💞 പെയ്‌തൊഴിയാതെ💞 : ഭാഗം 19

രചന: RAFEENA MUJEEB

" കതകിൽ ശക്തമായ മുട്ട് കേട്ടാണ് കൃപ കണ്ണ് തുറന്നത്. നേരം ഒരുപാട് പുലർന്നിരിക്കുന്നു. ജാലകചില്ലിലൂടെ ഇളവെയിൽ തന്നെ എത്തിനോക്കുന്നു, ഇതുവരെ തന്നെ പുറത്തേക്ക് കാഞ്ഞിട്ടാണോ എന്തോ കുഞ്ഞിക്കിളി പതിവില്ലാതെ മുറ്റത്തുള്ള മൂവാണ്ടൻ മൂച്ചിയുടെ ചില്ലയിൽ വന്നു കലപില കരയുന്നുണ്ട്, അവൾ ചാടി പിടിച്ചെഴുന്നേറ്റ് ഊർന്നു വീണ തലമുടിപിടിച്ച് കെട്ടിയൊതുക്കി കതക് പോയി തുറന്നു. അമ്മയാണ്, അവളമ്മയെ നോക്കി ഒന്ന് പുഞ്ചിച്ചു. എത്ര നേരമായി മോളെ വിളിക്കുന്നു. നീയെന്തേ എഴുന്നേൽക്കാനിത്ര വൈകി...? നിനക്ക് ഇന്ന് കോളേജിലോന്നും പോകണ്ടേ,..? അവളെ കണ്ടതും അവർ സംശയത്തോടെ ചോദിച്ചു. അയ്യോ!! ഞാൻ അറിഞ്ഞില്ല ഇത്ര വൈകിയതൊന്നും നല്ല ഉറക്കമായിരുന്നു, അമ്മ താഴേക്ക് പൊക്കോ ഞാൻ കുളിച്ച് പെട്ടെന്ന് റെഡിയായി വരാം, അവൾ അമ്മയെ കെട്ടിപ്പിടിച്ച് ഒരുമ്മ കൊടുത്തു കൊണ്ട് പറഞ്ഞു. ഈ പെണ്ണിന്റെയൊരു കാര്യം അവർ അവളെ നോക്കി ചിരിച്ച് താഴേക്കിറങ്ങി , അവൾ ധൃതിയിൽ ഫ്രഷാവാൻ വേണ്ടി ബാത്‌റൂമിലേക്കോടി.

റെഡിയായി താഴേക്ക് ചെല്ലുമ്പോഴേക്കും യശോദ അവൾക്കുള്ള ഭക്ഷണമെടുത്തു വച്ചിരുന്നു, ഒരുപാട് വൈകിയെന്ന് പറഞ്ഞ് അത് കഴിക്കാൻ കൂട്ടാക്കാതെ ഓടിയ അവളുടെ പുറകെ ചെന്ന് യശോദ ഭക്ഷണം വാരിക്കൊടുത്തു. ഭക്ഷണം കഴിച്ചു മുറ്റത്തേക്കിറങ്ങിയപ്പോഴേക്കും ദത്തൻ ബൈക്ക് സ്റ്റാർട്ട് ചെയ്തു നിൽപ്പുണ്ടായിരുന്നു. ചെറിയച്ഛാ ഇന്ന് ഒരുപാട് വൈകി, സ്ഥിരം പോകുന്ന ബസ്സ് പോയിക്കാണും എന്നെ കോളേജ് വരെ വിടണേ പ്ലീസ് അവൾ അപേക്ഷയോടെ പറഞ്ഞു. ഞാൻ നിന്നോട് പറയാനിരിക്കുകയായിരുന്നു എനിക്ക് അത്യാവശ്യമായി പുറത്തു പോകാനുണ്ട്, ഇന്ന് നീ എങ്ങനെയെങ്കിലും പൊക്കോ, അയ്യോ അത് പറഞ്ഞാൽ പറ്റില്ല ചെറിയച്ഛാ,ഞാൻ ഇനി ബസ്സ് പിടിച്ച് അവിടെ എത്തുമ്പോഴേക്കും ഒരുപാട് നേരമാകും , എന്നെയൊന്നു കൊണ്ടു വിട് ചെറിയച്ഛാ അവൾ കെഞ്ചിക്കൊണ്ട് പറഞ്ഞു .

