💞 പെയ്‌തൊഴിയാതെ💞 : ഭാഗം 11

രചന: RAFEENA MUJEEB

" കോളേജിലേക്ക് പോകുന്ന ബസ്സിൽ പതിവിലും കൂടുതൽ തിരക്കുണ്ടായിരുന്നു അന്ന്. ശ്വാസം വിടാൻ പോലും പറ്റുന്നില്ല, ഇടക്കിടക്കുള്ള ഡ്രൈവറുടെ പെട്ടന്നുള്ള ബ്രേക്ക് പിടുത്തത്തിൽ എല്ലായെണ്ണവും മുൻപിലേക്ക് പോയിവീഴും, ഇതയാൾ മനപ്പൂർവ്വം ചെയ്യുന്നതാണോ എന്നൊരു സംശയം ഇല്ലാതില്ല, കാലൻ ഇരിപ്പ് കണ്ടാൽ തോന്നും റോക്കറ്റാണ് ഓടിക്കുന്നതെന്ന് കൃപ മനസ്സാലെ അയാളെ പ്രാകി. പിന്നെ അടുത്ത അവതാരം അതിലെ കണ്ടക്ടറാണ് എത്ര തിരക്കാണെങ്കിലും അയാൾ അയാളുടെ ജോലി ആസ്വദിച്ച് ചെയ്യുന്നുണ്ട്, സ്ത്രീകൾക്കിടയിലൂടെ തിക്കി തിരക്കി അയാൾ സ്വന്തം ജോലിയോടുള്ള ആത്മാർത്ഥത കാണിക്കുന്നത് കാണുമ്പോൾ കരണം നോക്കി ഒന്ന് പൊട്ടിക്കാനാണ് തോന്നുന്നത്. പക്ഷേ അല്ലെങ്കിൽതന്നെ അയാൾക്ക് കോളേജ് പിള്ളേരെ കണ്ണെടുത്താൽ കണ്ടുകൂടാ അതുകൊണ്ടുമാത്രം എല്ലാം ക്ഷമിച്ചു നിൽക്കുന്നു. എത്ര തിരക്കാണെങ്കിലും എല്ലാ സ്റ്റോപ്പിലും നിർത്തി അവിടെയുള്ള എല്ലാ യാത്രക്കാരെയും ഇതിനകത്തേക്ക് കുത്തി കയറ്റിവിടുന്നുണ്ട്,

ഇതൊക്കെ എങ്ങോട്ട് പോകുന്നു അവൾ അത്ഭുതത്തോടെ ഓർത്തു പോയി. ആകെയുള്ള സമാധാനം കോളേജ് സ്റ്റോപ്പ് കഴിഞ്ഞാൽ ബസ്സിലെ തിരക്കൊഴിയും , ആ ഒരു പ്രതീക്ഷയോടെയാണ് എല്ലാ യാത്രക്കാരും ഇതിനകത്തേക്ക് ഇരച്ചുകയറുന്നത്. എങ്ങനെയൊക്കെയോ തിക്കിത്തിരക്കി കോളേജ് വരെ പിടിച്ചുനിന്നു. കോളേജിന്റെ സ്റ്റോപ്പിൽ ബാഗും ചെരുപ്പുമൊക്കെ വലിച്ചു പറിച്ചെടുത്ത് അവിടെ ഇറങ്ങുമ്പോൾ ഒരു യുദ്ധം ജയിച്ച പ്രതീതിയായിരുന്നു കൃപയ്ക്ക്. ജീവൻ കിട്ടിയ ആശ്വാസത്തിൽ തിരിഞ്ഞു നടക്കുമ്പോഴാണ് താൻ വരുന്നതും നോക്കി നിൽക്കുന്ന സൈനുവിനെ കണ്ടത്. അവളെ നോക്കി ഒന്ന് പുഞ്ചിരിച്ച് കൃപ അവളുടെയടുത്തേക്ക് നടന്നു. രണ്ടാളും ഓരോരോ വിശേഷങ്ങൾ പറഞ്ഞു കോളേജിലെത്തിയതറിഞ്ഞില്ല, ഗ്രൗണ്ടിൽ തന്നെ അവരുടെ ടീം എല്ലാവരും അവരെയും പ്രതീക്ഷിച്ച് നിൽപ്പുണ്ടായിരുന്നു. നവീനെ കണ്ടതും കൃപ അവനെ നോക്കി മുഖം വീർപ്പിച്ചു. നീ എന്നെ നോക്കി മുഖം വീർപ്പിക്കണ്ട, നീ അപ്പോഴേ കാര്യം പറഞ്ഞിരുന്നെങ്കിൽ അത് അവിടെ തീർന്നേനെ എനിക്ക് നിന്നെ വിളിച്ചു ചോദിക്കേണ്ട ആവശ്യം വരില്ലല്ലോ..? എന്ന് വെച്ച് നിന്നോടാരാ പറഞ്ഞത് എല്ലാം വിളിച്ച് ചെറിയച്ഛനെയറിയിക്കാൻ,

