💞 പെയ്‌തൊഴിയാതെ💞 : ഭാഗം 14

രചന: RAFEENA MUJEEB

"നോക്കുന്നത് കണ്ടോ പഞ്ച പാവത്തിനെ പോലെ., പറയാനുള്ളത് എന്തെങ്കിലും ഉടായിപ്പാവുമെന്നെനിക്ക് നന്നായിട്ടറിയാം മത്തങ്ങ മോറി നോട്ടം കണ്ട് ഋഷി ഉള്ളിൽ പറഞ്ഞു. അതുണ്ടല്ലോ ഡോക്ടറേ.... കൃപ മടിച്ചുമടിച്ച് പറയാൻ തുടങ്ങി, ഏതുണ്ടല്ലോ..? നീ കാര്യം പറയുന്നുണ്ടോ..? എന്തായാലും പറയാൻ പോകുന്നതത്ര നല്ല കാര്യമല്ലെന്നെനിക്കറിയാം , നിന്നെ മനസ്സിലാക്കിയിടത്തോളം നിന്നിൽ നിന്ന് നല്ലതൊന്നും ഞാൻ പ്രതീക്ഷിക്കുന്നുമില്ല, അപ്പോൾ സമയം കളയാതെ തമ്പുരാട്ടി വേഗമൊന്നു മൊഴിഞ്ഞാലും, അടിയനിത്തിരി തിരക്കുണ്ട്. ദേ, തമ്പുരാട്ടി എന്നെങ്ങാനും വിളിച്ചാൽ എന്റെ വിധം മാറും പറഞ്ഞേക്കാം, ഒന്ന് താഴ്ന്നു തന്നപ്പോൾ തലയിൽ കയറുന്നോ ...? കൃപ ദേഷ്യത്തോടെ അവനെ നോക്കി ചോദിച്ചു. ശെടാ ഇത് നല്ല കൂത്ത്, ഇതിപ്പോ എനിക്കൊന്നും പറയാൻ പറ്റാത്ത അവസ്ഥയായല്ലോ..? താൻ പറയുന്നുണ്ടോ അല്ലെങ്കിൽ ഞാനിപ്പോൾ സിസ്റ്ററെ വിളിക്കും, ഒരു ഇഞ്ചക്ഷനെടുക്കുമ്പോൾ മാറാവുന്ന കേടേ നിനക്കുള്ളൂ, ഞാൻ പറയാൻ നിൽക്കല്ലേ, എന്റെ കോൺസെൻട്രേഷൻ കളയാൻ താൻ ഇടയ്ക്ക് കയറി സംസാരിക്കാതെ കൃപ മുഖം കോട്ടിക്കൊണ്ട് പറഞ്ഞു. താനോ...? ഋഷി അവളെയൊന്നു നോക്കി കൊണ്ട് ചോദിച്ചു.

അയ്യോ അത് ഞാൻ പെട്ടെന്നുള്ള ആവേശത്തിൽ വിളിച്ചതാണ് ഡോക്ടർ സാറേ...അവൾ ഒന്ന് ആക്കികൊണ്ട് പറഞ്ഞു. ഓ പറയുന്നത് കേട്ടാൽ തൊന്നും അല്ലെങ്കിൽ നീയെന്നെ പൂവിട്ടു പൂജിക്കുകയാണെന്ന് ...? ഋഷി പുച്ഛത്തോടെ അവളെയൊന്ന് നോക്കിക്കൊണ്ട് പറഞ്ഞു. പിന്നെ പൂവിട്ടു പൂജിക്കാൻ നീയെന്റെ കെട്ടിയോനൊന്നുമല്ലല്ലോ...? കൃപയും വിട്ടുകൊടുത്തില്ല, ആ ബെസ്റ്റ് കെട്ടാൻ പറ്റിയ സാധനം അത്രയും വലിയ പാപമൊന്നും ഞാൻ ചെയ്തിട്ടില്ല, പുണ്ണ്യവും ചെയ്തു കാണില്ല, അതാണല്ലോ എന്നെപ്പോലൊരു സുന്ദരികൊച്ചിനെ വേണ്ടാന്ന് പറയുന്നത്. നീ കാലത്തുതന്നെ മനുഷ്യനെ ചിരിപ്പിക്കാനിറങ്ങിയതാണോ...? ഋഷി ചിരിയടക്കിപ്പിടിച്ചു കൊണ്ട് ചോദിച്ചു. പിന്നെ തന്നെ ചിരിപ്പിക്കാൻ ഞാനാരാ ചാർലി ചാപ്ലിന്റെ മോളോ...? കൃപ പുച്ഛത്തോടെ അവനെ നോക്കി ചോദിച്ചു. അത്രയ്ക്ക് ഗതികേടൊന്നും ചാർലി ചാപ്ലിനു വന്നിട്ടില്ല.. അപ്പൊ താൻ പറഞ്ഞുവരുന്നത് എന്റച്ഛൻ ഗതികെട്ടവനാണെന്നല്ലേ..?

