💞 പെയ്‌തൊഴിയാതെ💞 : ഭാഗം 3

രചന: RAFEENA MUJEEB

 "അതികം താമസിയാതെ അവരുടെ മുമ്പിലായി രുചിയൂറും പലതരം വിഭവങ്ങൾ അണിനിരന്നു. കടലിലെയും കരയിലെയും ഒട്ടുമിക്ക നോൺ വിഭവങ്ങളും അതിലുണ്ടായിരുന്നു. എല്ലാത്തിനും അവരുടേതായ ശൈലിയിൽ മനോഹരമായി തന്നെ അവർ അതിനെ അലങ്കരിച്ചിട്ടുണ്ട്, കണ്ടാൽ തന്നെ വയറും മനസ്സും ഒരുപോലെ നിറയുന്ന ഭക്ഷണത്തിന്റെ മനോഹരമായ കാഴ്ച്ച. തറവാട്ടിലെ ആരും തന്നെ മാംസാഹാരം കഴിക്കില്ലെങ്കിലും ഈ കാര്യത്തിൽ കൃപ ചെറിയച്ഛനെ പോലെയാണ്, നോൺ വെജ് കണ്ടാൽ ആന ഓടക്കാട്ടിൽ കയറിയപോലെയാണെന്നും പറഞ്ഞു സൈനു എപ്പോഴും കളിയാക്കും, വല്ലപ്പോഴും അവര് കൊണ്ടുവരുന്ന ഭക്ഷണത്തിൽ കയ്യിട്ടു വാരുന്നതല്ലാതെ അവൾക്ക് വേറെ നോൺ വെജ് കഴിക്കാൻ മാർഗ്ഗമില്ലല്ലോ, അപ്പോൾ അതൊക്കെ കാണിച്ചില്ലെങ്കിലേ അത്ഭുതമുള്ളൂ. കൃപ മാംസാഹാരം കഴിക്കുന്നത് കൃതിക്കറിയാമെങ്കിലും അവൾ ഇതുവരെ ആരോടും അതു പറഞ്ഞിട്ടില്ല,

കൃതി പിന്നെ നല്ലേടത്തെ എല്ലാ ആചാരങ്ങളും പാലിച്ചു പോരുന്ന ഒരു പാവം മിണ്ടാപ്പൂച്ചയായിരുന്നു, കൃപ അതിന് നേരെ വിപരീതവും. എന്നാ തുടങ്ങിയാലോ സൈനു അതിലേക്ക് നോക്കി മൂന്നുപേരോടുമായി ചോദിച്ചു. പിന്നീട് അവിടെ ഒരാക്രമണയിരുന്നു, കുറച്ചു സമയം കഴിഞ്ഞപ്പോൾ ആ ടേബിൾ ഒരു യുദ്ധഭൂമിയെ പോലെ തോന്നിച്ചു. മുള്ളും എല്ലും മാത്രമായി ടേബിൾ നിറഞ്ഞു. നമുക്ക് നാലു ഐസ് ക്രീം കൂടി പറയാം ടീ.... എല്ലാം കഴിഞ്ഞു ഒരേമ്പക്കവുമിട്ടു സൈനു പറഞ്ഞു. കൂട്ടത്തിൽ ഇത്തിരി തടി കൂടുതലുള്ളത് സൈനുവിനാണ്.. ടൗണിൽ മരം മില്ല് നടത്തുന്ന അബ്ദുറഹ്മാൻ ഹാജിയുടെയും നഫീസ യുടെയും നാലുമക്കളിൽ രണ്ടാമത്തെ മകളാണ് സൈനബ എന്ന സൈനു, മൂത്തത് സിറാജ് ദുബായിലാണ്,

