💕തട്ടത്തിന്മറയത്ത് 💕 : ഭാഗം 1

രചന: റഫീന മുജീബ്

നിലാവിന്റെ നേരിയ പ്രകാശം ആ മുറിക്കുള്ളിൽ മെല്ലെ എത്തിനോക്കുന്നുണ്ട്, അതിന്റെ വെട്ടത്തിൽ അവളുടെ മുക്കുത്തിക്കല്ല് ഒന്ന് തിളങ്ങി. തന്നെ നോക്കുന്ന അവന്റെ പ്രണയാർദ്രമായ കണ്ണുകളെ നേരിടാനാവാതെ അവൾ മിഴികൾ താഴേക്കൂന്നി. അവൻ തന്നിലേക്കടുക്കുന്നതിനനുസരിച്ചു അവളുടെ ഹൃദയം പെരുമ്പറ കൊട്ടാൻ തുടങ്ങി, ആ എസി യുടെ തണുപ്പിലും അവൾ നിന്ന് വിയർക്കാൻ തുടങ്ങി. അവൻ അവളെ അരികിലെത്തിയതും തന്റെ ശ്വാസോച്ഛാസം ക്രമാതീതമായി ഉയരുന്നതവളറിഞ്ഞു.അവളെ ഒരു പുഞ്ചിരിയോടെ നോക്കി അവൻ അവളുടെ അരയിലൂടെ കയ്യിട്ട് അവളെ തന്നിലേക്കടുപ്പിച്ചപ്പോൾ അവന്റെ ചുടു നിശ്വാസം അവളുടെ മുഖത്തേക്കടിച്ചു.

ഒരു ശീല കണക്കെ അവൾ മാറി. അവന്റെ നെഞ്ചു തുളച്ചുകയറുന്ന നോട്ടത്തെ നേരിടാനാവാതെ അവൾ പതിയെ തന്റെ മിഴികൾ കൂമ്പിയടച്ചു അവന്റെ സ്‌നേഹചുംബനത്തിനായി കാത്തു നിന്നു, അവളുടെ വിറയാർന്ന ആധാരം ലക്ഷ്യമാക്കി അവന്റെ ചുണ്ടുകൾ നീങ്ങി....... പ്‌ധും.. താൻ ഒരു കൊക്കയിലേക്ക് മറിഞ്ഞത് പോലെയാണ് അവൾക്ക് തോന്നിയത്. അവൾ എഴുന്നേറ്റിരുന്നു ചുറ്റും ഒന്ന് നോക്കി, താനിരിക്കുന്ന പൊസിഷനും ചുറ്റുപാടുമുള്ള കാഴ്ചകളും വീക്ഷിച്ചപ്പോൾ അവൾക്കൊരു കാര്യം മനസ്സിലായി, നല്ല അഡാർ സ്വപ്നം കണ്ടു കട്ടിലിൽ നിന്നും വീണതാണ്. എന്റെ കള്ള കണ്ണാ, ഇന്ദ്രജാലക്കാരാ ഇതെന്താപ്പോ ഇങ്ങനെ ഒരു സ്വപ്നം,

എന്തായാലും ചെറുക്കൻ നല്ല മാസ്സ് ലുക്കാണ് ട്ടോ, ഇഷ്ടായിക്കുണു പെരുത്ത് ഇഷ്ടായിക്കുണു.. അയ്യോ എന്റെ കർത്താവേ, സ്വപ്നത്തിന്റെ ഹാങ്ങോവറിൽ നാവിൽ ബാലാമണി കയറിവന്നതാ, നീ എന്നോട് ക്ഷമിക്കണം അവൾ നാവു കടിച്ചുകൊണ്ട് ചുമരിലെ തിരുരൂപത്തിലേക്ക് നോക്കിക്കൊണ്ട് പറഞ്ഞു. എങ്കിലും ആരായിരിക്കും ആ സുന്ദരൻ അവൾ ചൂണ്ട് വിരലിലെ നഖം കടിച്ചുകൊണ്ട് ഗാഢമായ ചിന്തയിലാണ്ടു. എന്താ റെയ്ച്ചലേ അവിടെ നിന്നൊരു ശബ്ദം കേട്ടത്, തന്റെ മമ്മിയുടെ ശബ്ദമാണ് അവളെ ചിന്തകളിൽ നിന്നും ഉണർത്തിയത്. , ഒന്നുമില്ല മമ്മ, അത് ഞാനൊരു സ്വപ്നം കണ്ട് കട്ടിലിൽ നിന്ന് വീണതാ, അവൾ മമ്മ കേൾക്കാൻ പാകത്തിന് അടുക്കളയിലേക്ക് നോക്കി വിളിച്ചു പറഞ്ഞു.

