💟 സങ്കീർത്തനം 💟: ഭാഗം 39

രചന: കാർത്തിക

 സംഗീത് ഹാളിലേക്ക് കയറി അവിടെയാകെ ഇരുട്ടായിരുന്നു. പെട്ടെന്ന് എന്തൊ പൊട്ടിയ ശബ്ദം കേട്ടു ഒന്നു ഞെട്ടി, "അച്ഛാ.... അമ്മാ..." എന്നുറക്കെയവൻ വിളിച്ചു. പെട്ടെന്ന് അവിടെ ലൈറ്റ്സ് എല്ലാം ഓണായി. അവൻ നോക്കുമ്പോൾ അവിടെ കീർത്തിയുടെ വീട്ടുകാർ ഉൾപ്പെടെ ഏല്ലാവരും ഉണ്ടായിരുന്നു, ഇതൊക്കെ ആരുടെ പ്ലാൻ ആണെന്ന് അറിയാൻ വേണ്ടി സംഗീത് ഹരിയേയും കാശിയേയും ഒന്നു നോക്കി... അവന്റെ നോട്ടത്തിന്റെ അർത്ഥം മനസ്സിലാക്കിയെന്നോണം ഹരി പറഞ്ഞു ''നീ ഞങ്ങളെ നോക്കേണ്ടാ ഇതെല്ലാം നിന്റെ കെട്ടിയോളുടെ പ്ലാനാ... നിനക്കൊരു സർപ്രൈസ് തരാനായിട്ട്.... ഇന്നലെ രാത്രിയിലാ ഇങ്ങനെയൊരു പാർട്ടിയുടെ കാര്യം അവൾ ഞങ്ങളെ വിളിച്ച് പറഞ്ഞത്...." "എന്തായാലും ഇത് വല്ലാത്തൊരു പ്ലാനായിപ്പോയി.... " നിനക്കുള്ളത് ഞാൻ തരാമെന്നുള്ള ഭാവത്തിൽ കീർത്തിയെ നോക്കി സംഗീത് പറഞ്ഞു. ''സംസാരിച്ച് സമയം പാഴാക്കാതെ നിങ്ങൾ ചെന്ന് ഫ്രഷായി വന്നേ മക്കളേ.... " കീർത്തിയുടെ അച്ഛൻ അവരോടായി പറഞ്ഞു. "ആഹ്... ഞങ്ങൾ ഇപ്പോൾ വരാം.... "

അവരോടായി പറഞ്ഞു കൊണ്ട് ഇരുവരും റൂമിലേക്ക് പോയി. റൂമിലെത്തിയപാടെ സംഗീത് കീർത്തിയുടെ കൈകളിൽ പിടിച്ച് അവനിലേക്കടുപ്പിച്ചു. " അപ്പോൾ ഇവിടെ ഇങ്ങനെയൊരു സർപ്രൈസ് ഒരുക്കാനായിട്ടാണ് അല്ലേ നീയെന്നെ ഷോപ്പിങ്ങെന്നും പറഞ്ഞ് ടൗൺ മുഴുവൻ ചുറ്റിച്ചത്...." അതിന് മറുപടിയായി അവൾ നന്നായി ഒന്നു ചിരിച്ചു കാണിച്ചു "ഇത്രയും ഗംഭീരമായൊരു സർപ്രൈസ് എനിക്ക് തന്നതിന് പകരം എന്റെ ചിന്നൂട്ടിക്ക് ഞാനെന്തെങ്കിലും തരണ്ടേ..." സംഗീത് അവളെ ഒന്നൂ കൂടി തന്നിലേക്ക് ചേർത്തു പിടിച്ചു ''വേ .... വേണ്ട.... " വിക്കലോടെ അവൾ പറഞ്ഞു. "വേണം ചിന്നൂ.... " അതും പറഞ്ഞവൻ അവളുടെ ചെവിയ്ക്കരികിലായി ചുണ്ടുകൾ ചേർത്തു. അവളുടെ കൈകൾ അവന്റെ ഷർട്ടിലായി പിടിമുറുക്കി. അവന്റെ കൈകൾ ഒന്നുകൂടി അവളുടെ ഇടുപ്പിലമർന്നു. മിഴികളിൽ ഒരു പിടച്ചിലോടെ അവൾ സംഗീതിനെ നോക്കി, പക്ഷേ അവന്റെ മിഴികൾ അവളുടെ വിറക്കുന്ന അധരങ്ങളിലായിരുന്നു.. അതുകാൺകേ അവളുടെ കവിളിണകൾ ചുവന്നു...