അവൾക്ക് താഴെ രണ്ട് അനിയന്മാരാണ്. വീട്ടിൽ ദിവസേന വെക്കുന്ന മട്ടൻ ബിരിയാണിയുടെയും പോത്ത് ബിരിയാണിയുടെയും അനന്തരഫലം സൈനുവിനെയും അനിയന്മാരെയും കണ്ടാലറിയാം, അത്യാവശ്യം നല്ല തടിയുണ്ട് അവരെ കാണാൻ. സൈനു വിന്റെ കൂടെ കൂടിയതിനു ശേഷമാണ് കൃപ മാംസാഹാരം ഇങ്ങനെ ആസ്വദിച്ചു കഴിക്കാൻ തുടങ്ങിയത്. അവളുടെ ഉമ്മ ഉണ്ടാക്കുന്ന മട്ടൻ ബിരിയാണിയും ബീഫ് വരട്ടും നെയ്ച്ചോറും ചിക്കൻ കറിയും നെയ്പ്പത്തലും എല്ലാം കൃപയുടെ ഇഷ്ടവിഭവങ്ങളാണ്. അതുകൊണ്ടുതന്നെ നഫീസ വിശേഷപ്പെട്ട വല്ലതും ഉണ്ടാക്കിയാൽ ഒരു പങ്കു കൃപയ്ക്ക് കൊടുത്തു വിടാൻ മറക്കാറില്ല. സൈനുവും കൃപയും പത്താം ക്ലാസ് മുതൽ ഒരുമിച്ചാണ്, അന്നു തുടങ്ങിയ സൗഹൃദമാണ് അവർ തമ്മിൽ. അന്ന് അവരുടെ കൂട്ടത്തിൽ റഹീമും ഉണ്ടായിരുന്നു. ബാക്കിയുള്ളവരൊക്കെ ഡിഗ്രിക്ക് കൂടെ കൂടിയതാണ്.

റഹീമിന്റെ ഉമ്മയും ഉപ്പയും വിദേശത്താണ്. അവനും അനിയനും നാട്ടിൽ ഉമ്മുമ്മയുടെയും വല്യുപ്പയുടെയും കൂടെയാണ്. നവീനിന്റെ അച്ഛൻ ഒരു ലോറി ഡ്രൈവറാണ്. അമ്മ രാധിക വീട്ടമ്മയാണ്. അവന് താഴെ ഒരു അനിയനും അനിയത്തിയും ഉണ്ട്. സച്ചുവിന്റെ പാരൻസ് വിദേശത്തായിരുന്നു. ഈയടുത്താണ് നാട്ടിൽ സ്ഥിരതാമസമാക്കിയത്. അതുകൊണ്ട് തന്നെ അവന്റെ പഠിത്തമൊക്കെ വിദേശത്തായിരുന്നു. അവന് ഒരു ചേച്ചിയുണ്ട് ബാംഗ്ലൂരിൽ നഴ്സായി ജോലി ചെയ്യുന്നു. വിദ്യയുടെ അച്ഛൻ വില്ലേജ് ഓഫീസറായി ജോലി ചെയ്യുന്നു. അമ്മ നന്ദിനി തൊട്ടടുത്തുള്ള ഒരു അംഗൻവാടിയിൽ ടീച്ചർ ആയി ജോലി നോക്കുന്നു. വിദ്യാലക്ഷ്മി ഒറ്റ മോളാണ് അവർക്ക്. കൂട്ടത്തിലേറ്റവും പാവവും മിണ്ടാപൂച്ചയും പഠിക്കാൻ മിടുക്കിയും ആതിരയാണ്, എല്ലാവർക്കും പ്രിയപ്പെട്ട ആതു. ചെറുപ്പത്തിലെ അവളുടെ അച്ഛൻ മരിച്ചു,

പിന്നീട് അവളുടെ അമ്മ കൂലിപ്പണി ചെയ്താണ് അവരുടെ കുടുംബം മുന്നോട്ടു പോകുന്നത്. അവൾക്ക് താഴെ ഒരു അനിയത്തിയുണ്ട്. പേര് ആരതി എല്ലാവരുടെയും പ്രിയപ്പെട്ട കുഞ്ഞാറ്റ. രണ്ടുപേരുടെയും പഠനവും കുടുംബത്തിലെ ചിലവും മുൻപോട്ടു കൊണ്ടുപോകാൻ അവളുടെ അമ്മ ഒരുപാട് കഷ്ടപ്പെടുന്നുണ്ട്, പഠിച്ചു നല്ലൊരു ജോലി വാങ്ങി അമ്മയെ സഹായിക്കണമെന്നാണ് അവളുടെ വലിയ ആഗ്രഹം. നാട്ടുകാർ എല്ലാവരും ചേർന്ന് ഒരു കുഞ്ഞു വീട് നിർമ്മിച്ചു കൊടുത്തിട്ടുണ്ട് അവർക്ക്. പിന്നെ എന്തും കണ്ടറിയുന്ന തന്റെ സുഹൃത്തുക്കൾ അവൾക്ക് കിട്ടിയ വലിയൊരു ഭാഗ്യമാണ്. അവരെ പരിചയപ്പെട്ടതിൽ പിന്നെ അവൾ ബുദ്ധിമുട്ടറിഞ്ഞിട്ടില്ല. ഫീസ് അടക്കാനും മറ്റും അവർ അവളുടെ സമ്മതത്തിനു പോലും കാത്തു നിൽക്കാതെ തങ്ങളുടെ ഫീസ് അടയ്ക്കുന്ന കൂട്ടത്തിൽ അവളുടെയും അടയ്ക്കും.

