഛൻ എന്നോ?…. ഇല്ല….. ഒരിക്കലും അങ്ങനെ പറയില്ല…. അച്ഛൻ ഇല്ലെന്ന് പറഞ്ഞാൽ പീഡിപ്പിച്ചവൻ ആണെന്ന് പറയുന്നതിനേക്കാൾ അന്തസ്സ് ഉണ്ടാകും…..ആ രാത്രി ഗീതുവിന്‌ സമാധാനമായി ഉറങ്ങാനേ കഴിഞ്ഞില്ല…. പിറ്റേന്ന് നേരം വെളുത്തപ്പോൾ തന്നെ മോൾക്ക് ആഗ്രഹം അമ്പലത്തിൽ പോകണമെന്ന്…..

ആദ്യം കാര്യം മനസിലായില്ല…. സമയം കിട്ടിയാൽ വൈകിട്ട് പോകാം എന്ന് പറഞ്ഞു സമാധാനിപ്പിച്ചൊരുക്കി….. പക്ഷേ നിനിലിനെ കണ്ട നിമിഷം ഗീതുവിന്റെ സമനില തെറ്റുന്ന അവസ്ഥ ആയി…… “”” നിനിലേ….. അയ്യപ്പശാമിയാ എന്റെ അച്ഛൻ….. “”” ഓടിച്ചെന്ന് നിനിലിന്റെ മടിയിലേക്ക് ചാടിയിരുന്നു മോളത് പറഞ്ഞപ്പോൾ ചുറ്റും നിന്ന എല്ലാവരും ഒന്ന് ഞെട്ടി… പക്ഷേ ഇനി ഒരു കണ്ണുനീർ തന്നിൽ നിന്ന് ഉതിരല്ലേ എന്ന് മോഹിച്ചു കൊണ്ട് കുഞ്ഞിനെ പാവ ബാഗുമായി തളർന്ന് നിന്നു ഗീതു…. “””” എന്നോട് ഇന്നലെ മുതൽ ചോദിക്കുന്നതാണ് ആരാ അച്ഛൻന്ന് … ഞാൻ എന്ത് പറയാനാ…… “””‘

മോളേ മടിയിലേക്ക് തന്നെ പിടിച്ചിരുത്തിക്കൊണ്ട് നിനിൽ പറഞ്ഞു….. നടയിലേക്ക് ബാഗു വെച്ചിട്ട് തോട്ടത്തിലേക്ക് ഒന്നും മിണ്ടാതെ തിരിച്ചു നടന്നു അവൾ….. തനിച്ചൊന്നിരിക്കണം….. ഒന്ന് പൊട്ടിക്കരയണം…….. ”” നന്ദൂട്ടി എന്താ അച്ഛനെ ചോദിച്ചത്? “”” ബൈക്കിൽ പോകുമ്പോൾ നിനിൽ കുഞ്ഞിനോട് ചോദിച്ചു… “”” അവിടെ വന്ന എല്ലാർക്കും അച്ഛനൊണ്ട് നിനിലേ…… കഥയൊക്കെ പറഞ്ഞു കൊടുക്കും…. മീമി പിടിക്കാൻ കൊണ്ടോവും…രാത്രി അച്ഛനെ കെട്ടിപ്പിടിച്ചാ ഒറങ്ങുന്നെ …. നന്ദു അമ്മേനെ കെട്ടിപ്പിടിച്ചല്ലേ ഒറങ്ങുന്നെ ….. “””” നിനിലിന്റെ നെഞ്ചിലേക്ക് ചാരിയിരുന്നു കുഞ്ഞത് പറഞ്ഞപ്പോൾ അവൻ്റെ നെഞ്ചിനു വ്യഥ കൊണ്ട് ഭാരമേറി …….

ഇങ്ങനെ എത്ര കുഞ്ഞുങ്ങൾ ഉണ്ടാകും, അച്ഛനെ കാണാൻ കൊതിക്കുന്നവർ? ദാനം പോലെ മക്കളേ നൽകി പോകുന്ന പുരുഷന്മാർ അറിയുന്നുണ്ടാകുമോ, ഇതുപോലെ നെഞ്ചുലച്ചുള്ള ചോദ്യങ്ങൾക്ക് മുന്നിൽ ഉത്തരമില്ലാതെ പകച്ചു നിൽക്കുന്ന പെണ്ണിന്റെ അവസ്ഥ……. കുഞ്ഞിനോട് പഠിച്ചു വലിയ ആളാകുമ്പോൾ അച്ഛൻ മോളേ കാണാൻ വരും എന്നെല്ലാം പറഞ്ഞു പഠിപ്പിക്കുമ്പോൾ നിനിൽ പ്രതീക്ഷയിൽ ആയിരുന്നു….. കുറച്ചു നാളത്തേക്കെങ്കിലും അവൾ അച്ഛനെ അന്വേഷിക്കില്ല എന്ന പ്രതീക്ഷ……… പക്ഷേ നിനിൽ പഠിപ്പിച്ച ഉത്തരം മറന്ന് പോകുമ്പോൾ നന്ദൂട്ടി ഇടയ്ക്കിടെ ആ ചോദ്യം ആവർത്തിക്കും……