എല്ലാരും എല്ലാം അറിഞ്ഞിരുന്നെങ്കിൽ ഇന്ന് ഞാൻ ഇവിടെ കാണില്ലായിരുന്നു. ചെറിയച്ഛനറിഞ്ഞതുകൊണ്ട് അയാൾക്ക് നല്ലപോലെ കിട്ടി, ഈ വിഷയം ആരുമൊന്നുമറിയാതെ അങ്ങേര് നോക്കുമെന്നെനിക്കുറപ്പുണ്ട് , എന്നാ മാസ് അടിയാ ദത്തേട്ടനയാളെ അടിച്ചത്, നീയൊന്ന് കാണണമായിരുന്നു, ഒറ്റദിവസംകൊണ്ട് ഞങ്ങളെല്ലാം അങ്ങേരുടെ ഫാനായി. സച്ചുവത്‌ പറയുമ്പോൾ അവന്റെ വാക്കുകളിൽ കാണാമായിരുന്നു ദത്തനോടുള്ള മതിപ്പ്. ഉവ്വ,.. ഇനി എന്തൊക്കെ സംഭവിക്കുമെന്ന് കണ്ടറിയാം, കിട്ടുന്ന അവസരമൊക്കെ ചെറിയച്ഛൻ മുതലെടുക്കും എന്നെ ഭീഷണിപ്പെടുത്താൻ, ചെന്ന് തല വെച്ച് കൊടുത്തത് അസ്സൽ സിംഹത്തിന്റെ മടയിലാണ് കൃപ നിരാശയോടെ പറഞ്ഞു. അതൊക്കെ പോട്ടെ ഇന്നിനിയെന്തു പറഞ്ഞു നമ്മൾ ഇവിടെ നിന്ന് മുങ്ങും വിദ്യ എല്ലാവരെയും നോക്കി സംശയത്തോടെ ചോദിച്ചു. അയ്യോ ഇന്നിനിയെങ്ങോട്ടും മുങ്ങാൻ പറ്റില്ല ചെറിയച്ഛനറിഞ്ഞാൽ എന്നെ ശരിയാക്കും , അപ്പോൾ നീ ഇന്നത്തേക്കുള്ള അസൈമെന്റ് റെഡിയാക്കിയോ വിദ്യ അവളെ അത്ഭുതത്തോടെ നോക്കി ചോദിച്ചു. അയ്യോ ഭഗവാനെ ഇന്നായിരുന്നോ അസൈൻമെന്റ് സബ്മിറ്റ് ചെയ്യേണ്ട ദിവസം ഈശ്വരാ ഞാനാ കാര്യം മറന്നു പോയി,