എന്ത് കഴിച്ചാലും അനിയത്തി കുഞ്ഞാറ്റയ്ക്ക് ഒരു പങ്ക് മാറ്റിവയ്ക്കാൻ അവരാരും മറക്കാറില്ല. തന്നെക്കാൾ അവർ തന്റെ കുടുംബത്തെ സ്നേഹിക്കുന്നത് കണ്ട് പലപ്പോഴും അവളുടെ കണ്ണ് നിറയാറുണ്ട്. കൂട്ടത്തിൽ നവീന്റെ യുള്ളിൽ മറ്റാരോടും തോന്നാത്തൊരിഷ്ടം അവളോടുണ്ട്, അതുകൊണ്ടുതന്നെ അവളുടെ എല്ലാ കാര്യത്തിലും അവനു വല്ലാത്തൊരു ശ്രദ്ധയാണ്. ആ പാവം പിടിച്ച മുഖവും നിഷ്കളങ്കമായ കണ്ണുകളും അവന്റെ ഉറക്കം കളയാൻ തുടങ്ങിയിട്ട് ദിവസങ്ങളായി. തന്റെ സുഹൃത്തുക്കളറിയാതെ അവൻ ഉള്ളിൽ സൂക്ഷിക്കുന്ന ഏക രഹസ്യവും ഇതാണ്. ദിവസം കഴിയുന്തോറും അവന്റെയുള്ളിൽ അവളോടുള്ള ഇഷ്ടം കൂടി കൂടി വന്നു. അവന്റെയുള്ളിലെ പ്രണയം തിരിച്ചറിയാതെ ആതിരയും..... അവസാനം ഓർഡർ ചെയ്ത ഐസ്ക്രീമും കഴിച്ചു തീർത്തപ്പോഴേക്കും വെയിറ്റർ ഒരു നീണ്ട ബില്ലുമായി അവർക്കു മുൻപിലേക്ക് വന്നു. തങ്ങൾ കഴിച്ച എല്ലാ വിഭാവങ്ങളും കുഞ്ഞാറ്റയ്ക്ക് പാഴ്സൽ വാങ്ങാനും കൃപ മറന്നില്ല.

വെയിറ്റർ വെച്ചിട്ടു പോയ ബില്ലി ലേക്ക് നോക്കി കൃപ തന്റെ ബാഗ് അന്വേഷിച്ചു. ചുറ്റും പരതിയിട്ടും അവിടെയെങ്ങും അവളുടെ ബാഗ് കണ്ടത്താനായില്ല. കൃപയുടെ ഉള്ളൊന്നു കിടുങ്ങി, അവൾ വെപ്രാളത്തോടെ താനിരിക്കുന്ന ചുറ്റും ഒന്നുകൂടി പരതി. അവളുടെ വെപ്രാളം കണ്ടു മറ്റുള്ളവരും കാര്യമന്വേഷിച്ചപ്പോഴാണ് ബാഗ് നഷ്ടപ്പെട്ട കാര്യം അവർ എല്ലാവരും അറിയുന്നത്. അവിടെയെല്ലാം ആ ബാഗിനായി എല്ലാവരും അന്വേഷിച്ചു.പക്ഷെ അവിടെയെങ്ങും ആ ബാഗ് കണ്ടെത്താതിരുന്നതും എല്ലാവരുടെയുമുള്ളിലും ഒരു ഭയം വന്നു നിറഞ്ഞു. ഇനി എന്ത് ചെയ്യും എന്നറിയാതെ നാലുപേരും കുഴങ്ങി. വീട്ടിലറിയാതെ ക്ലാസും കട്ട് ചെയ്തു വന്നതാണ്, ഇതെങ്ങാനും പുറത്തറിഞ്ഞാൽ തല പോകും.