എന്നാ നീ ഒരു കാര്യം ചെയ്യ് ഇന്ന് നീ ധ്രുവിന്റെ കൂടെ പൊയ്ക്കോ, അവൻ നിന്നെ കോളേജിൽ ഡ്രോപ്പ് ചെയ്തോളും, കാറിന്റെ കീയും കറക്കി അവിടേക്ക് വന്ന ധ്രുവിനെ നോക്കി ദത്തൻ പറഞ്ഞു . അതുവേണ്ട, ചെറിയച്ഛനെന്നെ കൊണ്ടുവിടാൻ പറ്റില്ലെങ്കിൽ അത് പറ ഞാൻ എങ്ങനെയെങ്കിലും പൊയ്ക്കോളാം കൃപ മുഖം കറുപ്പിച്ച് കൊണ്ടു പറഞ്ഞു. അതെന്താ നിനക്ക് അവന്റെ കൂടെപോയാൽ അവനും ആ വഴിക്കല്ലേ പോകുന്നത്,..? നിന്നെ അവിടെ ഇറക്കുന്നതിന് അവന് പ്രത്യേകിച്ച് ചിലവൊന്നും വരുന്നില്ലല്ലോ..? ദത്തന്റെ സ്വരവും കടുക്കാൻ തുടങ്ങി. എനിക്ക് സൗകര്യമില്ലയെന്നു പറഞ്ഞില്ലേ..? ഞാൻ വല്ല ഓട്ടോയും പിടിച്ചു പൊയ്ക്കോളാം, കൃപ അതും പറഞ്ഞവിടെ നിന്നും പോകാൻ തുടങ്ങി. നീയൊന്ന് അവിടെനിന്നെ, നിനക്ക് ധ്രുവിന്റെ കൂടെ പോകാൻ പറ്റുമെങ്കിൽ പോയാൽ മതി അല്ലെങ്കിൽ പറ ഞാൻ ഡ്രൈവറെ വിളിക്കാം ഇനിമുതൽ അയാളുടെ കൂടെ പോയാൽ മതി കോളേജിലേക്ക് ദത്തൻ ദേഷ്യത്തോടെ പറഞ്ഞു. ഇതു വലിയ കഷ്ടമാണ് ചെറിയച്ഛാ അവൾ നിലത്ത് ആഞ്ഞുച്ചവിട്ടിക്കൊണ്ട് പറഞ്ഞു

. നീ ഇന്ന് അവന്റെ കൂടെ പോയാൽ മതി എന്നിട്ട് നിനക്ക് എന്ത് സംഭവിക്കുന്നുവെന്ന് എനിക്ക് കാണണം, ടാ ധ്രുവാ നീയിവളെ കോളേജിന്റെ അകത്ത്ക്കൊണ്ടുപോയി ഇറക്കിവിടണം, പകുതി വഴിയിൽ ഇറങ്ങിയാൽ എന്നോട് പറയണം ധ്രുവിനെ നോക്കി ദത്തനത് പറഞ്ഞവിടെ നിന്നും പോയി. കൃപ ദേഷ്യത്തോടെ ധ്രുവിനെ നോക്കി, ദേഷ്യം മുഴുവൻ നടത്തത്തിൽ കാണിച്ച് അവന്റെ കാറിനടുത്തേക്ക് നടന്നു. എന്നെ ഡ്രൈവനാക്കാനാണ് തമ്പുരാട്ടിയുടെ ഉദ്ദേശമെങ്കിൽ നടക്കില്ല മോളെ.. ഫ്രണ്ടിൽ വന്നിരുന്നില്ലെങ്കിൽ ഞാൻ ചെറിയമ്മാമയെ വിളിച്ചു കാര്യം പറയും, പുറകിലെ ഡോർ തുറന്ന് അവിടെ കയറാൻ നോക്കിയ കൃപയോട് ധ്രുവ് പറഞ്ഞു. അവനെ ഉണ്ടക്കണ്ണ്ക്കൊണ്ട് നോക്കി ഒന്ന് പേടിപ്പിച്ച ശേഷം അവള് ഡോർ വലിച്ചടച്ച് ഫ്രണ്ടിൽ വന്നിരുന്നു. ഔവ്..! എന്റെ കാറിപ്പോ നീ തവിടുപൊടിയാക്കുമോ..? അവൻ ചിരിച്ചുക്കൊണ്ട് ചോദിച്ചു. അവൾ അവനെ തുറിപ്പിച്ചൊന്നു നോക്കിയതല്ലാതെ മറുപടിയൊന്നും കൊടുത്തില്ല.