കൂടെ ആരെങ്കിലും ഉണ്ടെങ്കിൽ ആ ചോദ്യം ഗീതുവിനെ അളവിൽ കവിഞ്ഞു നൊമ്പരപ്പെടുത്തുമായിരുന്നു……. ഇനിയൊരു വിവാഹം കഴിച്ചുകൂടെ? ശിക്ഷ കഴിഞ്ഞിറങ്ങുമ്പോൾ ദീപൻ വരും…. അവളെ തനിച്ചാക്കുവാൻ ദീപൻ തയ്യാറല്ല എന്ന് പലവട്ടം പറഞ്ഞിട്ടുള്ളതല്ലേ…. അതുകൊണ്ട് ഒരു വിവാഹത്തിന് പുറപ്പാട് അറിയിച്ചു കുര്യാച്ചന്റെ പച്ചക്കറി തോട്ടത്തിലെ നാവുകൾ…. ഗീതുവിനും കുഞ്ഞിനും വേണ്ടി ത്യാഗം ചെയ്ത പുണ്യവാളന് ഗീതുവിനെ പോലെ കന്യാചർമ്മം പൊട്ടിയവൾ ചേരില്ല എന്നുമെല്ലാം വാദങ്ങൾ മുഴങ്ങി….. വേണമെങ്കിൽ ദീപന് ദയ തോന്നി അവളെ കെട്ടാം എന്ന്……

അത് പറയുന്നത് സ്ത്രീജനങ്ങൾ ആണെന്നത് ആയിരുന്നു നിനിലിനെയും ഗീതുവിനെയും ഞെട്ടിച്ച വസ്തുത….. മടുത്തു തുടങ്ങിയിരുന്നു ഗീതുവിന്‌ …… ദീപനെ കൂട്ടണ്ട, മറ്റൊരു പുരുഷനെ വിവാഹം കഴിക്കുവാൻ താല്പര്യം ഉണ്ടോ എന്ന് നിനിൽ ചോദിച്ചപ്പോൾ അവളുടെ ഉത്തരം ഇല്ല എന്ന് തന്നെ ആയിരുന്നു….. ഒരു പുരുഷനൊപ്പം ജീവിക്കാൻ തനിക്ക് യോഗ്യത ഇല്ല എന്ന് തോന്നിയിട്ടല്ല താൻ ഈ തീരുമാനം എടുത്തത് എന്ന് അവൾ പറഞ്ഞപ്പോൾ കാരണം തേടി, നിനിൽ…. അവൾക്കൊപ്പം ജീവിക്കുവാൻ അർഹത ഉള്ളവർ കുറവാണെന്നു മനസിലാക്കുകയായിരുന്നു പിന്നെ അവൻ…….

കുര്യാച്ചൻ അനാവശ്യ ചർച്ചകൾ തോട്ടത്തിൽ നിരോധിച്ചിട്ടും പൊന്തി വരുന്ന അടക്കം പറച്ചിലുകൾ അവളുടെ സമനില തെറ്റിച്ചു തുടങ്ങിയ സമയത്താണ് ദൈവാനുഗ്രഹം പോലെ LDC റാങ്ക് ലിസ്റ്റിൽ അപ്പോയ്ന്റ്മെന്റ് തുടങ്ങിയതും അവൾക്ക് ലെറ്റർ കിട്ടിയതും…… പതിനഞ്ചു കിലോമീറ്റർ മാത്രം ദൂരത്തുള്ള പഞ്ചായത്തിലെ എൽ ഡി ക്ലർക്ക് ആയി അവൾ നിയമിതയായി…… എല്ലാ അവസരത്തിലും നിനിലും കുടുംബവും അവൾക്ക് ഒപ്പം തന്നേ നിന്നു….. മോളേ സ്കൂളിൽ ചേർത്തു…. അതിനിടയിൽ നിനിൽ ഫിസിക്കൽ ടെസ്റ്റ്‌ പാസ്സ് ആയി തൃശ്ശൂർ രാമപുരം പോലീസ് അക്കാഡമിയിൽ ട്രെയിനിങ്ന് ജോയിൻ ചെയ്തു….

