💞ഹൃദയത്തിൽ ഒരിടം💞: ഭാഗം 17

എഴുത്തുകാരി: മിന്നു 

പോലീസ് സ്റ്റേഷനിൽ പരാതി കൊടുത്ത് തിരിച്ചു ഇറങ്ങുമ്പോഴാണ് അച്ഛൻറെ ഫോണിലേക്ക് ഒരു കോൾ വന്നത്. മാളുവിനെ കുറിച്ചുള്ള എന്തെങ്കിലും വിവരം ആണെന്ന ആവേശത്തിൽ ഫോൺ എടുത്ത അച്ഛൻറെ മുഖം സങ്കടത്തിലേക്ക് മാറുന്നത് ആദി ശ്രദ്ധിച്ചു. "എന്തുപറ്റി അച്ഛാ .....ആരാ വിളിച്ചത്... എന്താ പറഞ്ഞത്...... മാളുവിനെ പറ്റി എന്തെങ്കിലും വിവരമാണോ????" " ഇനി മാളുവിന് അന്വേഷിക്കേണ്ട മോനെ...... അവൾ പോയി .....😖" "പോയോ ????എങ്ങോട്ട് ????അച്ഛൻ എന്തൊക്കെയാ പറയുന്നേ??????" " അതേ മോനേ.....എൻറെ ഒരു സുഹൃത്താണ് വിളിച്ചത്. മാളുവിൻറെ രജിസ്റ്റർ മാരേജ് കഴിഞ്ഞത്രേ....... രണ്ടാഴ്ച മുമ്പ് എന്നെ ഒരു ചെറുപ്പക്കാരൻ കാണാൻ വന്നിരുന്നു. അവന് മാളുവിന് ഇഷ്ടമാണെന്ന് പറഞ്ഞു.

കുടുംബക്കാർ ആരുമില്ലാത്ത ഒരു അനാഥനാണ് എന്ന് പറഞ്ഞപ്പോൾ ഞാൻ സമ്മതിച്ചില്ല.... എന്നാൽ എൻറെ മകൾ എന്നെ തോൽപ്പിച്ചു.... അവൾ അവൻറെ കൂടെ ഇറങ്ങി പോവുമെന്ന് ഞാൻ ഒരിക്കലും പ്രതീക്ഷിച്ചില്ല..... 😭" സ്റ്റേഷനിൽ നിന്നും കൊടുത്ത പരാതി തിരിച്ചു വാങ്ങി, ആദിയുടെ ഒപ്പം ഇറങ്ങുമ്പോൾ അച്ഛൻറെ കണ്ണുകൾ കലങ്ങിയിരുന്നു. വീട്ടിലേക്കുള്ള വഴിയിൽ ആദിയുടെ പിറകിലിരുന്ന് സമനിലതെറ്റിയ ആളെ പോലെ അച്ഛൻ എന്തൊക്കെയോ പറയുന്നുണ്ടായിരുന്നു. " ദൈവം തന്ന ശിക്ഷയാ....... ആദ്യമായി അച്ഛാ എന്ന് വിളിച്ച ദേവുവിനെ സ്വന്തം മക്കൾ ഉണ്ടായപ്പോൾ അകറ്റി നിർത്തിയത് ഉള്ള ശിക്ഷ...

ദേവുവിനെ കൂടി സ്നേഹിച്ചാൽ എൻറെ സ്നേഹവും സമ്പത്തും പങ്കിട്ടു പോകുമെന്ന് ഞാൻ കരുതി. എൻറെ സ്വാർഥത കാരണം ഞാൻ എപ്പോഴും അവളെ അകറ്റി നിർത്തി. എന്നിട്ടെന്താ ജന്മം കൊടുത്ത് വളർത്തി വലുതാക്കിയ സ്വന്തം മകൾ തന്നെ ഉപേക്ഷിച്ച് പോയില്ലേ... ഒരു പെൺകുഞ്ഞ് ജനിച്ചതുമുതൽ ഓരോ അച്ഛനും കാണുന്ന സ്വപ്നം ആണ് അവളുടെ വിവാഹം. വളർത്തിയിട്ട് മാത്രം കാര്യമില്ല കൈ പിടിച്ചു കൊടുക്കാൻ ഉള്ള യോഗം കൂടി വേണം. എനിക്കത് ഇല്ലാതെപോയി. കർമഫലം അല്ലാതെന്തുപറയാൻ.... ഒരു തെറ്റും ചെയ്യാത്ത ദേവുവിനെ ശിക്ഷിച്ചതിന് ദൈവം തന്നതാ ഇത്..." അച്ഛൻറെ ഓരോ വാക്കുകളും ആദിയെ വല്ലാതെ നോവിച്ചു. തൻറെ വീട്ടിലും വളർന്നുവരുന്നുണ്ട് ഒരു പെൺകുഞ്ഞ്. അനിയത്തി ആണെങ്കിലും മകളെപ്പോലെയാണ് ഞാൻ അവളെ വളർത്തുന്നത്.