പിന്നെ പറയുന്നത് കേട്ടാൽ തോന്നും ഓർത്താൽ നീ അങ്ങ് ഉലത്തുമെന്ന്, സൈനു അവളെ കളിയാക്കിക്കൊണ്ടു പറഞ്ഞു. പോടീ ഞാൻ ശരിക്കും മറന്നു പോയതാ, ഇനിയിപ്പോ എന്ത് ചെയ്യും കൃപ ആശങ്കയോടെ ചോദിച്ചു. ഞങ്ങൾ രക്ഷപ്പെട്ടു ക്യാമ്പിന് പോകുന്ന കുട്ടികളുടെ ലിസ്റ്റെടുക്കാൻ പറഞ്ഞിട്ടുണ്ട് പ്രിൻസി ഞങ്ങള് മൂന്നുപേരും ആ പേരും പറഞ്ഞുമുങ്ങും റഹിം അവരെ നോക്കി ചിരിച്ചുകൊണ്ട് പറഞ്ഞു. ദുഷ്ടന്മാരെ ഞങ്ങളെക്കൂടി കൂടെ കൂട്ട് പ്ലീസ് വിദ്യ അപേക്ഷയോടെ പറഞ്ഞു. അതിന് ഞങ്ങൾ പോകുന്നത് സമൂഹവിവാഹത്തിനല്ല നവീൻ പുച്ഛത്തോടെ പറഞ്ഞു. രക്ഷപ്പെടാനുള്ള വഴി നിങ്ങൾ തന്നെ കണ്ടു പിടിച്ചോളൂ, എല്ലാവർക്കും ഓൾ ദ ബെസ്റ്റ് എന്നുപറഞ്ഞവർ മൂന്നുപേരും അവിടെ നിന്നും ഓടിപ്പോയി. ഇനിയെന്ത് ചെയ്യും ക്ലാസ്സിലിരുന്നാൽ ആ തരകൻ സാർ നമ്മളെപൊക്കും , പുറത്ത് ചാടിയാൽ ചെറിയച്ഛനും,ചെകുത്താനും കടലിനും നടുക്കാണല്ലോയിപ്പോൾ ഈശ്വരാ കൃപ തലയിൽ കൈ വെച്ച് പറഞ്ഞു. ഞാനെന്തായാലും ക്ലാസ്സ്‌ കട്ട് ചെയ്യുന്നില്ല

ഞാൻ അസൈമെന്റ് എഴുതിയിട്ടുണ്ട് ആതിര മൂന്നുപേരെയും നോക്കി പറഞ്ഞു. അതു നീ പ്രത്യേകിച്ച് പറയേണ്ട കാര്യമില്ലല്ലോ ആതു ഞങ്ങൾക്കറിയാവുന്നതല്ലേ.. സൈനു അവളെ ചേർത്ത് പിടിച്ചു കൊണ്ട് പറഞ്ഞു. നമുക്കു മൂന്ന് പേർക്കും ചാടാനുള്ള വഴി ആലോചിക്കാം,എന്തായാലും ക്ലാസിലിരിക്കാൻ പറ്റില്ല സൈനു പറയുന്നതിനോട് ലച്ചുവും കൃപയും യോജിച്ചു. ഒരു കാര്യം ചെയ്യാം വല്ല അസുഖവുമാണെന്ന് പറഞ്ഞിവിടെനിന്നും ചാടാം ലച്ചു പറഞ്ഞപ്പോൾ കൃപയുംസൈനുവുമതിനോട് യോജിച്ചു. എന്നാ ഒരു കാര്യം ചെയ്യാം, വയറുവേദനയാണെന്ന് പറയാം അതാവുമ്പോൾ എല്ലാരും പെട്ടെന്ന് വിശ്വസിച്ചോളും. പ്ഫാ... കൃപ പറയുന്നത് കേട്ട് സൈനു അവളെ ഒരൊറ്റയാട്ട്. കഴിഞ്ഞമാസം ഇതു പറഞ്ഞല്ലേ ടീ നമ്മൾ ക്ലാസ്സിൽ നിന്ന് ഇറങ്ങിയത്,..? അതിനെന്താ ഇതെല്ലാ മാസവും വരുന്നതല്ലേ...? അതുകൊണ്ടവർ വിശ്വസിച്ചോളും കൃപ സൈനുവിനെനോക്കി പറഞ്ഞു. അതുവേണ്ട,എന്തായാലും വയറുവേദന വേണ്ട, കഴിഞ്ഞമാസം അതിന്റെ മുൻപുള്ള മാസവും ഈ വേദന പറഞ്ഞാണ് ചാടിയത്, ഇനിയും ചിലപ്പോൾ അത് ഏൽക്കില്ല, സൈനു പറയുന്നതിലും കാര്യമുണ്ടെന്ന് കൃപയ്ക്കും തോന്നി. എങ്കിൽ പിന്നെ നെഞ്ചുവേദന യിൽ പിടിക്കാം കൃപ അടുത്ത ഐഡിയിട്ടു.