യാത്രയ്ക്കിടയിൽ പലതവണ ധ്രുവ് ഓരോന്ന് പറഞ്ഞു കൃപയെ ചൊറിയാൻ നോക്കിയെങ്കിലും അവൾ ഒന്നും മിണ്ടാതെ ഹെഡ്സെറ്റ് എടുത്ത് ഫോണിൽ തിരികി പാട്ടും കേട്ട് ഒരു സൈഡിലേക്ക് തിരിഞ്ഞ് കണ്ണുകളടച്ചിരുന്നു. കൃപ ധ്രുവിന്റെ എന്റെ കൂടെ വന്നിറങ്ങുന്നത് കണ്ട് അവളുടെ കൂട്ടുകാർ മുഴുവൻ മിഴിച്ചു നോക്കുന്നുണ്ട്. അവർ തമ്മിലുള്ള വഴക്ക് ഏറെക്കുറെ എല്ലാവർക്കുമറിയാം. ഇതെന്താ കീരിയുംപാമ്പും ഒരുമിച്ച്, നിങ്ങൾ തമ്മിലുള്ള വഴക്കൊക്കെ അവസാനിപ്പിച്ചോ..? നവീൻ ഒരു പുഞ്ചിരിയോടെ ധ്രുവിന് കൈ കൊടുത്തുക്കൊണ്ട് ചോദിച്ചു. അതിന് ഞങ്ങൾ തമ്മിൽ വഴക്കാണെന്ന് ആരു പറഞ്ഞു ഇതൊക്കെ വെറും സൗന്ദര്യ പിണക്കങ്ങളല്ലേ..? ധ്രുവ് കൃപയെ നോക്കി ചിരിച്ചുക്കൊണ്ട് മറ്റുള്ളവരോട് പറഞ്ഞു. അവളതിന് അയാളെ ഒന്ന് സൂക്ഷിച്ചു നോക്കിയതല്ലാതെ മറുപടിയൊന്നും പറഞ്ഞില്ല. അല്ലെങ്കിലും ധ്രുവ് ചേട്ടനോടൊക്കെ ആർക്കാ വഴക്കി ടാൻ തോന്നുന്നേ? , ദിവസം കഴിയുന്തോറും സൗന്ദര്യം കൂടിക്കൂടി വരുവാ ഐപിഎസ് ഓഫീസർക്ക് ലച്ചു ധ്രുവിനെ നോക്കി പുഞ്ചിരിയോടെ പറഞ്ഞു. അത് കേട്ടപ്പോൾ ട കൃപ അവളെ ഒന്ന് തുറപ്പിച്ചു നോക്കി, ഇതൊക്കെ എന്ത് എന്ന ഭാവമായിരുന്നു ലക്ഷ്മിയുടെ മുഖത്ത്,