നാലുപേരും എന്തുചെയ്യണമെന്നറിയാതെ പരസ്പരം നോക്കി. അവരുടെ വെപ്രാളവും അടക്കം പറച്ചിലും ഹോട്ടലധികൃതർ ശ്രദ്ധിക്കുന്നുണ്ടായിരുന്നു. നാലിനും എന്തൊക്കെയോ പന്തികേട് ഉള്ളത് പോലെ അവർക്ക് തോന്നി, അവരുടെ നീക്കങ്ങൾ അവർ ശ്രദ്ധിക്കാൻ തുടങ്ങി. എന്തോ കള്ളത്തരം ഉള്ളതുപോലെ അവർക്ക് തോന്നി. ബിൽ കൊടുത്തിട്ട് ഒരുപാട് നേരമായിട്ടും അതടയ്ക്കാൻ വരാത്തതും അവർക്ക് സംശയമുണ്ടാക്കി. ടീ ഇവിടെ അടുക്കള ഏതുഭാഗത്താണാവോ...? വിദ്യയുടെ ചോദ്യം കേട്ട മൂവരും അവളെ സംശയത്തോടെ നോക്കി. നിനക്കിപ്പോ എന്തിനാ ഇതിനിടയിൽ അടുക്കള അന്വേഷിക്കുന്നത്, കഴിച്ചതൊന്നും മതിയായില്ലേ...? സൈനു അവളെ കൂർപ്പിച്ചു നോക്കിക്കൊണ്ട് ചോദിച്ചു. എനിക്ക് കഴിക്കാനൊന്നുമല്ല ടീ, അവിടെ ചെന്ന്‌ ഇപ്പോഴേ പാത്രം കഴുകി തുടങ്ങിയാലേ രാത്രിയെങ്കിലും ഇവർ നമ്മളെ വിടൂ...

അള്ളാഹ്, കഴിച്ച പാത്രം ടേബിളിൽ നിന്നു കൊണ്ടുപോയി അടുക്കളയിൽ വെക്കാൻ പറഞ്ഞതിന് ഉമ്മച്ചിയോട് വഴക്കിട്ടു ഇറങ്ങിപ്പോന്നതാ ഞാൻ ആ ഞാൻ കണ്ടവന്റെ എച്ചിൽ പാത്രം കഴുകേണ്ടി വരോ എന്റെ പടച്ചോനേ... സൈനു തലയിൽ കൈവെച്ച് പറഞ്ഞു. പാത്രം കഴുകിയാലും വേണ്ടില്ല, ഇവിടെനിന്ന് എങ്ങനെയെങ്കിലും ഒന്ന് ഇറങ്ങിയാൽ മതി. പേടിച്ചിട്ട് എന്റെ കൈയും കാലും വിറയ്ക്കുന്നു, എന്റെ കൃഷ്ണാ നീ ഞങ്ങളെ കാക്കണേ.... ആതു പേടിയോടെ ഇരു കണ്ണുകളും അടച്ചു പ്രാർത്ഥിച്ചു. നിന്റെയൊരാളുടെ അശ്രദ്ധ കൊണ്ടാ കൃപു ഇതെല്ലാം സംഭവിച്ചത് ഇനി നമ്മൾ എങ്ങനെ രക്ഷപ്പെടും, വിദ്യ ദയനീയമായി കൃപയെ നോക്കി. എനിക്കൊന്നും അറിയില്ല, എന്റെ ദൈവമേ ഇനി ആ ബാഗ് എവിടെ ചെന്ന് അന്വേഷിക്കും, അത് എവിടെ പോയി എന്ന് ഒരു പിടുത്തവുമില്ല. കൃപ വേദനയോടെ മൂന്നുപേരെയും നോക്കി പറഞ്ഞു. മൂന്നുപേരും എന്ത് ചെയ്യണമെന്നറിയാതെ പരസ്പരം കുറ്റപ്പെടുത്തുമ്പോഴാണ് പുറകിൽ നിന്നും ഒരു ശബ്ദം കേട്ടത്. എന്തെങ്കിലും പ്രശ്നമുണ്ടോ....?