അതേൽക്കും, നെഞ്ച് വേദന മതി ലച്ചു അവളെ സപ്പോർട്ട് ചെയ്തു. എന്നാ നീ തന്നെ അഭിനയിച്ചു തകർത്തോ ലച്ചുവിനെ നോക്കി കൃപ പറഞ്ഞു. അയ്യോ ഞാനോ ...? ഞാൻ വേണ്ട, ഞാനും സൈനുവുമല്ലേ എപ്പോഴും അഭിനയിക്കുന്നത് ഇത്തവണ നീ തന്നെ തകർത്തോ . അയ്യോ ഞാനഭിനയിച്ചാൽ ശരിയാവില്ല എനിക്ക് അഭിനയിക്കാനൊന്നുമറിയില്ല, പെട്ടന്ന് പിടിക്കപ്പെടും. അതൊന്നും പിടിക്കൂല എന്റെ മോള് തകർത്തഭിനയിച്ചാൽ മതി നമുക്ക് വേണ്ടിയാണെന്ന് മനസ്സിലുറപ്പിച്ചാൽ ഭരത് ഗോപി മാറിനിക്കും, സൈനു അവളെ ചേർത്ത് പിടിച്ചു കൊണ്ട് പറഞ്ഞു. എങ്കിൽ പിന്നെ ഒരു കൈ നോക്കാമല്ലെ കൃപ അവരെ നോക്കി പറഞ്ഞു. ഒരു കൈയ്യല്ല രണ്ട് കൈയ്യും നോക്കാം, ഇതു നമ്മൾ തകർക്കും ലച്ചു കൃപയുടെ കൈപിടിച്ച് ആത്മവിശ്വാസം നൽകി. എങ്കിൽ പിന്നെ സെക്കൻഡ് പീരിയഡിൽ നമുക്ക് തകർക്കാം, സൈനുവും അവരുടെ കൈകളിൽ തന്റെ കൈ വെച്ച് പറഞ്ഞു. അയ്യോ അതു വേണ്ട സെക്കൻഡ് പീരിയഡ് വൈഷൂ ടീച്ചറാണ്, എങ്ങാനും പഴയ ബന്ധം വെച്ച് ചെറിയച്ഛനോട് വല്ലോം പറഞ്ഞാൽ ആകെ പെടും, അതുകൊണ്ട് നമുക്ക് ഫസ്റ്റ് പിരിയഡ് തന്നെ അഭിനയം തകർക്കാം. അവരു തമ്മിൽ എന്തു ബന്ധം ലച്ചു സംശയത്തോടെ ചോദിച്ചു.