നന്നായൊള്ളൂ, നട്ടപാതിര വരെ ഫോണിലും കളിച്ച് കുരിശു വരയ്ക്കാതെ കിടന്നുറങ്ങുന്നതുകൊണ്ടാ ഇങ്ങനെയൊക്കെ.. എന്റെ പൊന്നു മമ്മാ ഇന്നത്തെ ക്കുള്ള നല്ല ഒന്നാന്തരം പണി കർത്താവ് തന്നിട്ടുണ്ട്, ഇനി മമ്മയുടെ വക താങ്ങൂല, അവൾ അതും പറഞ്ഞു അടുക്കളയിലേക്ക് നടന്നു. ശോ അങ്ങനെ പറഞ്ഞാൽ ശരിയാവില്ല, കർത്താവ് ഇപ്പോ തന്നത് ഒരു സാമ്പിൾ വെടിക്കെട്ടാ, തൃശ്ശൂർ പൂരം പുറകെ വരുന്നുണ്ട്.. ഹേ, ഈ അപശബ്ദം ഞാൻ എവിടെയോ കേട്ടിട്ടുണ്ടല്ലോ...? അവൾ സംശയത്തോടെ തിരിഞ്ഞുനോക്കി. എന്റെ മാതാവേ.., ഞാനെന്തുവാ ഈ കാണുന്നത്, മൂട്ടിൽ വെയിൽ അടിച്ചാലും എണീക്കാത്ത ആളാ.., ഇന്നെന്തു പറ്റി അങ്ങേയ്ക്ക് അവൾ സംശയത്തോടെ താടിക്ക് കൈ കൊടുത്ത് തന്റെ മുൻപിൽ നിൽക്കുന്ന ആളോട് ചോദിച്ചു. എങ്ങനെ എണീക്കാതിരിക്കും, എന്റെ പെങ്ങൾക്കിട്ടു പണിയാൻ കിട്ടുന്ന ഒരവസരവും ഞാൻ ഇന്നുവരെ കളഞ്ഞിട്ടുണ്ടോ...? അവൻ ഒരു പുഞ്ചിരിയോടെ അവളെ നോക്കി ചോദിച്ചു.

അവൾ സംഭവം മനസ്സിലാകാതെ അവനെ സംശയത്തോടെ നോക്കി. എന്റെ പുന്നാര മോള് കഷ്ടപ്പെട്ട് പഠിച്ച് എക്സാം എഴുതിയതിന്റെ റിസൾട്ട് വരുന്ന ദിവസമല്ലേ ഇന്ന്, അപ്പോൾ നീ ഇരുന്നു കരയുമ്പോൾ ഞാൻ എങ്ങനെ സന്തോഷത്തോടെ കിടന്നുറങ്ങും, നിന്റെ കൂടെ ഞാനും കൂടണ്ടേ കരയാൻ അവൻ ഒരു കള്ളച്ചിരിയോടെ അവളെ നോക്കി പറഞ്ഞു. കർത്താവേ ഇന്നാണോ ആ കരിദിനം..? അവൾ തലയിൽ കൈ വച്ച് കൊണ്ട് ചോദിച്ചു. എസ് ബേബി, ഇന്നാണ് ആ ദിവസം അത് നീ മറന്നാലും ഞാൻ മറക്കില്ലല്ലോ അവൻ ഒരു ചിരിയോടെ പറഞ്ഞു. , പോടാ... അവൾ ദേഷ്യത്തോടെ മുഖം കോട്ടിക്കൊണ്ടു പറഞ്ഞു. നീ പോടി, അവനും വിട്ടു കൊടുത്തില്ല. രാവിലെ തന്നെ തുടങ്ങി രണ്ടും, കാലത്ത് തന്നെ അവനോട് ഗുസ്തി പിടിക്കാതെ നീ പോയി കുളിച്ചിട്ട് വാ റെയ്ച്ചലേ, മമ്മ ദേഷ്യത്തോടെ പറഞ്ഞു.