നാളെ ചിന്നു എന്നോട് ചെയ്താൽ ഇങ്ങനെ ചെയ്താൽ......... അതോർക്കാൻ കൂടി ആദിക്ക് കഴിഞ്ഞില്ല. അച്ഛനെ തിരിച്ചു വീട്ടിൽ കൊണ്ടുചെന്നാക്കുമ്പോൾ ഉമ്മറത്ത് തന്നെ അമ്മ കാത്തുനിൽപ്പുണ്ടായിരുന്നു. എല്ലാം നഷ്ടപ്പെട്ടവനെ പോലെ കരഞ്ഞുകലങ്ങിയ കണ്ണും തകർന്ന മനസ്സുമായി അച്ഛൻ ചാരുകസേരയിലേക്ക് ഇരുന്നു. " എന്താ ബാലേട്ടാ നമ്മുടെ മോൾക്ക് എന്താ പറ്റിയത്?????? എന്താ മുഖത്ത് ആകെ സങ്കടം??? എന്താ പറ്റിയത് പറ..." അച്ഛൻ ഒരു മറുപടിയും പറഞ്ഞില്ല. അത് കണ്ട് അമ്മ ആദിയുടെ അടുത്തേക്ക് വന്നു. "എന്താ മോനേ ഉണ്ടായത് പറ..... മാളുവിനെ കുറിച്ച് എന്തെങ്കിലും വിവരം അറിഞ്ഞോ....."

" അത് അമ്മേ ........ മാളുവിൻറെ രജിസ്റ്റർ മാരേജ് കഴിഞ്ഞു. അവൾ ഏതോ ചെറുപ്പക്കാരനുമായി ഇഷ്ടത്തിൽ ആയിരുന്നത്രേ....." "അയ്യോ എൻറെ ദൈവമേ.... ഞാൻ എന്താ ഈ കേൾക്കുന്നത്..... എന്നാലും എൻറെ മോളെ ഞങ്ങളോട് ഈ ചതി വേണ്ടായിരുന്നു...." അമ്മ അലമുറയിട്ടു കരച്ചിൽ ആരംഭിച്ചു. അയൽപക്കത്തുള്ള കുറച്ച് ആളുകൾ നേരത്തെതന്നെ അവിടെ കൂടി നിൽക്കുന്നുണ്ടായിരുന്നു. അമ്മയുടെ കരച്ചിൽ കേട്ടതോടെ അവിടെ എല്ലാവരും പിറുപിറുക്കാൻ തുടങ്ങി. അപ്പോഴേക്കും മാളുവിനെ അന്വേഷിച്ചുപോയ പോയ കണ്ണനും സുഹൃത്തുക്കളും തിരിച്ചു വന്നു. "അമ്മേ ചേച്ചി ഏതോ ഒരുത്തൻറെ കൂടെ പോയി ...."

കണ്ണന്റെ വാക്കുകൾ കേട്ടപ്പോൾ അമ്മയുടെ കരച്ചിൽ ഒന്നുകൂടി ഉച്ചത്തിലായി. ഒരുവിധം കൂടി നിന്ന ആൾക്കാരെ പറഞ്ഞയച്ച് അമ്മയെയും സമാധാനിപ്പിച്ചിട്ടാണ് ആദി അവിടെ നിന്നും ഇറങ്ങിയത്. തകർന്നിരിക്കുന്ന അച്ഛനെ എന്ത് പറഞ്ഞ് ആശ്വസിപ്പിക്കണം എന്ന് അവന് അറിയില്ലായിരുന്നു. വീട്ടിൽ തിരിച്ചെത്തിയിട്ടും കരഞ്ഞിരിക്കുന്ന അമ്മയെക്കാൾ ആദിയെ വേദനിപ്പിച്ചത് ഒന്നും മിണ്ടാതെ പുറത്തേക്ക് കണ്ണും നട്ടിരുന്നു അച്ഛൻ രൂപമാണ്. ആദിയുടെ മുഖം മാറിയിരിക്കുന്നത് കണ്ടപ്പോൾ തന്നെ ദേവു കാര്യം അന്വേഷിച്ചു. എന്നാൽ ഇപ്പോൾ എന്തെങ്കിലും അവളോട് പറഞ്ഞാൽ വീട്ടിൽ പോകണം എന്ന് അവൾ വാശി പിടിക്കുമെന്ന് അറിയാവുന്നതുകൊണ്ട് "

