Love for Unexpected💜: ഭാഗം 10

രചന: Ansiya shery

"മോളേ.....നീ...." മറിയുന്റെ ഉമ്മ അവളെ നോക്കി എന്തോ പറയാൻ തുടങ്ങിയതും പൂർത്തിയാക്കുന്നതിന് മുന്നേ നിഹ അവരുടെ കാൽ ചുവട്ടിലേക്ക് വീണിരുന്നു.... "പ്ലീസ് ആന്റി.. ഒരിക്കലും.. ഒരിക്കലും ഞാനിവിടെയുള്ള കാര്യം നിങ്ങളെരോടും പറയരുത്... അപേക്ഷിക്കുവാ ഞാൻ" ഇടർച്ചയോടെ അവൾ പറഞ്ഞത് കേട്ട് അവരാദ്യമൊന്ന് അന്തിച്ചെങ്കിലും പിന്നെ അവളെ പിടിച്ച് എഴുനേൽപ്പിച്ചു നിർത്തി... "എനിക്കിഷ്ടമില്ലാത്ത കല്യാണമാ നടക്കാൻ നിന്നത്.. ആ കല്യാണം നടന്നാൽ പിന്നെ ജീവിക്കുന്നതിലും ബേധം മരിക്കുന്നതാ.. അപ്പൊ ഈ ഒരു ഒളിച്ചോട്ടം മാത്രമേ മുന്നിൽ ഒരു മാർഗം ആയിട്ട് ഉണ്ടായിരുന്നുള്ളു... പക്ഷെ അവരിങ്ങനെ കാണാതായത് വാർത്തയാക്കും എന്നൊരിക്കലും വിചാരിച്ചിരുന്നില്ല... ഞാനിവിടെയുള്ള കാര്യം ആരും പറയരുത്.. പ്ലീസ്...." കൈ കൂപ്പി എല്ലാവരോടും ആയി അവൾ പറഞ്ഞതും അവരൊന്നും മറുപടിയില്ലാതെ നിന്നു...! നിലത്ത് കിടന്ന ബാഗെടുത്ത് തിരിഞ്ഞ് നടക്കാൻ തുനിഞ്ഞതും പെട്ടെന്ന് പിറകിൽ നിന്നും പാച്ചുവിന്റെ വിളി കേട്ടവൾ നിന്നു... "നിന്റെ പ്രശ്നം എന്താ.. അത് പറഞ്ഞിട്ട് നമുക്ക് തീരുമാനം ഉണ്ടാക്കാം..

ഇവിടുന്ന് ഇപ്പൊ നീ പോയാൽ അവര് എന്തായാലും പിടിക്കും.. കാരണം നീ മിസ്സിംഗ്‌ ആണെന്നുള്ള കാര്യം ഇപ്പൊ ഭൂരിഭാഗം പേരും അറിഞ്ഞിട്ടുണ്ടാകും.. അത് കൊണ്ട് തന്നെ ആരേലും നിന്നെ കണ്ടാൽ ആ വാർത്ത അവരിലെത്താൻ അധിക സമയം വേണ്ടി വരില്ല" അവൻ പറഞ്ഞത് കേട്ടപ്പോൾ അത് ശെരിയാണെന്ന് അവൾക്കും തോന്നി.. അവർക്ക് നേരെ തിരിഞ്ഞ് നിന്നവൾ തല താഴ്ത്തി... "പറ... നിഹ... നിന്റെ സ്വന്തം വീട്ടുകാരെ പോലെ കണ്ട് ഇനിയെങ്കിലും എന്താ നിന്റെ പ്രശ്നമെന്ന് ഒന്ന് തുറന്ന് പറ" അവളുടെ തോളിൽ പിടിച്ച് കുലുക്കി മറിയു പറഞ്ഞതും നിറഞ്ഞ കണ്ണുകളോടെ നിഹ അവളെ നോക്കി... "ഇനിയും എന്റെ വീട്ടുകാരെന്ന് പറയല്ലേ മറിയു.. എനിക്ക് അങ്ങനൊരു വീട്ടുകാരെ വേണ്ട.." ഉച്ചത്തിൽ അവൾ പറഞ്ഞത് കേട്ട് എല്ലാവരും ഞെട്ടി.. 🌸🌸🌸🌸 "ചെറുപ്പത്തിലേ ഉമ്മ മരിച്ച എനിക്ക് പിന്നെ സ്വന്തമെന്ന് പറയാൻ ഉണ്ടായിരുന്നത് ഉപ്പ മാത്രമായിരുന്നു..എന്റെ ലോകം തന്നെ ഉപ്പയായിരുന്നു എന്ന് പറയാം... എനിക്ക് ഉപ്പയെന്ന് വെച്ചാൽ അത്രക്ക് ജീവനായിരുന്നു.. തിരിച്ച് എന്നോടും അങ്ങനെ തന്നെ...