കൃപ ദേഷ്യത്തോടെ ചോദിച്ചു. അയ്യോ ഞാനൊന്നും പറഞ്ഞിട്ടില്ലേ.. മാഡം പറയാനുള്ളത് പറഞ്ഞാൽ വലിയ ഉപകാരമായിരുന്നു. ഋഷി താഴ്മയോടെ അവളോടപേക്ഷിച്ചു. അത് കേട്ടതും കൃപയുടെ ഭാവം പെട്ടെന്ന് മാറി മുഖത്ത് ആ പഴയ പാവം പിടിച്ച ഭാവം വീണ്ടും ഫിറ്റ് ചെയ്തു.ഋഷിയെ നോക്കിയവൾ ഒരു അവിഞ്ഞ ചിരി പാസാക്കി. എന്റെ ദൈവമേ എത്ര പെട്ടെന്നാണ് സ്വഭാവം മാറുന്നത്, ഓന്ത് മാറിനിൽക്കും, തൽക്കാലമൊന്നും പറയണ്ട അല്ലെങ്കിൽ പിന്നെ അതിൽ പിടിച്ചു തൂങ്ങും വടയക്ഷി, ഋഷിയും അവളെ നോക്കി ഒരു അവിഞ്ഞ ചിരി ചിരിച്ചു. ശരിക്കും എനിക്ക് നെഞ്ചുവേദനയൊന്നുമില്ല ഞങ്ങൾ ചുമ്മാ ഒരു രസത്തിന് ചെയ്തത് മിസ്സ്‌ സീരിയസാക്കി, എനിക്ക് പറയാനുള്ളതൊന്നും കേൾക്കാതെ കയ്യോടെയിങ്ങോട്ട് കൂട്ടിക്കൊണ്ടുവന്നു സത്യത്തിൽ ഇതാണ് സംഭവിച്ചത് അല്ലാതെ എനിക്ക് ഒരു വേദനയും ഇല്ല കൃപ നിഷ്കളങ്ക ഭാവത്തോടെ പറഞ്ഞു. അവൾ പറയുന്നത് കേട്ട് ഋഷി കുറച്ചുസമയം അവളെ തന്നെ നോക്കി നിന്നു. മോളെ കൃപ കൃഷ്ണൻ തന്നേക്കാൾ വലിയ കളി കളിച്ചു തന്നെയാണ് ഋഷി ഇന്നീ കസേരയിലിരിക്കുന്നത്,