അതു മമ്മയുടെ പുന്നാര മോനോട് പറ ഞാനല്ല വഴക്കിനു വന്നത് അവൾ അവനെ നോക്കി ദേഷ്യത്തോടെ മുഖം വെട്ടിച്ച് മുന്പോട്ട് നടന്നു. മോള് പോയി വേഗം കുളിച്ചിട്ട് വാ അപ്പോഴേക്കും ഞാൻ റിസൾട്ട് നോക്കട്ടെ എന്നിട്ട് കഴിക്കാം ബ്രേക്ക് ഫാസ്റ്റ് ഒക്കെ പുറകിൽനിന്നും അവൻ വിളിച്ചു പറയുന്നത് കേട്ട് അവൾ അവിടെത്തന്നെ നിന്നു. അതെന്തിനാ, റിസൾട്ട് അറിയാൻ കാത്തു നിൽക്കുന്നത് ഫുഡ് കഴിക്കാൻ... അല്ല, റിസൾട്ട് അറിഞ്ഞാൽ പിന്നെ നീ സങ്കടം കൊണ്ട് ഭക്ഷണം ഒന്നും കഴിക്കില്ല ല്ലോ.? അപ്പോൾ മമ്മ ഉണ്ടാക്കുന്ന ചൂട് പഴം പൊരി എനിക്ക് ഒറ്റയ്ക്കടിക്കാലോ, നീ പൊട്ടിയ സങ്കടത്തിൽ ഇരിക്കുമ്പോൾ അതൊന്നും കഴിക്കൂല എന്ന് എനിക്ക് നന്നായിട്ടറിയാം. പോടാ ചെറുക്കാ, എത്ര പൊട്ടിയാലും ഭക്ഷണത്തോട് ഞാൻ മര്യാദകേട് കാണിക്കില്ല. അപ്പൊ പൊട്ടുമെന്ന് മോൾക്ക് ഉറപ്പാണല്ലേ.....?

അവൻ ഒരു പുഞ്ചിരിയോടെ ചോദിച്ചു. നീ അങ്ങനെ എന്റെ മോളെ കൊച്ചാക്കേണ്ട, നീ കണ്ടോ അവളു നല്ല മാർക്കോടെ തന്നെ പാസാവും നീ നോക്കിക്കോ... അവർക്കിടയിലേക്ക് പുഞ്ചിരിയോടെ നടന്നുവരുന്ന ആളെ കണ്ടതും റേച്ചൽ പപ്പാ എന്ന് വിളിച്ചു ആളെ പോയി കെട്ടിപ്പിടിച്ചു. എന്റെ പൊന്നു മോളെ എന്നോട് ഈ ചതി വേണ്ടായിരുന്നു, ഞാൻ നിന്നെ ഒന്നു പുകഴ്ത്തിയതിനുള്ള ശിക്ഷയാണോ..? അയാൾ തല്ലു നീരസത്തോടെ പറഞ്ഞു. അവൾ സംശയത്തോടെ പപ്പയെ നോക്കി. നീ ബ്രഷ് ചെയ്യാതെ, വന്നെന്നെ കെട്ടിപ്പിടിച്ചിട്ട് പപ്പയുടെ ഒരു ദിവസം പോയി കിട്ടി അയാൾ പറയുന്നത് കേട്ട് കെറുവിച്ച് കൊണ്ടവൾ സ്വല്പം മാറിനിന്നു. തന്നെ നോക്കി കളിയാക്കി ചിരിക്കുന്ന ഇച്ചായനെ അവൾ ദേഷ്യത്തോടെ നോക്കി. അച്ചോടാ പപ്പയുടെ റിച്ചുവിനു സങ്കടം ആയോ..? എന്റെ മോള് പിണങ്ങണ്ട ഞാൻ ചുമ്മാ പറഞ്ഞതാ അവളെ തന്നിലേക്ക് വലിച്ചടുപ്പിച്ച് പപ്പ സ്‌നേഹത്തോടെ പറഞ്ഞു. നീ പോയി ഫ്രഷ് ആയി വാ റേച്ചലേ സമയം പോകുന്നു അവൻ വീണ്ടും അവളെ ഓർമിപ്പിച്ചു.