ഒരു കുഴപ്പവുമില്ലാതെ ജീവിതം നീങ്ങിപ്പോകുന്നതിനിടയിലാണ് ഒരിക്കെ ഞാൻ പത്തിൽ പഠിക്കുമ്പോൾ എല്ലാം മാറി മറിയുന്നത്... ക്ലാസ്സ്‌ കഴിഞ്ഞ് വന്ന ഞാൻ കണ്ടത് ഉപ്പാടെ കൂടെ വീട്ടിൽ വേറൊരു സ്ത്രീയെയും എന്നെക്കാൾ ആറ് വയസ്സ് മുതിർന്ന അവരുടെ മോനേയും ആയിരുന്നു..പുതിയ ഉമ്മയാണ് അവരെന്ന് പറഞ്ഞ് പരിചയപ്പെടുത്തുമ്പോൾ അപ്പോഴൊക്കെ എനിക്ക് സന്തോഷമായിരുന്നു....ഒരുമ്മാടെ സ്നേഹം ഇനിയെങ്കിലും അനുഭവിക്കാലോ എന്നോർത്ത്‌...! പക്ഷെ....." ബാക്കി പറയാതെ അവൾ നിർത്തി.. ആരുമൊന്നും മിണ്ടിയില്ല...! കുറച്ച് നേരത്തിനു ശേഷം കണ്ണുകളൊന്ന് ചിമ്മി തുറന്നു കൊണ്ട് അവൾ തന്നെ തുടർന്നു.... "ഒരു ദിവസം പതിവ് പോലെ ക്ലാസ്സ്‌ കഴിഞ്ഞ് വന്നപ്പോൾ ഉപ്പാടെ മുറിയിൽ നിന്നെന്തോ സംസാരം കേട്ടാണ് ഞാൻ അങ്ങോട്ട് ചെന്ന് നോക്കിയത്... അകത്തേക്ക് കയറാൻ തുനിഞ്ഞപ്പോഴാണ് അവർ പറയുന്നത് കേട്ടത്... ആകെ തറഞ്ഞു പോയി ഞാൻ..! ഉമ്മ ജീവിച്ചിരിക്കെ തന്നെ ആ സ്ത്രീയുമായി ഉപ്പാക്ക് ബന്ധം ഉണ്ടായിരുന്നു.. അവരിലുള്ള മോനാണ് അവൻ... അതിനേക്കാളേറെ എന്നെ തളർത്തിയത് എന്റെ ഉമ്മാനെ അവര് വിഷം കൊടുത്ത് കൊന്നതായിരുന്നത്രെ...എന്നോട് പറഞ്ഞത് ഉമ്മാക്ക് നെഞ്ച് വേദനയായി മരിച്ചതാണെന്നായിരുന്നു...