അതോടെ മോളുടെ വരവ് ഗീതുവിനൊപ്പവും മടങ്ങി വരവ് കോളേജിൽ നിന്ന് വരുന്ന വഴി നീനയ്ക്കൊപ്പവും ആയി …… ആകെ മാറ്റമില്ലാത്തത് ഇടയ്ക്കിടെ ഉള്ള അച്ഛൻ ചോദ്യം മാത്രമാണ്…. നിനിലിനെ മാമൻ എന്ന് വിളിച്ചു തുടങ്ങി….. നിനിൽ, എന്ന വിളിയിൽ നിന്ന് മാമൻ പോസ്റ്റ്‌ ആയപ്പോൾ നിനി മാമൻ ആയി…… മോൾക്ക് നിനിൽ എന്ന് വെച്ചാൽ ജീവനാണ്……. അച്ഛൻ ഇല്ലാത്തതിന്റെ കുറവുകളെല്ലാം നിനിൽ ആണ് അറിഞ്ഞോ അറിയാതെയോ നികത്തുന്നത്……എന്നാലും ചോദിക്കും ഇടയ്ക്ക് അച്ഛൻ വരാറായോ എന്ന്……

രാവിലെ നീളത്തിൽ നീല വരകളുള്ള യൂണിഫോം ഷർട്ടും പാവാടയും ടൈയ്യും അരയിലെ ബെൽറ്റും രണ്ട് വശത്ത് ഉണ്ട ഉരുട്ടിക്കെട്ടി വെള്ള റിബ്ബൺ കെട്ടി സ്കൂളിൽ പോകുന്നത് കാണാൻ തന്നെ നല്ല ചന്തമാണ്…..രണ്ടാം ക്ലാസിൽ ആണ് മോളിപ്പോൾ…..പൊക്കം വെച്ചു എന്ന് അല്ലാതെ വലിയ മാറ്റമൊന്നുമില്ല കുഞ്ഞിന്….പാൽ പുഞ്ചിരി ഇപ്പോഴും മായാതെ അവിടെ തന്നെ ഉണ്ട്… നന്നായി പുരികം വളച്ചെഴുതി കൊടുക്കും ഗീതു….. പെൺകുഞ്ഞുങ്ങൾ ആയാൽ ഒരുപാട് ഒരുക്കാൻ ഉണ്ടാകും…. ആൺ കുഞ്ഞുങ്ങളുടെ മുടിയിലാണ് ആകെ കരവിരുത് തെളിയിക്കുവാൻ പറ്റുള്ളൂ…..

അന്ന് മോളെയും കൂട്ടി സ്‌കൂളിലേക്ക് പോകുന്ന വഴിയാണ് അയല്പക്കത്തെ വീട്ടിലേ അവളുടെ ക്ലാസിൽ പഠിക്കുന്ന കുട്ടിയേ അതിന്റെ അച്ഛൻ ബൈക്കിന്റെ മുന്നിലേക്ക് എടുത്ത് ഇരുത്തുന്നതും അമ്മയ്ക്ക് ഉമ്മ കൊടുത്ത് അച്ഛന്റെ നെഞ്ചിൽ ചാരി ഇരുന്ന് പോകുന്നതും നന്ദൂട്ടി കണ്ടത്….. ഗീതു അത് കണ്ടിട്ടും അവഗണിച്ചു നടന്നപ്പോൾ ആണ് എന്റെ അച്ഛൻ മാത്രം എന്താ ഇതുവരെ വരാത്തതെന്ന് ചോദിച്ചു നന്ദൂട്ടി കയ്യിൽ പിടിച്ചു വലി തുടങ്ങിയത്…..സ്‌കൂളിലേക്ക് പോകാതെ പുറകോട്ട് തിരിഞ്ഞു നടന്ന മോളേ ഒപ്പം നടത്താൻ ഗീതുവിന്‌ ഒരു കൊച്ചു കള്ളം പറയേണ്ടി വന്നു…. അടുത്ത ആഴ്ച അച്ഛൻ വരുമെന്ന്…….ഒരു കുഞ്ഞു കള്ളം ആ ആറു വയസ്സുകാരിയിൽ കൊടുത്തത് ഒരുപാട് മോഹങ്ങൾ ആയിരുന്നു….. അച്ഛനെ ആഗ്രഹിക്കുന്ന ഒരു കുഞ്ഞിന്റെ മനസിനെ പറഞ്ഞു പറ്റിച്ചു കഴിഞ്ഞപ്പോൾ നീറിപ്പുകഞ്ഞു അവൾ... © തമസാ ലക്ഷ്മി ….

മൊഴിയിടറാതെ : ഭാഗം 34