മെക്7 എന്ന പേരില്‍ മലബാര്‍ ജില്ലകളില്‍ വ്യാപകമായി നടക്കുന്ന മോര്‍ണിംഗ് എക്‌സസൈസ് പരിപാടിയില്‍ ദുരൂഹതയുണ്ടെന്നാരോപിച്ച് സമസ്ത രംഗത്ത്. ഇരുസമസ്തകളിലും ഇതുമായി ബന്ധപ്പെട്ട് ഗുരുതരമായ ചര്‍ച്ചകള്‍ നടക്കുന്നുണ്ടെങ്കിലും രൂക്ഷ വിമര്‍ശനവുമായി രംഗത്തെത്തിയത് എ പി വിഭാഗമാണ്. ജമാഅത്തെ ഇസ്ലാമിയും എസ് ഡി പി ഐയും തന്ത്രപരമായി മുസ്ലിം പോക്കറ്റുകള്‍ കേന്ദ്രീകരിച്ച് രഹസ്യമായ സംഘടനാ പ്രവര്‍ത്തനം നടത്തുകയാണെന്നും ഇതില്‍ വഞ്ചിതരാകരുതെന്നുമാണ് എ പി വിഭാഗം നേതാക്കള്‍ അണികള്‍ക്ക് നല്‍കിയ നിര്‍ദേശം. എസ് ഡി പി ഐയുടെയും പോപുലര്‍ ഫ്രണ്ടിന്റെയും പഴയ വേര്‍ഷനായിരുന്ന എന്‍ ഡി എഫ് എങ്ങനെയാണോ പ്രവര്‍ത്തനം ആരംഭിച്ചത് അതേരൂപത്തിലാണ് മെക്7നും സമൂഹത്തിലേക്ക് ഇറങ്ങി ചെല്ലുന്നതെന്നാണ് എ പി വിഭാഗം നേതാക്കള്‍ വ്യക്തമാക്കുന്നത്. മെക്7ന്റെ പിന്നില്‍ ദുരൂഹതയുണ്ടെന്നും ഇത്തരത്തില്‍ ഒരേപോലെ പ്രവര്‍ത്തനം നടത്തുന്ന ഒരു സംവിധാനത്തിന് സംഘടനാ പശ്ചാത്തലമുണ്ടെന്നും അത് എന്തുകൊണ്ടാണ് പരസ്യമാക്കാത്തതെന്നുമാണ് സുന്നി യുവജന സംഘം കോഴിക്കോട് ജില്ലാ സെക്രട്ടറിയും എ പി വിഭാഗത്തിന്റെ മുഖപത്രമായ സിറാജിലെ എഡിറ്ററുമായ മുഹമ്മദ് അലി കിനാലൂര്‍ അഭിപ്രായപ്പെട്ടത്. കാര്യങ്ങള്‍ ഇങ്ങനെയാണെങ്കില്‍ ഇത് അത്ര ശുഭകരമായ രീതിയല്ലെന്നും അദ്ദേഹം പറഞ്ഞുവെച്ചു.
മെക്7നെതിരെ സുന്നികള്‍ രംഗത്ത്; രൂക്ഷ വിമര്‍ശവുമായി സമസ്ത എ പി വിഭാഗം
📲 വാർത്തകൾ WhatsApp-ൽ ലഭിക്കാൻ ചാനലിൽ ജോയിൻ ചെയ്യൂJoin