അത്രയും കാലം ജീവനോടെ സ്നേഹിച്ച ഉപ്പാടെ ചതി എന്നെ വല്ലാതെ തളർത്തിക്കളഞ്ഞു.. അപ്പോഴത്തെ ദേഷ്യത്തിലും സങ്കടത്തിലും മറ്റൊന്നും ചിന്തിക്കാതെ ഞാൻ അകത്തേക്ക് കയറി അവർക്ക് നേരെ ചൂടായി... ------ അകത്തേക്ക് പാഞ്ഞു വന്ന നിഹയെ കണ്ട് മൂന്ന് പേരും ഞെട്ടിയിരുന്നു... "നീ... നീ എപ്പോൾ വന്നു" ഇടർച്ചയോടെ ആ സ്ത്രീ ചോദിച്ചതും അവളവരെ കത്തുന്ന കണ്ണുകളോടെ നോക്കി... ശേഷം ഉപ്പാക്ക് നേരെ തിരിഞ്ഞു.... "നിങ്ങളെന്റെ ഉപ്പയാണെന്ന് പറയാൻ എനിക്ക് സന്തോഷമായിരുന്നു.. പക്ഷെ ഇപ്പൊ വെറുപ്പ് തോന്നുവാ..എന്തിനാ എന്റെ ഉമ്മാനോട് ഈ ചതി ചെയ്തത്.. പറ.. സ്നേഹിച്ചിട്ടല്ലേ ഉള്ളു ആ പാവം..ഛെ.." അവൾ എല്ലാം കേട്ടെന്ന് മനസ്സിലായതും അയാളുടെ മുഖത്ത് പരിഭ്രമം നിറഞ്ഞു.. "അതേടീ.... ഞങ്ങൾ തന്നെയാ നിന്റെ തള്ളയെ കൊന്നത്... ഞങ്ങൾക്ക് സ്വസ്ഥമായി ജീവിക്കാൻ വേണ്ടി..പിന്നെ നിന്നെ ഇത്രയും കാലം നോക്കിയത് ഇഷ്ടമുണ്ടായിട്ടൊന്നുമല്ല.. നിന്റെ പേരിലാണിപ്പോ ഈ വീടും സ്വത്തുക്കളും..നിന്റെ തള്ള ചാവുന്നതിന് മുന്നേ എല്ലാം നിന്റെ പേരിലേക്കങ്ങ് എഴുതി വെച്ചു...

നിനക്ക് പതിനെട്ട് വയസ്സായാലേ ഞങ്ങൾക്കത് ലഭിക്കൂ..അതിന് വേണ്ടിയാ ഇല്ലാ സ്നേഹം കാണിച്ചത്" ഉമ്മയെന്ന് ഇത്രയും കാലം വിളിച്ചിരുന്ന ആ സ്ത്രീ പറഞ്ഞത് കേട്ടതും അവളുടെ കൈകൾ അവരുടെ കവിളിൽ പതിഞ്ഞു... "ഡീ..... നീയെന്റെ ഉമ്മാനെ അടിച്ചല്ലേ"അത്രയും നേരം മിണ്ടാതെ നിന്ന അവരുടെ മകൻ ജാസിം വന്നവളുടെ മുടിയിൽ കുത്തിപ്പിടിച്ചതും അവളവന്റെ കൈ തട്ടി മാറ്റി കിതച്ചു... "തല്ലും ഇനിയും തല്ലും.. പ്രായത്തിൻ മൂത്തത് ആണെന്ന് വെച്ച് ആ ബഹുമാനം നിങ്ങൾക്ക് ഞാൻ തരുമെന്ന് വിചാരിക്കണ്ട.. തന്നിരുന്നു...ഇപ്പൊ എനിക്ക് തീർത്തും വെറുപ്പാ.. എല്ലാവരോടും" അവസാനം ഉപ്പാക്ക് നേരെ വിരൽ ചൂണ്ടി പറഞ്ഞു കൊണ്ട് അവൾ തിരിഞ്ഞ് മുറിയിൽ നിന്നും പുറത്തേക്കിറങ്ങി... ഞാനെല്ലാം അറിഞ്ഞപ്പോൾ മുതൽ പിനീടങ്ങോട്ട് പലപ്പോഴും എന്നെ ഉപദ്രവിക്കാറുണ്ടയിരുന്നു അവർ..പ്രതികരിക്കാൻ ഭയമായിരുന്ന ഞാൻ പ്രക്തികരിക്കാൻ പഠിച്ചു..ഒരിക്കെ സ്വന്തം സഹോദരൻ തന്നെ ഇരുട്ടിന്റെ മറവിൽ കീഴ്പ്പെടുത്താൻ ശ്രമിച്ചപ്പോൾ ആകെ തളർന്നു പോയിരുന്നു..