അവര് രണ്ടു പേരും പഴയ കളിക്കൂട്ടുകാരാണ്, ഇപ്പൊ തമ്മിൽ കണ്ടാൽ മുഖത്ത് പോലും നോക്കില്ല, ഇനി അത് അഭിനയമാണോ എന്നും അറിയില്ല, എന്തഭിനയം...? സൈനു സംശയത്തോടെ ചോദിച്ചു. അല്ലെടീ ടീച്ചറും ചെറിയച്ഛനും ഇനി എന്റെ മുൻപിൽ അഭിനയിക്കുകയാണോ എന്നൊരു സംശയം എനിക്ക് ഇല്ലാതില്ല, ഞാൻ അവരുടെ സ്റ്റുഡന്റല്ലേ നാണക്കേട് കൊണ്ട് മിണ്ടാതിരിക്കുന്നതാവും. ചെറിയച്ഛനെന്തായാലും ടീച്ചറോട് ഒരു ചായ്‌വുണ്ട് അതെനിക്കറിയാം. ഒന്ന് പോടീ, എന്റെ ദത്തേട്ടൻ ആ ടൈപ്പല്ല, നിന്റെ ചെറിയമ്മ പോസ്റ്റ് സ്വപ്നം കണ്ടു ജീവിക്കുകയാണ് ഞാൻ, ആ എന്റെ നെഞ്ചിൻകൂട് തകരുന്ന വർത്താനമൊന്നും പറയല്ലേ, ലച്ചു സങ്കടത്തോടെ പറഞ്ഞു. നിനക്ക് ആരൊക്കെ കണ്ടാലാ ഒന്നും മുട്ടാൻ തോന്നാത്തത്, ഇങ്ങനെയൊരു വായ്നോക്കിയെ ഞാനെന്റെ ജീവിതത്തിൽ കണ്ടിട്ടില്ല സൈനു നെറ്റിയിൽ കൈവെച്ചു കൊണ്ട് പറഞ്ഞു. സൗന്ദര്യമാസ്വദിക്കുന്നത് നിനക്കൊക്കെ വായ്നോട്ടമാണെങ്കിലത് ഞാനങ്ങ് സഹിച്ചു, വല്ലാവരുടെയും കൈയിൽ നിന്ന് കണക്കിന് കിട്ടുമ്പോൾ മാറിക്കൊള്ളും ഈ അസുഖം, സൈനുവും വിട്ടുകൊടുത്തില്ല. നീ വേണമെങ്കിൽ ആ ഭൂതത്തിനെ മൊത്തമായിട്ടെടുത്തോ, എങ്കിലാ ടീച്ചർ രക്ഷപ്പെടും, കൃപ ചിരിയോടെ പറഞ്ഞു.

അതിനെന്താ ഇങ്ങു തന്നേക്ക് ഞാൻ പൊന്നുപോലെ നോക്കിക്കൊള്ളാം ലച്ചുവൊരു നാണത്തോടെ പറഞ്ഞു. ഓ പിന്നെ, അത്രയ്ക്ക് ദാരിദ്ര്യമൊന്നും ദത്തേട്ടന് വന്നിട്ടില്ല, അങ്ങേർക്ക് വൈഷു ടീച്ചറാ മാച്ച്, സൈനു പറഞ്ഞു. വേണ്ടെങ്കിൽ വേണ്ട, ഞാൻ വേറെ ആരെയെങ്കിലും നോക്കിക്കൊള്ളാം ആ റെസ്റ്റോറന്റിൽ കണ്ട ചേട്ടനൊക്കെ എവിടെയാണാവോ ലച്ചു നിരാശയോടെ പറഞ്ഞു. എന്റെ പടച്ചോനെ ഇതിനെ ഞാൻ തന്നെ കൊല്ലേണ്ടി വരും, സൈനു പല്ലുറുമ്പിക്കൊണ്ട് പറഞ്ഞു. ഞാനിനി മിണ്ടില്ല പോരെ, ലച്ചു വായപൊത്തികൊണ്ട് പറഞ്ഞു. അതാ നിനക്ക് നല്ലത്, സൈനു ചിരിച്ചുകൊണ്ട് പറഞ്ഞു. അവരുടെ സംസാരമെല്ലാം ഒരു ചിരിയോടെ ആതു നോക്കി നിന്നു. മൂന്നുപേരുംസംസാരിച്ചുകൊണ്ടിരുന്നപ്പോളേക്കും ക്ലാസ്സിലേക്ക് കേറാനുള്ള ഫസ്റ്റ് ബെൽ മുഴങ്ങി. മനസ്സിലുറപ്പിച്ച പ്ലാനുമായി മൂന്നുപേരും ക്ലാസ്സിലേക്ക് കയറി. ഫസ്റ്റ് പിരിയഡ് വനജ മിസ്സായിരുന്നു, ഉള്ളിലുള്ള പ്ലാൻ നടപ്പിലാക്കാൻ വേണ്ടി കൃപ ഒരു അവസരത്തിന് വേണ്ടി കാത്തിരുന്നു. ക്ലാസ് നല്ല രീതിയിൽ മുൻപോട്ടു പോയിക്കൊണ്ടിരിക്കുന്നതിനിടയിൽ അയ്യോ എന്നൊരു അലർച്ച കേട്ട് ടീച്ചർ ചുറ്റും നോക്കി... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...