ഒന്നും ഇല്ലെന്നു പറഞ്ഞ് ആദി ഒഴിഞ്ഞുമാറി. ദേവു അടുക്കളയിൽ ആയിരുന്നു സമയം ആദി എല്ലാകാര്യങ്ങളും അവൻറെ അച്ഛനോട് പറഞ്ഞു നാളെ ദേവുവിനെ യും കൂട്ടി അവിടം വരെ ഒന്ന് ചെല്ലാൻ അച്ഛനും പറഞ്ഞു. രാത്രിയിൽ കിടക്കുമ്പോഴും ആദിക്ക് വല്ലാത്ത സങ്കടമായിരുന്നു . " ആദിയേട്ടൻ എന്നോട് എന്തോ മറച്ചുവയ്ക്കുന്നുണ്ടല്ലോ.... എന്താണെന്ന് ഞാൻ ചോദിക്കുന്നില്ല... പറയാൻ സമയമാകുമ്പോൾ ആദിയേട്ടൻ തന്നെ പറഞ്ഞാൽ മതി" അവൻറെ മുടിയിൽ തലോടിക്കൊണ്ട് ദേവു അത്രയും പറഞ്ഞപ്പോൾ അവന് ഒരു ആശ്വാസം തോന്നി. പിറ്റേന്ന് രാവിലെ ദേവുവിനോട് പെട്ടെന്ന് റെഡി ആവാൻ പറഞ്ഞു. ചിന്നുവിനെ ഒരുക്കാൻ നോക്കിയപ്പോൾ ആദി പറഞ്ഞു

" വേണ്ട നമ്മൾ രണ്ട് പേർക്കും പോയിട്ട് വരാം" അച്ഛനും അങ്ങനെ പറഞ്ഞപ്പോൾ എന്തോ കാര്യമുണ്ടെന്ന് ദേവുവിന് മനസ്സിലായി. വേഗം ഒരുങ്ങി ഇറങ്ങി ആദിയോടൊപ്പം ഇറങ്ങുമ്പോൾ അത് തൻറെ വീട്ടിലേക്കുള്ള യാത്രയാണെന്ന് ദേവു പ്രതീക്ഷിച്ചില്ല.വീടിനടുത്തുള്ള വഴിയിൽ എത്തിയപ്പോൾ തന്നെ ദേവുവിന് സംശയം തോന്നി. " നമ്മൾ എങ്ങോട്ടാ പോകുന്നത് ആദിയേട്ടാ...." ആദി ഒരു മറുപടിയും പറഞ്ഞില്ല ആദിയുടെ മൗനവും ഇന്നലത്തെ മുഖഭാവവും ഓർത്തപ്പോൾ ദേവുവിന് ടെൻഷനായി. അച്ഛനോ അമ്മയ്ക്കോ എന്തെങ്കിലും ആപത്ത് സംഭവിച്ചിരിക്കുമോ എന്ന് അവൾ പേടിച്ചു.

വീട്ടുമുറ്റത്ത് എത്തിയപ്പോൾ വരാന്തയിലെ ചാരുകസേരയിൽ അച്ഛൻ ഇരിക്കുന്നത് കണ്ടപ്പോഴാണ് ദേവുവിന് സമാധാനമായത്. ഒരു നെടുവീർപ്പോടെ അച്ഛനെ നോക്കി നിൽക്കുമ്പോഴാണ് ആദി മാളുവിൻറ കാര്യം ദേവുവിനോട് പറഞ്ഞത്. അവൾക്ക് അത് വിശ്വസിക്കാൻ കഴിഞ്ഞില്ല. എല്ലാ കാര്യങ്ങളും മാളു തന്നോട് ഷെയർ ചെയ്തിരുന്നതാണ് താൻ പോയതിനുശേഷം മാളുവിന്റെ കാര്യങ്ങൾ ഒന്നും അറിഞില്ല അതായിരിക്കും അവൾ ഇങ്ങനെ ഒരു തെറ്റായ തീരുമാനം എടുത്തത്. അപ്പോഴാണ് അച്ഛൻ ദേവുവിനെ കണ്ടത്. " മോളെ........" ന്നുള്ള ആ വിളിയിൽ എല്ലാം മറന്ന് അവൾ അയാളുടെ അടുത്തേക്ക് ഓടി. "എന്താ അച്ഛാ നമ്മുടെ മാളുവിന് പറ്റിയത്,