ഹോട്ടലിലെ മാനേജർ എന്ന് തോന്നിക്കുന്ന ഒരാൾ വന്ന് അവരോട് ചോദിച്ചു. അത് ... സാർ, ഞങ്ങളുടെ കയ്യിലുണ്ടായിരുന്ന ഒരു ബാഗ് മിസ്സിംഗ് ആണ്, പണം അതിലാണ്. നഷ്ടപ്പെട്ടത് എവിടെയാണെന്നറിയില്ല ഇപ്പോഴാണ് ഞങ്ങൾ ശ്രദ്ധിക്കുന്നത്,, കൃപ പേടിയോടെ പറഞ്ഞു. അവർ പറയുന്നത് കേട്ട് അയാൾ കുറച്ചു സമയം മൗനമായി നിന്നു. സാരമില്ല നിങ്ങൾ നിങ്ങളുടെ വീട്ടിലെ അഡ്രസ്സ് തന്നാൽ മതി ഞങ്ങൾ കാര്യങ്ങൾ അന്വേഷിച്ചു കൊള്ളാം, പറയുന്നത് സത്യമാണെന്ന് ഞങ്ങൾക്ക് ബോധ്യപ്പെട്ടാൽ പിന്നീട് പണം തന്നാൽ മതി. അയാൾ മാന്യമായി തന്നെ അവരോട് സംസാരിച്ചു. അയാൾ പറയുന്നത് കേട്ട് നാലുപേരും സ്തംഭിച്ചുനിന്നു. ഈശ്വരാ ഇതെങ്ങാനും വീട്ടിലറിഞ്ഞാൽ അച്ഛമ്മ എന്നെ വെട്ടിനുറുക്കി പട്ടിക്കിട്ടുകൊടുക്കും ഉറപ്പാണ്, കഴിച്ച എല്ലിൻ കഷണങ്ങൾ എല്ലാം അവളെ നോക്കി ചിരിക്കുന്നത് പോലെ അവൾക്ക് തോന്നി. മറ്റുള്ളവരുടെ അവസ്ഥയും മറിച്ചല്ല,

പഠിക്കാനെന്നും പറഞ്ഞു വീട്ടിൽ നിന്നും ഇറങ്ങിയതാണ്. ഇങ്ങനെ ഒരു കാര്യം വീട്ടിലറിഞ്ഞാൽ എന്തും സംഭവിക്കും. നാലുപേരും ദയനീയമായി അയാളെ ഒന്ന് നോക്കി. എന്താ നിങ്ങൾക്കൊന്നും പറയാനില്ലേ...? ഈ അഭ്യാസമൊക്കെ ഞാൻ ഒരുപാട് കണ്ടിട്ടുണ്ട്, കൊല്ലം ഒരുപാടായി ഈ ജോലിനോക്കുന്നു, നിങ്ങളെപ്പോലെ കണ്ടാൽ മാന്യന്മാരാണെന്ന് തോന്നിക്കുന്ന പല ഉടായിപ്പുകളെയും കണ്ടിട്ട് തന്നെയാണ് ഞാനിവിടം വരെയെത്തിയത്. വന്നപ്പോൾ തൊട്ട് ശ്രദ്ധിക്കുന്നതാണ്, ഇവിടെയുള്ള ഒട്ടുമിക്ക വിഭവങ്ങളും നിങ്ങൾ ഓർഡർ ചെയ്തിട്ടുണ്ട്, കഴിച്ചു കഴിഞ്ഞപ്പോൾ ആരും വിശ്വസിക്കാത്ത ഒരു കള്ളവും, മര്യാദയ്ക്ക് പണം തന്നിട്ട് ഇവിടെനിന്നും ഇറങ്ങിക്കോ.. അല്ലെങ്കിൽ ഞങ്ങളിപ്പോൾ പോലീസിനെ വിളിക്കും, നിങ്ങളെ പോലെയുള്ളവരെയൊക്കെ പോലീസിനെ തന്നെയാണ് ഏൽപ്പിക്കേണ്ടത്, പക്ഷേ നിങ്ങൾ പെൺകുട്ടികളായതുകൊണ്ട് മാത്രമാണ് ഞങ്ങൾ ഇതുവരെ അതിനു ശമിക്കാത്തത്,