അവനെ നോക്കി കൊഞ്ഞനം കുത്തി അവൾ അകത്തേക്ക് പോയി. എന്തിനാടാ അവളെ ഇങ്ങനെ ദേഷ്യം പിടിപ്പിക്കുന്നത്, അവൾ പോയ വഴിയെ നോക്കി മമ്മ ചോദിച്ചു. ചുമ്മാ ഒരു രസം മമ്മാ, നമ്മുടെ റിച്ചുവിനെ വർഷങ്ങൾക്കുശേഷം അല്ലേ ഇങ്ങനെ സന്തോഷത്തോടെ കാണുന്നത്, അവളിൽ നിന്നും മാഞ്ഞു പോയ എല്ലാ കുസൃതികളും ഇപ്പോ അവളിലേക്ക് തന്നെ തിരിച്ചുവന്നു. അവൾ പോയ വഴിയെ നോക്കി അവൻ പറഞ്ഞു. അത് കേട്ടതും രണ്ടുപേരുടെയും മുഖം മങ്ങി. അവളെ ഓർത്തുള്ള വേദന രണ്ടു പേരുടെയും മുഖത്ത് വ്യക്തമായി കാണാം. ബാങ്ക് ഉദ്യോഗസ്ഥനായ അലക്സി ഫിലിപ്പിന്റെയും വീട്ടമ്മയായ ആനി ഫിലിപ്പിന്റെ യും രണ്ടു മക്കളിൽ ഇളയവളാണ് റെയ്‌ച്ചൽ ഫിലിപ്പ്, മൂത്തവൻ റോഷൻ ഫിലിപ്പ് ഇപ്പോൾ ബാംഗ്ലൂരിൽ എംബിഎ ചെയ്യുന്നു. റെയ്‌ച്ചൽ ഡിഗ്രി എക്സാം കഴിഞ്ഞ് റിസൾട്ടിനു വേണ്ടു വെയ്റ്റ് ചെയ്തു നിൽക്കുന്നു.

കുളിക്കാനായി ബാത്ത് ടൗവലും എടുത്ത് ബാത്‌റൂമിലേക്ക് കയറാൻ തുടങ്ങുമ്പോഴാണ് ടേബിളിൽ ഇരിക്കുന്ന മാതാവിന്റെ രൂപം അവളുടെ കണ്ണുകളിൽ പെട്ടത്. എന്റെ മാതാവേ, നഷ്ടപ്പെട്ട് പോയ എല്ലാ സന്തോഷവും നീ എനിക്ക് തിരികെ തന്നു എന്റെ ഉള്ളിൽ വീണ്ടും സ്വപ്നങ്ങൾ മുളപൊട്ടാൻ തുടങ്ങിയിരിക്കുന്നു, എന്റെ സ്വപ്നങ്ങളിൽ നീ എനിക്ക് കാണിച്ചു തന്നത് ആരെയാണ്, ആരാണെങ്കിലും അങ്ങനെ ഒരാൾ ഉണ്ടെങ്കിൽ എന്റെ മുമ്പിലേക്ക് എത്തിക്കണേ.. അവൾ ഒരു പുഞ്ചിരിയോടെ പറഞ്ഞു. തൊട്ടടുത്തുള്ള കർത്താവിന്റെ രൂപത്തിലേക്ക് നോക്കി അവൾ ഒരു കള്ളച്ചിരി ചിരിച്ചു, എന്തു പണിയാ കർത്താവേ നീ കാണിച്ചത് അങ്ങേര് ഒരുപാടു ആശിച്ചു വന്നതാവും ഒരു കിസ്സ് തരാൻ. നീ അത് മുളയിലേ നുള്ളിക്കളഞ്ഞല്ലോ അവൾ ചിരിച്ചു കൊണ്ട് ബാത്‌റൂമിലേക്കോടി.