അവൾ ഇങ്ങനെ ഒന്നും ആയിരുന്നില്ലലോ???" "മോളോട് അച്ഛൻ തെറ്റ് ചെയ്തതിന് ദൈവം തന്ന ശിക്ഷയാണ്. അതാ നമ്മുടെ മാളുവിന് ഇങ്ങനെയൊക്കെ തോന്നിയത്. മോള് എന്നോട് ക്ഷമിക്കണം ,നിന്നോട് ദേഷ്യം ഉണ്ടായിട്ടല്ല അച്ഛൻ എപ്പോഴും ഞാൻ നിന്നെ അകറ്റിയത് . നിന്നെ ഒഴിവാക്കിയാൽ അതുകൂടി എൻറെ മാളുവിന് നൽകാമെന്ന് ഞാൻ കരുതി. അവളെ കുറിച്ചുള്ള എന്റെ സ്വപ്നങ്ങൾ ആണ് മോളേ തകർന്നത്. മോള് അച്ഛനോട് ക്ഷമിക്കണം ......" " അച്ഛൻ വിഷമിക്കണ്ട എവിടെയായിരുന്നാലും നമ്മുടെ മാളു സുഖമായി ഇരുന്നാൽ മതി. അച്ഛൻ അതോർത്ത് സങ്കടപ്പെടേണ്ട അച്ഛന് എന്നും ഞാനുണ്ട്. ദേവുവിനെ ഇതുവരെ മാറ്റിനിർത്തിയതിന് അയാൾ അയാളെ തന്നെ ആ നിമിഷം ശപിച്ചു. വർഷങ്ങളായി തനിക്ക് ലഭിക്കാതെ പോയ സ്നേഹം അച്ഛൻറെ അടുത്തു നിന്നും തിരിച്ചു കിട്ടിയത സന്തോഷത്തിലായിരുന്നു ദേവു.

കുറച്ചു ദിവസം കഴിഞ്ഞ് ദേവുവിന് മാളുവിന്റെ ഫോൺ വന്നു. എല്ലാവരോടും ക്ഷമ ചോദിച്ചു കൊണ്ട് അവൾ കരഞ്ഞപ്പോൾ ഒരു ചേച്ചി എന്ന നിലയിൽ ദേവൂന് ക്ഷമിക്കാൻ കഴിഞ്ഞു. എന്നാൽ അച്ഛനോടും അമ്മയോടും ക്ഷമ പറയുന്നതിന്റെ ആവശ്യകതയും അവർ നിന്നെ എത്ര മാത്രം സ്നേഹിച്ചിരുന്നു എന്നെല്ലാം ദേവു അവളെ പറഞ്ഞു മനസ്സിലാക്കി. സ്വന്തം പ്രണയത്തിന് മുന്നിൽ വളർത്തി വലുതാക്കിയ അച്ഛനെയും അമ്മയെയും മറന്നത് തെറ്റാണെന്ന് മാളുവിന് ബോധ്യമായി. അച്ഛനോട് അമ്മയോടും ക്ഷമ ചോദിക്കാൻ വരുമെന്ന് ഉറപ്പ് നൽകിയാണ് മാളു ഫോൺ വച്ചത്. അത് കേട്ടപ്പോൾ ദേവുവിനും സമാധാനമായി. മാളു തന്റെ പുതിയ ജീവിതത്തിൽ ഒരുപാട് സന്തോഷത്തിലാണ് എന്നാൽ ആദിയേട്ടൻ പണ്ട് പറഞ്ഞത് പോലെ ആ സന്തോഷം പൂർണ്ണമാകണമെങ്കിൽ അച്ഛന്റെയും അമ്മയുടെയും അനുഗ്രഹം കൂടി ഉണ്ടായിരിക്കണം എന്ന് ദേവൂന് മനസ്സിലായി.