ധ്രുവാണെങ്കിൽ കൃപയെ നോക്കി ഷർട്ടൊന്നു പൊക്കി വലിയ ഗമയിൽ നിന്നു. ലേശം ഉളുപ്പ് സൈനു ലെച്ചുവിനെ നോക്കി ആരും കേൾക്കാതെ അവളുടെ ചെവിയിൽ പറഞ്ഞു. ഒട്ടും പ്രതീക്ഷിക്കേണ്ട, ഞാൻ സൗന്ദര്യം ആസ്വദിക്കുന്ന ഒരാളായിപ്പോയി അതിനു ഞാൻ എന്ത് പിഴച്ചു,...? യാതൊരു കൂസലുമില്ലാതെ ലച്ചു സൈനുവിന്റെ ചെവിയിൽപറഞ്ഞു. അത് കേട്ടപ്പോൾ സൈനു പല്ലിറുമ്പിക്കൊണ്ട് അവളെ അടിമുടി ഒന്ന് നോക്കി. ലച്ചു അവളെ നോക്കി ഫുൾ പല്ലും കാണത്തക്കവിധത്തിൽ ഒരു വളിച്ച ചിരി പാസാക്കി. നിങ്ങൾ വരുന്നുണ്ടെങ്കിൽ വാ ഇവിടെ കിന്നാരം പറഞ്ഞു നിൽക്കാതെ എല്ലാവരെയും നോക്കിയത് പറഞ്ഞ് കൃപ ചാടിത്തുള്ളി അവിടെ നിന്നും പോയി. ബാക്കിയുള്ളവർ ധ്രുവിനോട് യാത്ര പറഞ്ഞ് അവൾക്ക് പുറകെ നടന്നു. കൃപ എല്ലാവരെയുംക്കൊണ്ട് നേരെ പോയത് കോളേജ് കാന്റീനിലേക്കായിരുന്നു. എനിക്ക് നിങ്ങളോട് ഒരു കാര്യം പറയാനുണ്ട് അവിടെയിരുന്ന് ചൂടുള്ള ചായ ഊതി കുടിക്കുന്നതിനിടയിൽ കൃപ പറഞ്ഞു.

എല്ലാവരും കാര്യമറിയാൻ അവളുടെ മുഖത്തേക്ക് ഉറ്റുനോക്കി. എനിക്കു പ്രേമ പനി പിടിച്ചോ എന്നൊരു ഡൗട്ട്, എല്ലാവരെയും നോക്കി ഒരു ചമ്മലോടെ കൃപ പറഞ്ഞു. ങേ,!! എല്ലാവരുടെ മുഖത്തും ഒരു ഞെട്ടലാണ് ആദ്യമുണ്ടായത് അവൾ പറയുന്നത് കേട്ടിട്ട് . സത്യം എന്റെ ഉള്ളിലും ഒരാൾ കയറിക്കൂടി യിരിക്കുന്നു അവൾ നാണത്തോടെ പറഞ്ഞു. പടച്ചോനെ ഇതിന്റെ മുഖത്ത് ഇതുവരെ കാണാത്ത ഭാവങ്ങലാണല്ലോ ഈ കാണുന്നത് റഹീം അവളെ നോക്കി അത്ഭുതത്തോടെ പറഞ്ഞു. അതിരിക്കട്ടെ ആരാ ഹതഭാഗ്യൻ, ധ്രുവ് ചേട്ടനെങ്ങാനുമാണോ...? ലച്ചു ഒരു കള്ളച്ചിരിയോടെ അവളോട് ചോദിച്ചു. പിന്നേയ് ...!! അയാളെ എന്റെ പട്ടി പ്രേമിക്കും ഇത് വേറെ ആളാണ്, അവൾ പുച്ഛത്തോടെ പറഞ്ഞു. നീ നിർബന്ധിക്കുകയാണെങ്കിൽ നിന്റെ പട്ടിയാവാൻ ഞാൻ തയ്യാറാണ് കൃപയെ നോക്കി ജയൻ സ്റ്റൈലിൽ ലച്ചു പറഞ്ഞു. ഇതിനെ ഇന്ന് ഞാൻ തല്ലിക്കൊല്ലും, കയ്യിലിരുന്ന ബാഗെടുത്ത് ലക്ഷ്മിയുടെ തലയ്ക്കിട്ടൊന്നു കൊടുത്തു സൈനു പറഞ്ഞു. നിങ്ങൾ ഇങ്ങനെ വഴക്കിടാതെ കാര്യത്തിലേക്ക് വാ, കൃപു നീ പറ ആരാണ് ആള് നവീൻ അവളെ നോക്കി ചോദിച്ചു. നമ്മുടെ ഡോക്ടർ ഇല്ലേ ഋഷികേശ് അയാളാണ് കക്ഷി കൃപ ചമ്മലോടെ പറഞ്ഞു.

