Love for Unexpected💜: ഭാഗം 2

രചന: Ansiya shery

"ഡീ..."ദേഷ്യത്തിൽ അവൻ അലറിയതും അവൾ ഞെട്ടലോടെ അവനെ നോക്കി.. "നോക്ക്.. എന്തൊരു ഭംഗിയാ അല്ലേ കാണാൻ.. നമുക്കൊന്ന് കയറി നോക്കിയാലോ..?" ഞെട്ടൽ വിട്ട് മാറിയതും അവനെ നോക്കി കണ്ണ് വിടർത്തിക്കൊണ്ട് അവൾ ചോദിച്ചത് കേട്ട് ദേഷ്യം അടക്കി നിർത്താൻ വേണ്ടി മുഷ്ട്ടി ചുരുട്ടിക്കൊണ്ട് അവൻ അവളെ മറികടന്ന് വന്ന വഴിയിലേക്ക് തന്നെ നടന്നു... "അയ്യോ പോവാണോ? ഞാനും ഉണ്ട്.." എക്സ്പ്പോയിലേക്ക് ഒന്ന് കൂടെ നോക്കിയിട്ട് അവൾ അവന്റെ പിറകെ ഓടി.. "നമുക്കൊന്ന് അവിടെ പോയിട്ട് വന്നാൽ മതിയായിരുന്നു.." അവന്റെ ഒപ്പം എത്തി നിന്ന് കൊണ്ട് ചുണ്ട് കൂർപ്പിച്ച് അവൾ പറഞ്ഞതും അവനവളെ കണ്ണുരുട്ടി നോക്കി.. "നിന്നെ അവിടെ കൊണ്ട് പോകാൻ നീയെന്റെ ആരാ?" "ആരുമല്ല..പക്ഷെ ഒരു മനുഷ്യൻ മറ്റൊരു മനുഷ്യനെ സഹായിക്കുന്നതിന് ആരുമാകണം എന്നില്ലല്ലോ?" "അത് സഹായം.. ഇതിന് സഹായം എന്ന് പറയില്ലല്ലോ.. തനിയേ പോകണമെങ്കിൽ പോകാം.. അല്ലാതെ കൂടെ എന്നെ പ്രതീക്ഷിക്കണ്ട.." "ജാഡ തെണ്ടി..." മുഖം വീർപ്പിച്ചു കൊണ്ടവൾ അവനിൽ നിന്നും മുഖം വെട്ടിത്തിരിച്ച് നടന്നു..

"അതേ ഞാനൊരു കാര്യം ചോദിക്കട്ടെ?" നടത്തം നിർത്തിക്കൊണ്ട് അവൾക്ക് നേരെ തിരിഞ്ഞ് പെട്ടെന്നവൻ ചോദിച്ചതും അവൾ അവനെ നോക്കി എന്താണെന്ന നിലക്ക് പിരികം പൊക്കി നോക്കി... "നീ ഈ നേരത്ത് ബാഗും തൂക്കി എവിടെപ്പോകുവാ" "അതെന്തിനാ ഞാൻ തന്നോട് പറയുന്നത്" "എന്റെ കൂടെ ഇങ്ങനെ നടക്കുമ്പോൾ അതറിയേണ്ടത് എന്റെ ആവശ്യമാ..പറയാൻ ഉദ്ദേശമില്ലെങ്കിൽ എന്റെ കൂടെ വരേണ്ട" "ഞാൻ വീട്ടിൽ നിന്നും ഒളിച്ചോടി വന്നതാ" എങ്ങോ നോക്കി പെട്ടെന്നവൾ പറഞ്ഞതും അവൻ കണ്ണ് മിഴിച്ച് അവളെ നോക്കി... "ഒളിച്ചോടി വന്നതോ? നിനക്കെന്താ വട്ടുണ്ടോ.. വീട്ടുകാർ നിന്നെ തിരക്കില്ലേ..വീട്ടുകാരെ സങ്കടപ്പെടുത്തിയിട്ട് വേണോ കാമുകന്റെ കൂടെ ഇങ്ങനെ ഒരു ഒളിച്ചോട്ടം.. അവൻ അവസാനം ചതിച്ചാലോ?" "കാമുകന്റെ കൂടെ ഒളിച്ചോടാനാണ് ഇറങ്ങിയതെന്ന് ഞാൻ തന്നോട് പറഞ്ഞോ?" പെട്ടെന്നവൾ ചൂടായതും അവനൊന്ന് പതറി... "ഇല്ല.. പക്ഷെ സാധാരണ അതിനാണല്ലോ എല്ലാവരും ഒളിച്ചോടുന്നത്" "ആയിരിക്കാം.. പക്ഷെ ഞാൻ അതിനല്ല.."