വീണ്ടും സന്തോഷത്തിന്റെ ദിനങ്ങൾ. ഇതിനിടയിൽ സുമേച്ചി പ്രസവിച്ചു. ഒരു സുന്ദരൻ ഉണ്ണികുട്ടൻ. കിച്ചുവിന്റെ കല്യാണം ഉള്ളത് കൊണ്ട് പത്ത് ദിവസത്തെ ലീവിന് വന്ന് നിഖിലേട്ടൻ തിരിച്ചു പോയി. ഇനി സുമേച്ചിയും ഉണ്ണികുട്ടനും വന്നിട്ട് വേണം കിച്ചുവിന്റെയും ഹിമയുടെയും മിഥുവിന്റെയും നീലിമയുടെയും കല്യാണം നടത്താൻ നാളെയാണ് സുമ ചേച്ചിയെയും ഉണ്ണികുട്ടനെയും കൂട്ടി കൊണ്ട് വരുന്നത്. ഒരാഴ്ച കഴിഞ്ഞാൽ കിച്ചുവിന്റെ കല്യാണമാണ്. ഇന്ന് നിഖിൽ ഏട്ടൻ ഗൾഫിൽ നിന്നും എത്തി. നാളെ ചേച്ചിയുടെ വീട്ടിൽ പോകാനുള്ള ഒരുക്കത്തിലാണ് എല്ലാവരും. രാത്രി ഗൾഫിൽ നിന്ന് വന്ന നിഖിലേട്ടന്റെ പെട്ടി പൊട്ടിക്കൽ ആഘോഷമായിരുന്നു.

ഓരോരുത്തർക്കും കൊണ്ടുവന്ന സാധനങ്ങൾ ചേട്ടൻ വീതിച്ചു നൽകി. അങ്ങനെ ദേവുവിന് ഒരു സാരിയും ചിന്നുവിന് കൈ നിറയെ ചോക്ലേറ്റ്സും കിട്ടി. അപ്പോഴാണ് ചേട്ടൻ കൊണ്ടുവന്ന കുപ്പിയുമായി കിച്ചു പുറത്തേക്ക് പോവുന്നത് ദേവു കണ്ടത്. പുറത്ത് നിൽക്കുന്ന ആദിയെ ദേവു തുറിച്ചു നോക്കി.... ദേവൂനെ നോക്കി സൈറ്റ് അടിച്ച് കാണിച്ചിട്ട് ആദിയും കിച്ചുവിന്റെ കൂടെ പോയി. ദേവുവിന് ആകെ ദേഷ്യം വന്നു. "കുടിച്ചിട്ട് ഇങ്ങ് വരട്ടെ വച്ചിട്ടുണ്ട് ഞാൻ" ദേവുവിന്റെ നോട്ടം കണ്ടപ്പോഴേ അവൾക്ക് കുടിക്കുന്നത് ഇഷ്ടമല്ല എന്ന് ആദിക്ക് മനസ്സിലായി. അതിന്റെ രസമെന്താണെന്ന് വച്ചാൽ ആദി കുടിക്കില്ല. ആദി മാത്രമല്ല കിച്ചുവും മിഥുവും ഒന്നും കുടിക്കില്ല.

അവരുടെ ഒരു കോമൺ ഫ്രണ്ട് ഉണ്ടായിരുന്നു രാഹുൽ എല്ലാ തല്ലുകൊള്ളിത്തരത്തിനും അവർ നാലുപേരും ഒരുമിച്ച് ആയിരുന്നു. കുടിക്കുന്നത് ഒഴിച്ച്, ആദിയും കിച്ചുവും ഒക്കെ വീട്ടിൽ അറിയാതെ ബിയർ കഴിക്കുമായിരുന്നു. എന്നാൽ രാഹുൽ നന്നായി വെള്ളമടിക്കും. അവനോട് എത്ര പറഞ്ഞാലും കേൾക്കില്ല. ഒരു ദിവസം രാത്രി മദ്യപിച്ച് വണ്ടിയോടിച്ച രാഹുൽ ഒരു ആക്സിഡന്റിൽ മരിച്ചു. അതിനു ശേഷം ആദിയും ഫ്രണ്ട്സും ഒരു തുള്ളി പോലും കുടിച്ചിട്ടില്ല. പിന്നെ ഇപ്പോ കൊണ്ട് പോയ കുപ്പി നിഖിലേട്ടന്റെ ഫ്രണ്ട്സിന് വേണ്ടിയാണ്. നിഖിലേട്ടൻ അതും കൊണ്ട് പോയാൽ തിരിച്ചു വരുന്നത് നാലു കാലിൽ ആയിരിക്കുമെന്ന് അറിയാവുന്നത് കൊണ്ട് ഈ കുപ്പി എത്തിച്ചു കൊടുക്കൽ ദൗത്യം കിച്ചുവിന്റെയും ആദിയുടെയും ജോലി ആണ്.