തണുത്തവെള്ളം ശരീരത്തിലേക്കൊഴിക്കുമ്പോഴും അവളുടെ ഓർമ്മകളിൽ ആ സ്വപ്നം മാത്രമായിരുന്നു. ഫ്രഷായി താഴേക്ക് ചെല്ലുമ്പോൾ ലാപ്പിന്റെ മുമ്പിൽ കുത്തിപ്പിടിച്ചിരിക്കുന്ന ചേട്ടായിയെയാണ് കണ്ടത്. അവൾ ടെൻഷനോടെ അവനരികിലിരുന്നു, സൈറ്റ് ബ്ലോക്കാണെന്നു തോന്നുന്നു ഒന്നും വരുന്നില്ല, അവൻ ഒരുപാടു നേരത്തെ പരിശ്രമത്തിനൊടുവിൽ നിരാശയോടെ അവളെ നോക്കി പറഞ്ഞു. അത് സമയമാകുമ്പോൾ വരും, നിങ്ങൾ വന്ന് ഭക്ഷണം കഴിക്ക്, അപ്പോഴേക്കും റിസൾട്ട് വന്നോളും മമ്മ പറയുന്നത് കേട്ടു റെയ്‌ച്ചൽ ഡൈനിങ് ടേബിൾ കയ്യടക്കിയിരുന്നു. എല്ലാരും ഭക്ഷണം കഴിക്കുന്നതിൽ ശ്രദ്ധ കൊടുത്തപ്പോൾ അവളുടെ മനസ്സു മാത്രം ഭക്ഷണം കഴിക്കുന്നതിൽ നിന്നും വിട്ടുനിന്നു. മകളുടെ മുഖത്തെ ഭാവ വ്യത്യാസം മനസ്സിലാക്കിയത് കൊണ്ടാവാം ഫിലിപ്പ് അവളെ ചേർത്ത് പിടിച്ചു.

പപ്പയുടെ റിച്ചു എന്തിനാ വെറുതെ ടെൻഷൻ അടിക്കുന്നത്, എനിക്കറിയാം എന്റെ മോൾ നല്ല മാർക്കോടെ തന്നെ പാസ്സാകും, പിന്നെ എന്തിനാ എന്റെ വാവ വെറുതെ ഇങ്ങനെ ഓരോന്നൊക്കെ ആലോചിച്ചു ടെൻഷൻ അടിക്കുന്നത്. അവളുടെ മുഖം തന്റെ കൈകൊണ്ട് ഒന്നു ഉയർത്തികൊണ്ട് ഫിലിപ്പ് ചോദിച്ചു. അയാൾക്കൊരു ചെറിയ പുഞ്ചിരി സമ്മാനിച്ച് അവൾ കൈവിരലുകൾ കൊണ്ട് വെറുതെ ഭക്ഷണം ചിക്കി കൊണ്ടിരുന്നു. അയ്യോ പുഞ്ചിരിക്കു വോൾട്ടേജ് പോരല്ലോ...? പപ്പയുടെ പുലിക്കുട്ടി വെറുതെ ടെൻഷനടിക്കേണ്ട ട്ടോ, അതീ പപ്പയ്ക്ക് സഹിക്കില്ല. എനിക്കുറപ്പുണ്ട് എന്റെ മോളെ നല്ല മാർക്കോടെ തന്നെ പാസ്സാകും. വല്ല്യ പ്രതീക്ഷയൊന്നും വേണ്ട പപ്പാ.., അറിയാലോ കഴിഞ്ഞ വർഷം ഞാൻ ക്ലാസ്സിൽ പോയത് വിരലിലെണ്ണാവുന്ന ദിവസമാണ് അതിന്റെ കുറവ് എന്തായാലും എന്റെ റിസൽട്ടിൽ ഉണ്ടാവും, അവൾ നിരാശയോടെ പറഞ്ഞു. അങ്ങനെ നോക്കുകയാണെങ്കിൽ, കഴിഞ്ഞവർഷം മാത്രമല്ലല്ലോ എല്ലാ വർഷവും ഇതേ അവസ്ഥ തന്നെയല്ലേ,