എത്ര കളിച്ചാലും പഠിത്തം വിട്ടൊരു കളിയും ഉണ്ടായിട്ടില്ല, അതുകൊണ്ടെന്താ ഇന്നെനിക്ക് നല്ല അന്തസ്സുള്ള ഒരു ജോലിയുണ്ട്, കളിയും തമാശയുമൊക്കെ ഈ പ്രായത്തിൽ പതിവാണ്, പക്ഷേ അത് പഠനം മറന്നായാൽ വല്ലവരുടെയും അടുക്കളപ്പുറത്ത് കഴിയേണ്ടിവരും ശിഷ്ടകാലം, ഉപദേശിക്കുകയാണ് എന്നു തോന്നരുത് പെൺകുട്ടി ആയതു കൊണ്ട് ജീവിതം തമാശയായി എടുക്കുകയുമരുത്, നിങ്ങൾ സ്ത്രീകൾക്ക് വിവാഹത്തേക്കാൾ അത്യാവശ്യം വേണ്ടത് ഒരു ജോലിയാണ്, അതിനുള്ള പക്ക്വതയെങ്കിലും കാണിക്ക്, ഋഷി വളരെ സൗമ്യമായി തന്നെയാണവളോട് സംസാരിച്ചത്. വല്ലവരുടെയും അടുക്കളപ്പുറത്ത് ജീവിതം തളയ്ക്കാൻ ഇത് കൃതി കൃഷ്ണനല്ല കൃപകൃഷ്ണനാണ്, പിന്നെ ഉപദേശം...., ഒരു പത്തുമുപ്പത് പേരെങ്കിലും ഉള്ള കുടുംബത്തിൽ ആകെയുള്ള ഒരു പെൺകുട്ടിയുടെ അവസ്ഥയൊന്ന് ആലോചിച്ചു നോക്കൂ, ഞാൻ ഇപ്പോൾ പഠിക്കുന്നത് പോലും പലരോടും യുദ്ധം ചെയ്തിട്ടാ, അടച്ചിട്ട കൂട്ടിൽ കഴിയുന്ന ഏതു കിളികൾക്കും പുറത്തിറങ്ങിയാൽ ഒന്നു പറക്കാൻ തോന്നും,

അത്തരം ചില കുസൃതികളെ ഞാനും കാണിച്ചിട്ടുള്ളൂ, എന്നെ പഠിപ്പിക്കുന്ന ഏതൊരു അധ്യാപകനോട് ചോദിച്ചാലും കൃപ കൃഷ്ണൻ പഠനത്തിൽ മോശമാണെന്ന് ഒരാളും പറയില്ല ഇത്തിരി കുറുമ്പ് കൂടുതലാണെന്നല്ലാതെ പഠനത്തിലൊന്നും ഞാൻ ഇതുവരെ ഒരു ഉഴപ്പും കാണിച്ചിട്ടില്ല. അവൾ നന്നായി സംസാരിക്കുന്നതുപോലെ ഋഷിക്ക് തോന്നി, ഇത്രയും പക്വതയൊന്നും താൻ അവളിൽ നിന്നും പ്രതീക്ഷിച്ചിട്ടില്ല, അവൻ പോലുമറിയാതെ അവളെ നോക്കിയിരുന്നു പോയി. ഇന്നെന്റെ കഷ്ടകാലത്തിന് ഞാനൊരു കള്ളത്തരം കാണിച്ചു, അത് കയ്യോടെ പൊക്കി ഇവിടെയും എത്തിച്ചു ദയവുചെയ്ത് ഇത് മിസ്സിനോട് പറയരുത് എന്തെങ്കിലും ഒരു ചെറിയ മെഡിസിൻ തന്നു സഹായിക്കണം, വീട്ടിലറിഞ്ഞാൽ വൻ സീനാവും കൃപ കൈകൂപ്പിക്കൊണ്ട് ഋഷിയോട് പറഞ്ഞു. ആ ആലോചിക്കാം എന്തായാലും ഒരു കാര്യവുമില്ലാതെ ബസ്സിൽ വെച്ച് എന്റെ മെക്കിട്ട് കയറിയതല്ലേ, കാണുമ്പോൾ കാണുമ്പോൾ എന്നോട് ചാടി കളിക്കാനും വരുന്നുണ്ട്,ഇപ്പോൾ എനിക്കായി ദൈവം തന്നെ ഈ അവസരം ഞാൻ വെറുതെ കളയാണോ...? ഋഷി ഒരു കള്ളച്ചിരിയോടെ അവളെ നോക്കി. പ്ലീസ് ഇത് വീട്ടിലറിഞ്ഞാൽ എന്റെ പഠിപ്പു വരെ നിർത്തിക്കളയും,