"പിന്നെന്തിനാ?" "ഞാൻ തന്നോട് തന്റെ പേര് ചോദിച്ചിട്ട് പറഞ്ഞില്ലല്ലോ.. അപ്പൊ ഇതൊന്നും അറിയേണ്ട ആവശ്യം തനിക്കില്ല.. പിന്നെ അതിന്റെ പേരിൽ എന്നെ ഇട്ടിട്ട് പോയാൽ തനിക്ക് തന്നെയാ കേട്... ബസ്സിലുള്ള എല്ലാവർക്കും അറിയാം ഞാൻ തന്റെ കൂടെ ആണെന്നുള്ളത്" എന്തെങ്കിലും പറഞ്ഞാൽ അവളതിൽ പിടിച്ച് തൂങ്ങുമെന്ന് മനസ്സിലായതും ഒന്നും മിണ്ടാതെ അവൻ നടന്നു... ബസ്സിനടുത്തെത്തിയതും നേരെ അകത്തേക്ക് കയറിയവനെ കണ്ട് അവളും പിറകെ കയറി.... സൈഡ് സീറ്റിലേക്ക് ഇരിക്കാൻ തുനിഞ്ഞതും അവളെ ഓർത്തപ്പോൾ എഴുനേറ്റ് അവളിരുന്നതിന്റെ ശേഷം അടുത്തിരുന്നു... ശേഷം സീറ്റിലേക്ക് ചാരിയിരുന്നു.. "എന്താ പറ്റിയെ?"ചുളിഞ്ഞ മുഖത്തോടെ നെറ്റി ഉഴിയുന്നവനെ കണ്ട് അവൾ ചോദിച്ചതും അവനവളെ നോക്കി.. "അറിയില്ല പെട്ടെന്നെന്തോ തലക്ക് വല്ലാത്തൊരു വേദന"സീറ്റിൽ ചാരി കണ്ണടച്ച് കൊണ്ട് അവൻ നെറ്റി ഉഴിഞ്ഞു... അവൾ വേഗം തന്റെ ബാഗ് തുറന്ന് അതിൽ നിന്നും ഒരു ചെറിയ കുപ്പിയെടുത്ത് തുറന്ന് അവൻ നേരെ നീട്ടി...

"ഡോ.. ഇത് തേച്ച് നോക്ക്.. വേദന മാറും.. വിക്സ് ആണ്"കണ്ണ് തുറന്നു നോക്കിയതും തനിക്ക് നേരെ നീട്ടിയിരിക്കുന്ന കുപ്പി കണ്ട് അവനവളെ സംശയത്തോടെ നോക്കി.. "ഇതൊക്കെ കയ്യിൽ വെച്ചിട്ടാണോ ചാടിയത്?" "എനിക്കില്ലേ.. ഈ ബസ്സിൽ കയറിയാൽ ഇടക്ക് തല വേദന ഉണ്ടാകാറുണ്ട്.. വീട്ടിലേക്ക് എന്തായാലും തിരിച്ച് പോക്ക് ഇല്ലെന്ന് ഉറപ്പിച്ചത് കൊണ്ട് എന്റേതെല്ലാം എടുത്തു.. വേഗം ഇത് തേച്ച് ഒന്ന് ഉറങ്ങിക്കോ..സ്ഥലം എത്താൻ ഇനിയും ഒരുപാട് സമയം ഇല്ലേ..ഉറങ്ങി എഴുനേൽക്കുമ്പോൾ വേദന മാറിക്കോളും"അത്രയും നേരം കൊച്ചു കുഞ്ഞുങ്ങളെ പോലെ സംസാരിച്ചിരുന്നവളുടെ വാക്കിലെ കരുതൽ കണ്ട് അവൻ അത്ഭുതത്തോടെ അവളെ തന്നെ നോക്കിയിരുന്നു... "ഡോ.. എന്നെ നോക്കി ഇരിക്കാതെ ഇതെടുത്ത് തേക്ക്.. എന്നാലേ വേദന മാറൂ"ഒരു ഞെട്ടലോടെ അവളിൽ നിന്നും മുഖം തിരിച്ചു കൊണ്ട് അവൻ അവളുടെ കയ്യിലിരുന്ന വിക്സിന്റെ കുപ്പിയിൽ നിന്ന് ഒന്ന് തോണ്ടിയിട്ട് നെറ്റിയിൽ തേച്ചു.... "ഇനി കുറച്ച് നേരം ഉറങ്ങിക്കോ" കുപ്പി അടച്ച് തിരികെ ബാഗിലേക്ക് തന്നെ വെച്ച് അവനെ നോക്കി പറഞ്ഞു... മറുപടിയൊന്നും പറയാതെ അവൻ കണ്ണടച്ചതും ഒന്ന് നീട്ടി ശ്വാസം വലിച്ചു വിട്ട് കൊണ്ടവൾ പുറത്തേക്ക് നോക്കിയിരുന്നു... ---