ദേവുവിന് കുടിക്കുന്നത് ഇഷ്ടമല്ല എന്ന് മനസ്സിലായപ്പോൾ അവളെ ഒന്ന് പറ്റിക്കാൻ തന്നെ ആദി തീരുമാനിച്ചു. രാത്രി വൈകിയാണ് അവൻ വീട്ടിൽ ചെന്നത്. അച്ഛനും ചിന്നുവും ഉറങ്ങിയിട്ട് ഉണ്ടാകും എന്ന് അവന് അറിയാം. ദേവു വന്ന് ഡോർ തുറക്കുമ്പോൾ കുടിച്ചത് പോലെ ഒരു ഗംഭീര പോർഫോമൻസ് തന്നെ അവൻ കാഴ്ച വച്ചു. ഡോർ തുറക്കുമ്പോൾ ദേവു കണ്ടത് ചുമരും ചാരി നിൽക്കുന്ന ആദിയെ ആണ്. കണ്ണ് ചിമ്മി കളിക്കുന്ന ആദിയെ കണ്ടപ്പോൾ ദേവൂന് ആകെ ദേഷ്യമായി. "കുടിച്ചിട്ട് വന്നിരിക്കയാ കോരങ്ങൻ😡". ദേവു കലിപ്പിൽ ആദിയെ നോക്കിയപ്പോൾ വായും പൊത്തിപ്പിടിച്ച് അവൾക്ക് മുഖം കൊടുക്കാതെ ആദി അകത്തേക്ക് കയറി. ഇടയ്ക്ക് വീഴാൻ പോകുന്നത് പോലെ കണ്ടപ്പോൾ ദേവൂന് ദേഷ്യവും സങ്കടവും ഒക്കെ വന്നു. റൂമിൽ ചെന്നപ്പോൾ ആദി ഡ്രസ്സ് മാറുകയാണ്. "ആദിയേട്ടന് ഫുഡ് വേണ്ടേ....."

"വേണ്ട ഞാൻ പുറത്ത് ന്ന് കഴിച്ചു...." "ഹും😤....." ഉറങ്ങുന്ന ചിന്നുവിനെ ആദി ഒന്ന് തലോടിയതും ദേവു ദേഷ്യത്തിൽ അവന്റെ കൈ തട്ടി മാറ്റി. "കുടിച്ചിട്ട് ചിന്നുവിനെ തൊട്ടണ്ട😤". അതും പറഞ്ഞ് ദേവു ചിന്നുവിനെ സൈഡിലേക്ക് മാറ്റി കിടത്തി ആദിയോട് പിണങ്ങി കിടന്നു. ഇതൊക്കെ കണ്ട് ആദിക്ക് ചിരി വരുന്നുണ്ടായിരുന്നു. "വേണ്ട ചിന്നുവിനെ തൊട്ടുന്നില്ല നിന്നെ തൊട്ടാലോ" ന്നും പറഞ്ഞ് ആദി ദേവുവിനോട് ചേർന്ന് കിടന്നു. "വേണ്ട എന്നെയും തൊട്ടണ്ട, മാറി കിടക്ക് അങ്ങോട്ട്....." ദേവു ആദിയെ തള്ളി മാറ്റി. ആദി വിടുമോ..... അവൻ വീണ്ടും അവളോട് ഒട്ടിച്ചേർന്നതും ദേവു ഒറ്റ ചവിട്ട് വച്ചു കൊടുത്തു. പ്രതീക്ഷിക്കാതെ കിട്ടിയ ചവിട്ട് ആയതിനാൽ ആദി അതാ കിടക്കുന്നു നടുവും തല്ലി താഴെ .