ഇഷ്ടമില്ലെങ്കിലും വെറുപ്പാണെങ്കിലും സ്വന്തം രക്തം തന്നെ രക്തത്തോട് ഇങ്ങനെയൊക്കെ ചെയ്യുമോ..? എന്തൊക്കെ നടന്നാലും ഉപ്പ മാത്രം ഒന്നും പറയാതെ നിൽകുമ്പോൾ പലപ്പോഴും ചിന്തിക്കാറുണ്ടായിരുന്നു.. ഇനി ഒരുപക്ഷെ അവരുപ്പാനെ ഭീഷണിപ്പെടുത്തി നിർത്തിയിരിക്കയാണോ എന്ന്..? പക്ഷെ അതൊക്കെ തെറ്റായിരുന്നെന്ന് അയാൾ തന്നെ തെളിയിച്ചു... വർഷങ്ങൾക്ക് ശേഷം ഒരിക്കെ പെട്ടെന്ന് എന്നോട് പോലും ചോദിക്കാതെ എന്റെ കല്യാണം ഉറപ്പിച്ചു... അതും സ്വന്തം സഹോദരനുമായി..! അതിനെ എതിർത്ത എനിക്ക് കിട്ടിയത് ശരീരമാകെ തളരും വിധമുള്ള അടിയായിരുന്നു.. അതും ഉപ്പാടെ കയ്യിൽ നിന്നും..! ചെറിയൊരു പ്രതീക്ഷ ഉപ്പയിൽ ഉണ്ടായിരുന്നത് കൊണ്ടാണ് അത്രയും കാലം അവിടെ പിടിച്ചു നിന്നത്... പക്ഷെ അതും നഷ്ടപ്പെട്ടപ്പോൾ പിന്നെ....ആ കല്യാണം നടന്നിരുന്നേൽ അവനെന്നെ അവന്റെ കാൽ കീഴിലിട്ട് ചവിട്ടി മെതിച്ചിരുന്നേനെ.. അതിലുപരി സ്വന്തം സഹോദരനെ തന്നെ എങ്ങനെയാ ഞാൻ കല്യാണം കഴിക്കാ...!? അത് കൊണ്ടാണ് രാത്രി അവരെല്ലാം എങ്ങോട്ടോ പോയ തക്കം നോക്കി ഒളിച്ചോടാൻ തീരുമാനിച്ചത്...ഞാൻ പോകുമെന്ന് ഭയന്ന് അവര് ഡോർ ലോക്ക് ആക്കിയിട്ടാണ് പോയത്..

