National
യുപിയിൽ അധ്യാപകരുടെ പീഡനത്തെ തുടർന്ന് വിദ്യാർഥിനി ആത്മഹത്യ ചെയ്തു; കോളേജിൽ വൻ പ്രതിഷേധം
ഉത്തർപ്രദേശിൽ അധ്യാപകരുടെ പീഡനത്തെ തുടർന്ന് വിദ്യാർഥിനി ആത്മഹത്യ ചെയ്തു. ഗ്രേറ്റർ നോയ്ഡ നോളജ് പാർക്കിലെ ശാരദ യൂണിവേഴ്‌സിറ്റിയിലാണ് സംഭവം. രണ്ടാം വർഷ ബിഡിഎസ് വിദ്യാർഥിനി ജ്യോതിയാണ് മരിച്ചത്. തന്റെ മരണത്തിന് അധ്യാപകരാണ് ഉത്തരവാദികൾ എന്ന് വിദ്യാർഥിനിയുടെ കുറിപ്പിൽ പറയുന്നു.
അധ്യാപകർ മാനസികമായി പീഡിപ്പിക്കുകയും അപമാനിക്കുകയും ചെയ്തതായി കുറിപ്പിൽ വ്യക്തമാക്കുന്നു. ഏറെ നാളുകളായി മാനസിക സമ്മർദ്ദത്തിലായിരുന്നുവെന്നും കുറിപ്പിലുണ്ട്. ഇന്നലെ രാത്രി 9.30ഓടെ കോളജ് ഹോസ്റ്റലിലാണ് മൃതദേഹം കണ്ടെത്തിയത്.
കോളേജ് അധികൃതർ സംഭവം മറച്ചുവയ്ക്കാൻ ശ്രമിച്ചതായും ആരോപണമുണ്ട്. പോലീസ് എത്തും മുമ്പ് മൃതദേഹം മാറ്റിയെന്നാണ് വിവരം. ക്യാമ്പസിൽ വിദ്യാർഥികളുടെ പ്രതിഷേധം തുടരുകയാണ്.