കൊതിയോടെ അവളുടെ ചുണ്ടുകളിലേക്ക് അവൻ ചുണ്ടുള്ളമർത്തിയപ്പോൾ ആ സ്നേഹചുംബനം ഏറ്റു വാങ്ങാനെന്ന പോലെ അവളുടെ മിഴികൾ കുമ്പിയടഞ്ഞു. ഇരുവരും ശ്വാസമെടുക്കാൻ ബുദ്ധിമുട്ടിയപ്പോഴാണ് പരസ്പരം അകന്നു മാറിയത്, കീർത്തി സംഗീതിന്റെ മുഖത്തേക്ക് നോക്കാനാവാതെ നാണത്തോടെ തല കുനിച്ചു. തന്റെ കൈകുമ്പിളിൽ അവളുടെ മുഖത്തെ കോരിയെടുത്തു മൂർദ്ധാവിൽ ഉമ്മവച്ചു കൊണ്ട് അവൻ മൃദുവായി അവളെ വിളിച്ചു.. "ചിന്നൂ..... ഇപ്പോൾ മാത്രമല്ല ഇനിയുള്ള എന്റെ എല്ലാ ജൻമങ്ങളിലും എന്റെ പാതിയായി എനിക്ക് നീ മതി...." " എനിക്കും... എന്റെ ഏട്ടനെ മതി ഏട്ടനെ മാത്രം....." അതും പറഞ്ഞു ഒരു കുറുകലോടെ അവന്റെ നെഞ്ചിലേക്ക് മുഖമമർത്തി അവൾ. ''അതെ ഇങ്ങനെ നിന്നാൽ മതിയോ... അവിടെല്ലാവരും നമ്മളേയും വെയ്റ്റ് ചെയ്താ ഇരിക്കുന്നത്... അതു കൊണ്ട് നല്ല കുട്ടിയായിട്ട് ചെന്ന് പെട്ടെന്ന് ഫ്രഷായിട്ട് വന്നേ നമുക്ക് അങ്ങോട്ട് പോകാം...." രണ്ടു പേരും റെഡിയായി താഴേക്ക് ചെന്നു... സംഗീത് കേക്ക് മുറിച്ചു, ആദ്യം അച്ഛൻ അവന് മധുരം നൽകി..

അതിനു ശേഷം എല്ലാവരും കൈയ്യിൽ കരുതിയിരുന്ന ഗിഫ്റ്റ് സംഗീതിന് നൽകി. ഭക്ഷണം എല്ലാം കഴിഞ്ഞതിനു ശേഷമാണ് എല്ലാവരും യാത്ര പറഞ്ഞ് പിരിഞ്ഞത്... സംഗീതിന്റെ അച്ഛനും അമ്മയ്ക്കും ഒത്തിരി സന്തോഷമായിരുന്നു.. ഋതു പോയതിനു ശേഷം ആദ്യമായിട്ടായിരുന്നു ഇങ്ങനെ ഒരു ആഘോഷം, കീർത്തിയെ കണ്ടുമുട്ടിയതിന് ശേഷമാണ് തങ്ങളുടെ മകൻ പഴയ ജീവിതത്തിലേക്ക് തിരികെ വന്നത് എന്നത് ആ മാതാപിതാക്കളിൽ കീർത്തിയോടുള്ള സ്നേഹവും വാൽസല്യവും ഒന്നൂടെ കൂട്ടി. രാത്രിയിൽ കീർത്തി റൂമിലേക്ക് ചെല്ലുമ്പോൾ സംഗീത് ബാൽക്കണിയിലായിരുന്നു. "എന്താ.. ഏട്ടാ ഒരു ആലോചന...'' "ഏയ് ഒന്നൂല്ലടോ.... അതൊക്കെ പോട്ടെ എവിടെ എനിക്കുള്ള ബർത്ത് ഡേ ഗിഫ്റ്റ്..... " " എന്റെ ഗിഫ്റ്റ് ഞാൻ ഉച്ചയ്ക്ക് തന്നതല്ലേ.... അതല്ലേ ഏട്ടന്റെ കൈയ്യിൽ കിടക്കുന്നത്....'' കീർത്തി ഒരു സംശയത്തോടെ ചോദിച്ചു. "എനിക്ക് അതു പോരാ... അതിനേക്കാൾ മൂല്യമുള്ള ഒന്നില്ലേ... എന്നോടുള്ള നിന്റെ പ്രണയം... അതെനിക്ക് വേണം....

ഞാനെന്റെ പ്രാണനോട് ചേർത്ത എന്റെ പ്രണയത്തെ സ്വന്തമാക്കണമെനിക്കിന്ന്.... ചിന്നൂ.... എന്റെതാക്കിക്കോട്ടേ പെണ്ണേ നിന്നെ ഞാൻ... ഇനിയും എനിക്ക് പറ്റില്ലെടി.... നിനക്ക് സമ്മതമാണോ ടീ...." അവളെ ഇറുകെ പുണർന്നു കവിളിൽ ഉമ്മ വച്ച് അവൻ ചോദിച്ചു. അവന്റെ ഓരോ വാക്കും അവളെ പുളകം കൊള്ളിച്ചു... അവൾക്കും സമ്മതമായിരുന്നു അവന്റേതായി മാറാൻ അതവനെ അറിയിക്കാനെന്ന പോലെ അവളും അവനെ തിരികെ കെട്ടിപ്പിടിച്ചു. തന്റെ പാതിയുടെ സമ്മതം കിട്ടിയ സന്തോഷത്തിൽ അവൻ അവളുടെ ചുണ്ടുകൾ നുകർന്നൂ ആർത്തിയോടെ, ഒപ്പം അവന്റെ കൈകൾ സാരിയുടെ വിടവിലൂടെ അവളുടെ നഗ്നമായ വയറിൽ കുസൃതി കാട്ടി തുടങ്ങിയിരുന്നു... അവളെ ഇരു കൈകൾ കൊണ്ടും കോരിയെടുത്ത് അവൻ റൂമിലേക്ക് പോയി... ആ രാവിനെ സാക്ഷിയാക്കി അവളിൽ നോവുണർത്തി കൊണ്ട് സംഗീത് തന്റെ പ്രണയത്തെ സ്വന്തമാക്കി.. തന്റെ പ്രാണനാഥന് തനിക്കുള്ളതെല്ലാം സമർപ്പിച്ച നിർവൃതിയിലായിരുന്നു കീർത്തി....... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...