എന്നിട്ടും എന്റെ മോള് പഠിച്ചു മുൻനിരയിൽ തന്നെ എത്തിയിട്ടുണ്ട് മോള് അത് ഓർത്തു വിഷമിക്കാതെ വേഗം ഭക്ഷണം കഴിക്കാൻ നോക്കൂ അവളുടെ തലയിൽ ഒന്ന് തലോടി ഫിലിപ്സ് കൈ കഴുകാനായി എഴുന്നേറ്റു പോയി. പപ്പ പോയ വഴിയെ ഒന്ന് നോക്കി അവളും എന്തൊക്കെയോ കഴിച്ചെന്നു വരുത്തി എഴുന്നേറ്റു. കൈകഴുകി ഇച്ചായന്റെ അരികിലെത്തിയപ്പോൾ തന്നെ കണ്ടു ആമുഖത്തെ നിരാശ. അതോടുകൂടി അവളുടെ ഉള്ള പ്രതീക്ഷ കൂടി അസ്തമിച്ചു. അവൾ ഒരു വിളറിയ ചിരിയുമായി അവനരികിലേക്ക് ചെന്നു. നീയൊക്കെ എന്റെ പെങ്ങൾ തന്നെയാണോ...? അവന്റെ ചോദ്യം കേട്ടതും ഉത്തരം പറയാനാവാതെ അവൾ തലതാഴ്ത്തി നിന്നു. എന്തെങ്കിലുമൊക്കെ പറയണമെന്ന് വിചാരിച്ചതാ റിസൾട്ട് വരുമ്പോൾ അതിനു ഒരു അവസരം നീ എനിക്ക് തരില്ല, കോളേജിലെ മൂന്നാം റാങ്ക് വാങ്ങിയിരിക്കുന്നു ഒരുത്തി എന്നിട്ട് നിൽക്കുന്നത് കണ്ടില്ലേ വല്ല കള്ളവും ചെയ്തത് പോലെ, നീ കോപ്പിയടിച്ചാണോ ടി ജയിച്ചത് അവൻ ദേഷ്യം അഭിനയിച്ചു കൊണ്ട് ചോദിച്ചു. പെട്ടെന്ന് അവന്റെ വാക്കുകൾ കേട്ടതും അവൾ അത്ഭുതത്തോടെ അവനെ നോക്കി. കേട്ടത് വിശ്വസിക്കാനാവാതെ അവൾ ചുറ്റും നോക്കി. പപ്പയുടെയും മമ്മയുടെയും മുഖത്തെ പുഞ്ചിരിയിൽ നിന്നും മനസ്സിലായി കേട്ടത് സത്യമാണെന്ന്. അവൾ സന്തോഷത്തോടെ എല്ലാവരെയും നോക്കി.

ഞാൻ പറഞ്ഞില്ലേ പപ്പയുടെ മോൾ അങ്ങനെ എവിടെയും തോറ്റു കൊടുക്കുന്ന ആളല്ല എന്ന് എനിക്ക് നന്നായിട്ടറിയാം എന്റെ മോള് ജീവിതത്തോട് പൊരുതി അല്ലേ ഇവിടം വരെ എത്തിയത് തന്നെ, പിന്നെയാണോ ഒരു ഉണക്ക എക്സാം ഫിലിപ്സ് അവളെ ചേർത്ത് പിടിച്ചു സ്നേഹത്തോടെ നെറുകയിൽ ഒരു ഉമ്മ കൊടുത്തു. ആനിയ്ക്കും ഒരുപാട് സന്തോഷമായി എന്നവളുടെ മുഖം വിളിച്ചു പറയുന്നുണ്ടായിരുന്നു. അല്ല ഇച്ചായാ അപ്പോൾ ഫസ്റ്റ് സെക്കൻഡ് ഇതൊക്കെ ആർക്കാ. അവൾ സംശയത്തോടെ ചോദിച്ചു. ഫസ്റ്റ് എന്തായാലും രാഹുൽ കൊണ്ട് പോയിട്ടുണ്ടാവും, കോളേജിലെ ബുദ്ധിജീവി അല്ലേ ഫസ്റ്റ് വിട്ടുള്ള കളി അവനില്ല, സെക്കൻഡ് ആരാ അത് അറിഞ്ഞാൽ മതി. അവൾ റോഷനെ പ്രതീക്ഷയോടെ നോക്കി. , അത് സംശയിക്കാൻ ഒന്നുമില്ല നിന്റെ ഐറിന് തന്നെ അവൻ ഒരു പുഞ്ചിരിയോടെ പറഞ്ഞു. അത് കേട്ടതും റെയ്‌ച്ചൽ തുള്ളിച്ചാടാൻ തുടങ്ങി. സ്വന്തം റിസൾട്ട് അറിഞ്ഞിട്ടു പോലും അവൾക്ക് ഇത്ര സന്തോഷം വന്നിട്ടില്ല മമ്മ ഒരു പുഞ്ചിരിയോടെ പറഞ്ഞു.