ആകെ തളർന്നിരുന്നപ്പോഴാണ് എന്തോ ഭാഗ്യം പോലെ ടെറസിന്റെ വാതിൽ തുറന്ന് കിടക്കുന്നത് കണ്ടത്... ഒരു നിമിഷം പോലും പാഴാക്കാതെ അവിടുന്ന് വേഗം ഇറങ്ങി....ബാംഗ്ലൂരിലേക്ക് തന്നെയായിരുന്നു പോകാൻ തീരുമാനിച്ചത്..മറിയുനെ ഒരു വട്ടം എങ്കിലും കാണണം എന്ന് ആഗ്രഹിച്ചാണ് ഇങ്ങോട്ട് വന്നത്" ചുണ്ടിൽ ചിരി വരുത്തി പറയുമ്പോഴും കണ്ണുകൾ നിറഞ്ഞൊഴുകിയിരുന്നു.. "മോൾക്കിത് ഞങ്ങളോട് നേരത്തെ പറയാമായിരുന്നു" അടുത്ത് വന്നിരുന്ന് കൊണ്ട് ആന്റി പറഞ്ഞതും ഞാൻ അവരെ നോക്കി പുഞ്ചിരിച്ചു... "ആരുടേയും.. ആരുടേയും സഹതാപത്തോടെയുള്ള നോട്ടം കാണാൻ ആഗ്രഹമില്ലാത്തത് കൊണ്ടാ ഒന്നും തുറന്ന് പറയാതിരുന്നത്.." വാക്കുക്കൾ ഇടറിപ്പോയിരുന്നു..ആന്റി പെട്ടെന്നെന്റെ തോളിൽ കൈ വെച്ചതും ഞാൻ പെട്ടെന്നവരെ കെട്ടിപ്പിടിച്ച് പൊട്ടിക്കരഞ്ഞു... ആദ്യമൊന്ന് ഞെട്ടിയെങ്കിലും പിന്നീടവർ അവളെ ചേർത്ത് പിടിച്ചു... ഇച്ചു ആദ്യമായിട്ടായിരുന്നു അവളെ ഇങ്ങനെ കാണുന്നത്...എപ്പോഴും കുറുമ്പ് കാണിച്ച് നടക്കുന്നവൾ പൊട്ടിക്കരയുന്നത് കണ്ടപ്പോൾ തന്റെ ഹൃദയം വല്ലാതെ പിടയുന്നതവൻ അറിഞ്ഞു..! ------- "നീയിനി എന്താ ചെയ്യാ..നാളെ ആകുമ്പോഴേക്കും ബാംഗ്ലൂരിൽ എത്തണ്ടേ...

അതിന് മുന്നേ അവര് ആരെങ്കിലും കണ്ടാലോ...?നീ ബാംഗ്ലൂരിൽ ആണെന്ന് വിചാരിച്ച് ഇപ്പൊ അവിടെ അല്ലേ അന്വേഷണം നടത്തുന്നത്..?" പാച്ചുന്റെ ചോദ്യം കേട്ടതും ഉമ്മയിൽ നിന്നും അകന്ന് മാറി അവളവനെ നോക്കി... "അറിയില്ല... ഇനിയെന്തായാലും അങ്ങോട്ട് പോകാൻ കഴിയില്ല.. മറ്റെവിടേക്കെങ്കിലും പോകണം" "അപ്പൊ ജോലി..?"മറിയുന്റെ ചോദ്യം കേട്ടതും നിഹ അവളെ നോക്കി... "വെറും പ്ലസ് റ്റൂ വരെ മാത്രം പഠിച്ച എനിക്ക് ഏത് കമ്പനിയിലാ ജോലി കിട്ടാ എന്റെ മറിയു..പ്ലസ് റ്റൂ കഴിഞ്ഞ് വേണേൽ ഒരു ജോലി എങ്ങനെയെങ്കിലും ശെരിയാക്കാം ആയിരുന്നു.. പക്ഷെ സിർട്ടിഫിക്കറ്റും ഇല്ലാതെ പോയി.."കളിയായി പറഞ്ഞതാണെങ്കിലും ഉള്ള് പിടഞ്ഞിരുന്നു അവളുടെ... "അപ്പൊ നീ പറഞ്ഞതൊക്കെ?" "വെറുതെ പറഞ്ഞതാ...നടക്കാത്ത സ്വപ്നം പറഞ്ഞു നടന്നെങ്കിലും സഫലമാക്കാലോ.." മിഴികൾ തുടച്ചവൾ എല്ലാവരേയും നോക്കി പുഞ്ചിരിച്ചു........തുടരും………..........

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...