"അയ്യോ..... എന്റെ അമ്മേ.... എന്റെ നടു.....😖" അയ്യോ ആദിയേട്ടാ എന്തേല്ലും പറ്റിയോ....???" ദേവു ആദിയെ പിടിച്ച് എണീപ്പിച്ചു. "ചവിട്ടി നിലത്ത് ഇട്ടിട് ചോദിക്കുന്നത് കേട്ടില്ലേ... ആഹ്.... എന്റെ നടു പോയീന്ന് തോന്നുന്നു." നടുവിന് പിടിച്ചു കൊണ്ട് ആദി അത് പറഞ്ഞതും ദേവുവിന് ആകെ സങ്കടമായി. കുറ്റബോധവും സങ്കടവും ഒക്കെ കൂടി എന്ത് ചെയ്യണം എന്ന് അറിയാതെ അവൾ നിന്നു. "മിഴിച്ച് നിൽക്കാതെ പോയി കുഴമ്പ് എടുത്തിട്ട് വാടി....." ആദി പറഞ്ഞതും ദേവു ഓടിപ്പോയി കുഴമ്പ് എടുത്തിട്ട് വന്നു. കമിഴ്ന്നു കിടക്കുന്ന ആദിക്ക് കുഴമ്പ് തേച്ചു കൊടുക്കുമ്പോൾ അവളുടെ കണ്ണുകൾ നിറഞ്ഞു. ആഹ്...... ന്ന് ആദി ഒച്ച എടുത്തപ്പോൾ ദേവൂന് വീണ്ടും സങ്കടം കൂടി.

ചുമലിൽ അനുഭവപ്പെട്ട നനവിൽ നിന്നും ദേവു കരയുകയാണെന്ന് ആദിക്ക് മനസ്സിലായി. ആദി അവളുടെ കൈയിൽ പിടിച്ച് വലിച്ച് അടുത്ത് കിടത്തി. അപ്പോഴും ആദിയുടെ മുഖത്ത് നോക്കാതെ ദേവു കരഞ്ഞോണ്ടിരിക്കുവാ... "എന്നെ തള്ളി താഴെയിട്ടിട് നീ എന്തിനാ ദേവൂ കരയുന്നേ......." "അറിയാതെ പറ്റിപോയതാ ആദിയേട്ടാ സോറി..." "അറിയാതെ ആണോ നീ എന്നെ ചവിട്ടി താഴെയിട്ടത്......" "അത്....... ആദിയേട്ടൻ കുടിച്ചിട്ട് വന്നപ്പോൾ അറിയാതെ.... അപ്പോഴത്തെ ആ ദേഷ്യത്തിൽ സംഭവിച്ചു പോയതാ......" "ഞാൻ കുടിച്ചു ന്ന് നിന്നോട് ആരാ പറഞ്ഞത്" അപ്പോ കുടിച്ചില്ലേ ....ന്നുള്ള ഭാവത്തിൽ ദേവു അവനെ മിഴിച്ച് നോക്കിയപ്പോൾ ആദി അവളുടെ മുഖത്തിന് നേരേ ഒന്ന് ഊതി..

"സ്മെൽ ഉണ്ടോ....." ദേവു ഇല്ലെന്ന് തലയാട്ടി. ആദി ഒരു പുരികം പൊക്കി കാണിച്ചു. "അപ്പോ ആദിയേട്ടൻ വന്നപ്പോ സംസാരവും പെരുമാറ്റവും ഒരുമാതിരി ആയിരുന്നല്ലോ..." "അത് ഞാൻ നിന്നെ ചുമ്മാ പറ്റിക്കാൻ ആക്ട് ചെയ്തത്തല്ലെ..." "ആണോ???...... എന്നാ ഇപ്പോ കിട്ടിയത് മോന്റെ അഭിനയത്തിന് കിട്ടിയ ഓസ്കാർ ആണെന്ന് കരുതി അങ്ങ് സഹിച്ചോ...." "ഡീ......" ന്നും പറഞ്ഞ് ആദി അവളെ തന്നിലേക്ക് കൂടുതൽ ചേർത്തു പിടിക്കാൻ നോക്കിയപ്പോൾ നടുവിന് ഒരു പിടിത്തം..... "ഔ......ഹ്....." നടുവിൽ പിടിച്ചു കൊണ്ട് ആദി മുഖം ചുളിച്ചു. "നല്ല വേദനയുണ്ടോ ആദിയേട്ടാ....." "ഏയ്യ്..... നടുവും തല്ലി വീണാൽ നല്ല സുഖമല്ലേ...... ഞാൻ നിന്നെ ചവിട്ടി താഴെയിട്ടാം അപ്പോ മനസ്സിലാവും.... എന്താ വേണോ???"