പിന്നെ സന്തോഷം ഇല്ലാണ്ട് ഇരിക്കോ മമ്മ എന്റെ ഐനൂ നല്ലേ സെക്കൻഡ് എന്റെ വിജയത്തേക്കാൾ കൂടുതൽ സന്തോഷം അവളുടെ വിജയം തന്നെയാണ് എനിക്ക്. അവൾ പുഞ്ചിരിയോടെ പറഞ്ഞു. പിന്നേ നാട്ടിൽ എവിടെയും കാണാത്ത രണ്ട് ഫ്രണ്ട്സ് റോഷൻ അവളെ നോക്കി പുച്ഛത്തോടെ മുഖം തിരിച്ചു. നീ പോടാ...അവൾ അവനെ നോക്കി ദേഷ്യത്തോടെ മുഖം കോട്ടി. നീ പോടി.. അവനും അവൾക്ക് നേരെ പുച്ഛം എറിഞ്ഞു. ഓ തുടങ്ങി രണ്ടും വീണ്ടും ആനി തലയിൽ കൈവെച്ചു കൊണ്ട് പറഞ്ഞു. ഞങ്ങൾ അങ്ങനെ പലതും പറയും, അത് കണ്ട് അമ്മത്തമ്പുരാട്ടി മുഖം വീർപ്പിക്കാണ്ട അല്ലേടാ അവനെ നോക്കി കണ്ണടച്ച് കാണിച്ച് അവൾ ആനിയെ ചെന്ന് കെട്ടിപിടിച്ചു. ഞാൻ നിന്റെ പപ്പ ഓഫീസിലേക്ക് പോകുമ്പോൾ കൂടെ പോകുകയാണ്, നിന്റെ റിസൽട്ട് വന്നാൽ മാതാവിന് ഒരു കൂട് മെഴുകുതിരി നേർന്നതാണ് ഇനി വൈകിപ്പിക്കുന്നില്ല അത് ചൂടോടെ നടത്തിയിട്ട് വരാം അവളെ ഒന്നു നോക്കി ആനി അകത്തേക്ക് പോയി. ഞാനെന്റെ ഐനൂനു ഒന്ന് വിളിച്ചിട്ട് വരാം എന്നും പറഞ്ഞ് അവൾ മുകളിലേക്കു പോയി. ഒറ്റ റിങ്ങിൽ കാൾ എടുത്തപ്പോൾ തന്നെ മനസ്സിലായി തന്റെ വിളിയും കാത്ത് അവൾ പ്രതീക്ഷയോടെ ഇരിക്കുകയാണെന്ന്.