നിങ്ങൾ കഴിച്ച പണം തന്നില്ലയെങ്കിൽ ഞങ്ങൾക്ക് പോലീസിനെ വിളിക്കുകയല്ലാതെ വേറെ ഒരു വഴിയും ഇല്ല. ദയവുചെയ്ത് ഞങ്ങളെ കൊണ്ട് അത് ചെയ്യിപ്പിക്കരുത്, മര്യാദയ്ക്ക് കഴിച്ച പണം ഇവിടെ വെച്ചിട്ട് പോകുന്നതാണ് നല്ലത്. സാർ ഞങ്ങൾ പറയുന്നതൊന്നു വിശ്വാസിക്ക് ഞങ്ങൾ സാറ് പറയുന്ന പോലെയുള്ളവരല്ല, സത്യമായിട്ടും കയ്യിലുള്ള ബാഗ് നഷ്ടപ്പെട്ടതാണ്, ഞങ്ങൾ ഇപ്പോഴാണ് ബാഗ് നഷ്ടപ്പെട്ടതറിയുന്നത്. ആദ്യമേ അറിഞ്ഞിരുന്നെങ്കിൽ ഞങ്ങൾ ഇതൊന്നും ഓർഡർ ചെയ്യില്ലായിരുന്നു, ദയവുചെയ്ത് നിങ്ങൾ പറയുന്നതൊന്നു വിശ്വസിക്കൂ പ്ലീസ്, കൃപ താഴ്മയോടെ അയാളോട് അപേക്ഷിച്ചു. നിങ്ങളെ വിശ്വസിക്കാം എന്നു ഞങ്ങൾ പറഞ്ഞല്ലോ...? നിങ്ങൾ അഡ്രസ് തരൂ ഞങ്ങൾ അന്വേഷിക്കട്ടെ. അയാൾ ഗൗരവം വിടാതെ പറഞ്ഞു. അയാൾ പറയുന്നത് കേട്ട് നാലുപേരും ഒന്നും മിണ്ടാതെ തല താഴ്ത്തി നിന്നു.

ആതിര ഏറെക്കുറെ കരച്ചിലിന്റെ വക്കിലെത്തിയിട്ടുണ്ട്. രാവിലെ ഓരോന്ന് ഒരുങ്ങികെട്ടി ഇറങ്ങിക്കോളും മനുഷ്യനെ പറ്റിച്ചു ജീവിക്കാൻ, കാണാൻ നല്ല മെനയുണ്ടല്ലോ..? കാശുണ്ടാക്കാൻ ഒരുപാട് വഴികളുണ്ട് നിങ്ങൾക്ക് മുമ്പിൽ അതു വല്ലതും ചെയ്യണം, നിങ്ങളെപ്പോലുള്ളവർക്കാണോ കാശിനു പഞ്ഞം, ഒന്ന് ചിരിച്ചു നിന്നാൽ മതി കസ്റ്റമേഴ്സ് താനെ വന്നോളും, മര്യാദയ്ക്ക് സംസാരിക്കണം, ഇവിടെ നിന്ന് ഭക്ഷണം കഴിച്ചു എന്നുള്ളത് ശരിയാണ്, ഞങ്ങൾ നിങ്ങളെ പറ്റിച്ചിട്ടൊന്നുമില്ല,അന്തസ്സില്ലാത്ത സംസാരവുമായി ഞങ്ങളുടെയടുത്തേക്ക് വരരുത്, കൃപ ദേഷ്യം കൊണ്ട് വിറച്ചു. അന്തസ്സില്ലായ്മ കാണിക്കാം പറയുന്നതാണ് തെറ്റ്, നീയൊന്ന് കണ്ണടച്ചാൽ മതി പെണ്ണേ ഈ കഴിച്ചതിന്റെ ഇരട്ടി ഞങ്ങൾ മുതലാക്കിക്കൊള്ളാം.

എന്താ സമ്മതമാണോ..? അയാൾ ഒരു വഷളൻ ചിരിയോടെ അവളോട് ചോദിച്ചു. തന്റെ വീട്ടിലുള്ളവരെ പോയി വിളിക്കടോ അതിനെന്നും പറഞ്ഞു കൃപ ദേഷ്യത്തോടെ അയാളെ അടിക്കാനായി കയ്യോങ്ങിയതും അയാൾ അവളുടെ കൈയ്യിൽ കയറി പിടിച്ചു. ആണുങ്ങളുടെ നേരെ കയ്യോങ്ങുന്നോടീ എരണം കെട്ടവളെയെന്നും പറഞ്ഞു അയാൾ കൃപയെ മറുകൈ കൊണ്ട് അടിക്കാനായോങ്ങി. അയാളുടെ കൈ തന്റെ മുഖത്തിനു നേരെ വരുന്നത് കണ്ടതും അവൾ കണ്ണുകളടച്ചു മുഖമൊന്നു ചെരിച്ചു നിന്നു. പെട്ടന്നാണ് അയാളുടെ കയ്യിൽ ആരോ കയറിപ്പിടിച്ചത്. പരിചയമില്ലാത്ത ആളെ കണ്ടതും അയാളൊന്നു നോക്കി. തനിക്കു മുൻപിൽ നിൽക്കുന്നയാളെ ഒരു ഞെട്ടലോടെ കൃപ നോക്കി നിന്നു..... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...