ചെറിയച്ഛൻ പോലും കൂടെ നിൽക്കില്ല ഞാൻ എന്തുവേണമെങ്കിലും ചെയ്യാം ഇത് ആരോടും പറയരുത് ഓഹോ എന്തുവേണമെങ്കിലും ചെയ്യുമോ..?ഋഷി അവളെ സംശയത്തോടെ നോക്കിക്കൊണ്ട് ചോദിച്ചു. എന്ത് വേണമെങ്കിലും ചെയ്യാം, സഹായിക്കണം ഡോക്ടർ സാറേ,.... ഈ സാറേ വിളിയിൽ ഒരു ആക്കലില്ലേ എന്നൊരു സംശയം... അയ്യോ ഒരിക്കലുമില്ല ഞാൻ ആത്മാർത്ഥമായി പറഞ്ഞതാണ്, അങ്ങനെയാണെങ്കിൽ ആ ടേബിളിലുള്ള ഓയിൽമെന്റ് എടുത്ത് ഇങ്ങോട്ട് വാ, ഋഷി പറയുന്നത് കേട്ട് കൃപ സംശയത്തോടെ ഓയിൽമെന്റ് എടുത്തവനരികിൽ വന്നു നിന്നു. ഒരു കാരണവുമില്ലാതെ എന്റെ കാലിൽ മുറിവ് ഉണ്ടാക്കിയ ആളല്ലേ...? അപ്പോൾ ആ ആളുതന്നെ ഒരു നേരം ഓയിൽമെന്റ് പുരട്ടി താ ഋഷി അവളെ നോക്കി അത് പറഞ്ഞ് കാലു വലിച്ച് അവൾക്ക് മുൻപിലേക്ക് വെച്ചു. അവൾ മടിച്ചു മടിച്ച് ഋഷിയുടെ കാലിൽ ഓയിൽമെന്റ് പുരട്ടാൻ വേണ്ടി നോക്കിയതും അവന്റെ കാല് കണ്ടവൾക്ക് സങ്കടം വന്നു. കാലിൽ നല്ലൊരു മുറിവുണ്ട് പഴുപ്പു വന്നിട്ടുണ്ട് അവൾ അവനെ സങ്കടത്തോടെ നോക്കി. സത്യമായിട്ടും ഇങ്ങനെ മുറിവുണ്ടാകും എന്ന് ഞാനും ഓർത്തില്ല, അപ്പോഴത്തെ ദേഷ്യത്തിൽ ചെയ്തു പോയതാ എന്നോട് ക്ഷമിക്കണം അവൾ സങ്കടത്തോടെ പറഞ്ഞു. അഹ് ,.

പിന്നെ ഹൈ ഹീലുള്ള ചെരുപ്പിട്ട് ചവിട്ടിയാൽ ഇതല്ല ഇതിനപ്പുറമുണ്ടാവും കാലിൽ ഓട്ട വീഴാത്തത് എന്റെ ഭാഗ്യം. കൃപ ഒന്നും മിണ്ടാതെ ഋഷിയുടെ കാലെടുത്ത് ഒരു സ്റ്റൂളിലേക്ക് വെച്ച് പതിയെ മരുന്ന് പുരട്ടിക്കൊടുത്തു, മുറി കാണുന്തോറും അവൾക്ക് വല്ലാത്ത കുറ്റബോധം തോന്നി. ബസ്സിൽ മനപ്പൂർവ്വം മെക്കിട്ട് കേറാൻ വരുന്ന ചില കോഴികളുണ്ട് അതുപോലെ ആരെങ്കിലുമാവും എന്ന് വിചാരിച്ചിട്ടാണ് ഇങ്ങനെ ചെയ്തത് ഒരിക്കലും ഇങ്ങനെ ഒരു റിസൾട്ട് പ്രതീക്ഷിച്ചില്ല. അകത്ത് എന്ത് സംഭവിക്കുന്നു എന്നറിയാതെ സൈനു വും ലച്ചുവും കൂട്ടിലിട്ട മെരുകിനെപ്പോലെ അങ്ങോട്ടുമിങ്ങോട്ടും നടന്നു. ടീ എന്താ പരിശോധന ഇതുവരെ കഴിയാത്തത് ഇതെന്താ അവളുടെ ഡെലിവറി എടുക്കാനാണോ നമ്മളെ പുറത്താക്കിയത് ഒരുപാട് നേരമായല്ലോ...? ലച്ചു ഋഷിയുടെ ക്യാബിനിലേക്ക് നോക്കിക്കൊണ്ട് സൈനുവിനോട് ചോദിച്ചു. രണ്ടും അടിച്ചു പിരിഞ്ഞോ എന്നാണ് എന്റെ പേടി, കൃപുവിനെ നമുക്കറിഞ്ഞുകൂടെ ഇഷ്ടമില്ലാത്തതൊന്നും കേട്ട് നിൽക്കില്ല,