ഐറിൻ തോമസ് തോമസിന്റെയും ആലീസിന്റെയും മൂത്തമകൾ ഇളയവൾ ഐഷ തോമസ് ഒൻപതിൽ പഠിക്കുന്നു. തോമസ് നാട്ടിലെ പേരുകേട്ട ഫൈനാൻസ് കമ്പനി നടത്തിപോകുന്നു. ആലീസ് അവര് പഠിക്കുന്ന കോളേജിൽ ലുക്ച്ചററായി ജോലി നോക്കുന്നു. ഐറിനും റെയ്‌ച്ചലും കുഞ്ഞു നാളു തൊട്ടുള്ള സൗഹൃദമാണ്, ഐനു ഇല്ലാതെ റിച്ചുവിനെയോ റിച്ചു ഇല്ലാതെ ഐനുവിനെയോ ആരും കണ്ടിട്ടില്ല. ഇരുവരുടെയും സൗഹൃദം പോലെ തന്നെയാണ് ഇരുവീട്ടുകാരും തമ്മിലുള്ള അടുപ്പവും. കൺഗ്രാജുലേഷൻസ് മൈ ഹാർട് ഫോണെടുത്ത ഉടനെ ഐനുവിന്റെ ശബ്ദം അവളെ തേടിയെത്തി. നിനക്കും കിടക്കട്ടെ മൈ ഹാർട്, റെയ്‌ച്ചലും ഒരു ചിരിയോടെ പറഞ്ഞു. നീ ആരെ നോക്കി നില്ക്കാ പെട്ടന്നിങ്ങു കെട്ടിയൊരുങ്ങി വരാൻ പാടില്ലായോ..? റെയ്‌ച്ചൽ ഇത്തിരി ദേഷ്യത്തോടെ പറഞ്ഞു. ഓഹ്, ഞാൻ റെഡിയായി അവിടേക്കിറങ്ങാൻ നിക്കുവാടീ, ഒരഞ്ചു മിനുട്ട് ബസ്സ് കിട്ടിയാൽ ഞാൻ ദാ എത്തി. ബസ്സോ അപ്പൊ നിന്റെ സ്കൂട്ടി ചത്തോ..? റെയ്‌ച്ചൽ സംശയത്തോടെ ചോദിച്ചു. ചത്തൊന്നും ഇല്ല പക്ഷെ പെട്രോളിനൊക്കെ ഇപ്പൊ എന്നാ വിലയാടീ അവൾ ഒരു പതിഞ്ഞ ശബ്ദത്തിൽ പറഞ്ഞു.

ഓ.. നീയാ വട്ടിപ്പലിശക്കാരൻ തോമാച്ചന്റെ മോള് തന്നെ, നിനക്ക് ആ ശകടത്തിൽ ഒഴിക്കാനുള്ള പെട്രോളിന്റെ കാശ് ഞാൻ തരാം നീ ഒന്ന് വേഗം വാ. അത് പിന്നെ എനിക്കറിഞ്ഞുകൂടായോ, അതൊക്കെ മോള് തരുമെന്ന്, പിന്നെ നീ എന്റെ അപ്പയെ ഇങ്ങനെ പോക്കണ്ട പുള്ളിക്ക് എന്നെക്കാൾ ഇഷ്ടം നിന്നെയാണ് ഐനു ഒരു ചിരിയോടെ പറഞ്ഞു. അതുകൊണ്ടാ അയാൾ ഇപ്പോഴും ജീവിച്ചു പോകുന്നത്. അല്ലെങ്കിൽ എന്നെ ഞാൻ അയാളെ ട്രോളി കൊന്നേനെ, നീ കിന്നാരം പറഞ്ഞ് ഇരിക്കാതെ ഒന്ന് പെട്ടെന്ന് വാ.. ഓക്കേ ഞാൻ ഇതാ എത്തി, എന്ന് പറഞ്ഞ് ഐ നു ഫോൺ വെച്ചു. റെയ്‌ച്ചൽ അവളെയും കാത്തു അക്ഷമയോടെ വഴിയിലേക്ക് നോക്കി നിന്നു. കുറച്ചു സമയം കഴിഞ്ഞപ്പോൾ ഐനുവിന്റെ സ്കൂട്ടി മുറ്റത്ത് വന്നുനിന്നു. മുകളിൽ നിൽക്കുന്ന റെയ്‌ച്ചലിനു ഒരു പുഞ്ചിരി നൽകി അവൾ അകത്തേക്ക് കയറി. ഹാളിൽ എത്തിയതും ആരോ അവളെ പിടിച്ചു വലിച്ചതും അവൾ നേരെ ചുമരിൽ തട്ടി നിലത്തേക്ക് വീണു. അവിടെ നിന്നും എഴുന്നേറ്റു തന്നെ പിടിച്ചുവലിച്ചയാളെ അവൾ ദേഷ്യത്തോടെ നോക്കി. തുടരും..