ഏത് നമ്മുടെ ഗൈനക്കോളജി ഡോക്ടറോ..?ഇന്നലെവരെ പൊരിഞ്ഞ വഴക്കായിരുന്നല്ലോ രണ്ടും അതിനിടയിൽ എങ്ങനെ കയറിപ്പറ്റി നിന്റെ മനസ്സിലേക്ക് ആയാൾ , സൈനു സംശയത്തോടെ ചോദിച്ചു. വഴക്കൊക്കെ ഇന്നലെ തന്നെ തീർന്നില്ലേ, പിന്നെ ഒരാൾക്ക് ഒരാളോട് ഇഷ്ടം തോന്നാനത്ര വലിയ സമയമൊന്നും വേണ്ട. അതും ശരിയാ ഈ ഋഷി ഡോക്ടറെ എനിക്കറിയാം എന്റെ ചെറിയച്ഛന്റെ വീടിനടുത്താണ് അയാളുടെ വീട്, അച്ഛനും അമ്മയും റിട്ടേർഡ് അധ്യാപകരാണ്, നല്ല ഫാമിലിയാണ് അതിലുപരി നല്ല മനുഷ്യരാണ്, മറ്റുള്ളവരോട് മാന്യമായ പെരുമാറ്റം ഋഷി ഡോക്ടറെക്കുറിച്ചും എല്ലാവർക്കും നല്ല അഭിപ്രായമാണ് നീ ധൈര്യമായിട്ട് മുൻപോട്ടു പൊയ്ക്കോ, നവീൻ അവളെ സപ്പോർട്ട് ചെയ്തു കൊണ്ടു പറഞ്ഞു. അതിന് അയാൾക്ക് ഇവളെ ഇഷ്ടമാണെന്ന് കൂടി അറിയണ്ടേ..? സച്ചു എല്ലാവരോടുമായി ചോദിച്ചു.

എനിക്ക് ഒരാളോട് ഇഷ്ടം തോന്നിയാൽ അത് ഞാൻ നേരിട്ട് തന്നെ പറയും മറുപടി എന്താണെങ്കിലും നേരിടാനും ഞാൻ തയ്യാറാണ്, അതിനുള്ള ധൈര്യമൊക്കെ എനിക്കുണ്ട്, അല്ലാതെ മനസ്സിൽ വച്ചിരിക്കുന്ന സ്വഭാവം ഈ കൃപയ്ക്കില്ല , കൃപ അവസാനം പറഞ്ഞ വാക്കുകൾ നവീനിനെ നോക്കിയാണ് പറഞ്ഞത്. അവൾ പറയുന്നത് കേട്ട് അവൻ ഒന്നു പതറി, മുഖത്തൊരു വെപ്രാളം പ്രകടമായി, അവൻ പോലുമറിയാതെ അവന്റെ കണ്ണുകൾ ആതുവിന്റെ മുഖത്തേക്ക് നോക്കി . കൃപയുടെ കണ്ണുകൾ തനിക്ക് നേരെയാണെന്ന് മനസ്സിലായതും അവൻ ആതുവിൽ നിന്ന് നോട്ടം പിൻവലിച്ചു. ഉള്ളിലുള്ള പതർച്ച മറ്റുള്ളവരറിയാതിരിക്കാൻ അവൻ നന്നായി പാടുപെട്ടു...... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...