അയാളും ഒട്ടും മോശമല്ല സൈനു ആവലാതോയോടെ പറഞ്ഞു. എന്തായാലും അയാളെയൊന്ന് കാണണമെന്ന് മനസ്സിൽ ആഗ്രഹിച്ചപ്പോൾ തന്നെ മുൻപിൽ വന്നു, നോക്കിനിന്നു പോകും അത്രയ്ക്ക് സുന്ദരനാണ്, ഒരു ഡോക്ടറെ കല്യാണം കഴിക്കുന്നതിൽ എനിക്ക് വിരോധമൊന്നുമില്ല ലച്ചു നാണത്തോടെ പറഞ്ഞു. ദേ പെണ്ണേ കൂടുതൽ പറഞ്ഞാൽ ഞാൻ നിന്റെ തലമണ്ടയടിച്ചു പൊട്ടിക്കും, സന്ദർഭത്തിനനുസരിച്ചെങ്കിലും പെരുമാറാൻ പഠിക്കെടീ , മനുഷ്യനിവിടെ തീ തിന്നു നിൽക്കുമ്പോളാണ് അവളുടെയൊരു വായിനോട്ടം സൈനു ഉള്ള കലിപ്പ് മൊത്തം അവളോട് തീർത്തു. തൽക്കാലം ഇതു മതി, വേദനയ്ക്ക് കുറച്ച് ആശ്വാസമുണ്ട്, ഒരു മധുര പ്രതികാരം ചെയ്ത ആശ്വാസം, താൻ ഇവിടെ ഇരിക്ക്‌ ഋഷി തന്റെ മുൻപിലുള്ള ചെയറു കാണിച്ച് കൃപയോട് പറഞ്ഞു.

പുറത്ത് നിൽക്കുന്ന ഹരിത സിസ്റ്ററോട് അകത്തേക്ക് വരാൻ പറഞ്ഞ് കൃപയോടെ കൂടെ വന്നവരോട് താൻ വിളിക്കുന്നുണ്ടെന്ന് പറയാൻ പറഞ്ഞു കുറച്ച് സമയം കഴിഞ്ഞപ്പോൾ ലച്ചുവും സൈനുവും ടീച്ചേഴ്സും ആ റൂമിലേക്ക് വന്നു. പേടിക്കാനൊന്നുമില്ല ഇത് ചെറിയ ഒരു ഗ്യാസ്ട്രബിളാണ് മെഡിസിൻ കുറച്ചിട്ടുണ്ട്, ഇത് കഴിച്ചാൽ മാറിക്കോളും, പ്രിസ്ക്രിപ്ഷൻ അവർക്ക് നേരെ നീട്ടിക്കൊണ്ട് ഋഷി പറഞ്ഞു. പ്രിസ്ക്രിപ്ഷൻ വാങ്ങി പ ഡോക്ടറോട് നന്ദി പറഞ്ഞ് ആദ്യം പുറത്തിറങ്ങിയത് വനജ മിസ്സാണ് അവർക്ക് പുറകിൽ സൈനുവും ലച്ചുവും ഏറ്റവും അവസാനം ഇറങ്ങിയ കൃപ വീണ്ടും ഋഷിയെ ഒന്ന് തിരിഞ്ഞു നോക്കി. അവളുടെ നോട്ടം കണ്ട് ഋഷിയും അവളെ ഒന്നു നോക്കി. കണ്ണുകൾ കൊണ്ടവൾ വീണ്ടും സോറി പറഞ്ഞപ്പോൾ അവൻ അവളെ നോക്കിയൊന്നു പുഞ്ചിരിച്ചു. അവളും ഒരു പുഞ്ചിരിയോടെ ആ റൂം വിട്ടിറങ്ങി..... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...