ദേവു സങ്കടഭാവത്തിൽ ആദിയെ നോക്കി. "എന്റെ ഭംഗി നോക്കി കഴിഞ്ഞെങ്കിൽ ആ കുഴമ്പ് എടുത്ത് നല്ലോണം തേച്ചു താ.... എന്നിട്ട് മോള് പോയി വെള്ളം ചൂടാക്ക്......" "ഈ രാത്രിയിലോ??..." "ചവിട്ടുമ്പോൾ ഓർക്കണമായിരുന്നു. നിനക്ക് ഇത്തിരി എടുത്തു ചാട്ടം കൂടുതലാ. ഇത് നിനക്കുള്ള ശിക്ഷയാ.... കുഴമ്പ് തേച്ച് ചൂട് പിടിച്ചിട്ടേ എന്റെ മോള് ഇന്ന് ചാച്ചുറങ്ങൂ.... അതുകൊണ്ട് വേഗം പണി തുടങ്ങിക്കോ.... മ്മം....വേഗം...." അവസാനം മുഖം വീർപ്പിച്ച് ദേവു എല്ലാം ചെയ്തു കൊടുത്തിട്ടാണ്. ആദി അവളെ കിടക്കാൻ സമ്മതിച്ചത്.പിറ്റേന്ന് കാലത്ത് ചടങ്ങിന് വേണ്ടി ഓടി നടക്കുമ്പോൾ അപ്പച്ചിയാണ് ദേവൂനോട് ചോദിച്ചത്.

"മോളുടെ മുഖം എന്താ എന്തോ പോലെ.... " "അത് ഇന്നലെ കിടക്കാൻ ലേറ്റായി അപ്പച്ചി അതാവും...." അപ്പോഴാ കിച്ചുവിന്റെ ചോദ്യം "ആദി നീ എന്താ നടുവും പിടിച്ചു നിൽക്കുന്നേ..." "അത് ഇന്നലെ രാത്രി ചെറുതായിട്ട് ഒന്ന് ഉളുക്കി അതാ...." അതും കൂടി കേട്ടതും നിഖിലേട്ടൻ ചിരിക്കാൻ തുടങ്ങി. ദേവൂനെ യും ആദിയെയും ആക്കിയുള്ള ആ ചിരി പതിയെ എല്ലാവരും ഏറ്റുപിടിചു. ദേവു അകത്തേക്കും ആദി പുറത്തേക്കും പതിയെ വലിഞ്ഞു. അങ്ങനെ സുമേച്ചിയുടെ വീട്ടിൽ പോയി ഉണ്ണികുട്ടനെയും ചേച്ചിയെയും കൂട്ടികൊണ്ട് വന്നു. ഇനിയുള്ള ഒരാഴ്ച കല്യാണതിരക്കുകളാണ്. ഡ്രസ്സ് എടുക്കലും save the date ന്റെ ഫോട്ടോ ഷൂട്ടും ഹൽദിയും ഒക്കെ കൂടി ഒരു ബഹളമയം.

ഇവിടെ അപ്പച്ചി എന്തെങ്കിലും പണി ഏൽപ്പിക്കുമ്പോൾ ആയിരിക്കും അങ്ങ് നിന്നും അമ്മാവന്റെ വിളി വരുക . ആങ്ങളയുടെ സ്ഥാനത്ത് നിന്ന് എല്ലാം ചെയ്യേണ്ടത് ആദി ആണ്. പോരാത്തതിന് ഹിമയ്ക്കും നീലിമയ്ക്കും എന്തിനും ദേവു ചേച്ചിയുടെ അഭിപ്രായം അറിയണം. അപ്പോഴാ മിഥുവിന്റെ വിളി വരുക ബെസ്റ്റ് ഫ്രണ്ട് ആയിട്ട് കൂടിയും ആദിയെയും ദേവുവിനെയും ആ വഴിക്ക് കാണുന്നില്ല എന്ന അവന്റെ പരാതി. മൂന്ന് സ്ഥലത്തും മാറിഷട്ടിൽ സർവ്വീസ് നടത്തുകയാണ് ഇപ്പോ ആദിയും ദേവുവും. അപ്പോഴാ മുത്തശ്ശിയുടെ വക ഒരാഗ്രഹം രണ്ട് ദിവസം ദേവുവിനെ തറവാട്ടിൽ നിർത്തിക്കാൻ. ആദിക്ക് ആണേൽ ദേവൂനെ പിരിഞ്ഞ് ഒരു ദിവസം പോലും പറ്റില്ല. ചിന്നുവിനും. ഇപ്പോ ഉണ്ണികുട്ടൻ ഉള്ളത് കൊണ്ട് വലിയ പ്രശ്നം ഇല്ല. നാളെയാണ് വിവാഹദിനം kiran weds Hima & Midhun weds Neelima ...............തുടരും…………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...