"ഡോ.."കുറച്ചു നേരത്തിൻ ശേഷം അവന്റെ വിളി കേട്ടതും അവൾ തല ചെരിച്ച് അവനെ നോക്കി.. "എന്താ? താൻ ഉറങ്ങിയില്ലായിരുന്നോ?" "ഇല്ല"ചുമൽ കൂച്ചിക്കൊണ്ട് അവൻ പറഞ്ഞു.. "എന്തിനാ വിളിച്ചത്..?" "അത് പിന്നെ നിന്റെ പേരെന്താണെന്നാ പറഞ്ഞത്" "നേരത്തെ പറഞ്ഞപ്പോൾ കേട്ടില്ലല്ലോ..അല്ല ഇപ്പൊ എന്ത് പറ്റി സംസാരത്തിന്.. ഭയങ്കര സോഫ്റ്റ്‌ ആണല്ലോ" "അത് പിന്നെ"ന്ന് പറഞ്ഞു കൊണ്ടവൻ കാൽ സീറ്റിലേക്ക് മടക്കി വെച്ചു കൊണ്ട് അവൾക്ക് നേരെ തിരിഞ്ഞിരുന്നതും അവൾ ഞെട്ടലോടെ വിൻഡോക്കടുത്തേക്ക് ചേർന്നിരുന്നു... "ഹെഡ്സെറ്റ് ചെവിയിൽ വെച്ച് വല്ലതും കേൾക്കുവാണെങ്കിൽ ഇടക്ക് വന്ന് ശല്യം ചെയ്യുന്നത് എനിക്കിഷ്ടമല്ല.. അത് കൊണ്ടാ തന്നോട് ഞാൻ ഹാർഷായി പെരുമാറിയത്.. എനിവേ സോറി" "ഇറ്റ്സ് ഓക്കെ" മറുപടിയായി പല്ലിളിച്ചു കാണിച്ചവൾ പറഞ്ഞതും അവനൊന്ന് ചിരിച്ചു... "ഹവ്... താൻ ഒന്ന് ചിരിച്ചല്ലോ.. ഇത്രയും നേരം കലിപ്പുമായി നടന്നപ്പോഴുണ്ടായിരുന്നതിനേക്കാൾ ഭംഗിയുണ്ട് ഇപ്പൊ ചിരിച്ചു കാണുമ്പോൾ" "സത്യാണോ?"ഒന്നൂടെ ചിരിച്ചു കൊണ്ട് അവൻ ചോദിച്ചതും അവൾ തലയാട്ടി.. "തന്റെ പേരെന്താണെന്നാ പറഞ്ഞേ?നേരത്തെ പറഞ്ഞപ്പോ ഞാൻ ശ്രദ്ധിച്ചില്ലായിരുന്നു" "നിഹ ഷാദിയ.. തന്റെയോ?"

"ഇസാൻ ആസിഫ്" "ഇസാൻ.. ആസിഫ്.. രണ്ട് പേരും തമ്മിൽ ഒരു മാച്ച് ഇല്ലല്ലോ" "ഉണ്ടാകില്ല.. അതെനിക്കും അറിയാം.. പിന്നെ ഒന്ന് ചോദിക്കട്ടെ.. സത്യത്തിൽ ഈ ഒളിച്ചോട്ടം എന്തിനാ?" അവന്റെ ചോദ്യം കേട്ട് അവളൊന്ന് ചിരിച്ചു.. "പറയണോ?" "ആഹ്.." "ഇല്ല.. ഇപ്പൊ പറയാൻ സമയം ആയിട്ടില്ല.. നമ്മളിപ്പോ പരിചയപ്പെട്ടല്ലേ ഉള്ളൂ..അത് കൊണ്ട് വേണ്ട" അവൻ മുഖം വീർപ്പിച്ചു കൊണ്ട് അവളിൽ നിന്നും മുഖം വെട്ടിത്തിരിച്ചു... "പറയാൻ എനിക്ക് തോന്നുമ്പോ ഞാൻ പറയണ്ട് കേട്ടോ.."ചിരിച്ചു കൊണ്ട് നിഹ പറഞ്ഞതും അവൻ തലചെരിച്ച് അവളെ നോക്കി.. "മ്മ്.. ഓക്കെ.. എന്നാ വേറൊന്ന് ചോദിക്കട്ടെ.." "ആഹ്.. ചോദിക്ക്.." "ഒരു മുൻപരിചയം പോലുമില്ലാത്ത എന്നോട് നീയെന്താ ബസ്സിൽ കയറിയപ്പോ തന്നെ അങ്ങനെ ഒക്കെ പെരുമാറിയത്.. ഞാൻ ബസ്സിൽ നിന്നിറങ്ങി നടന്നപ്പോൾ നീയെന്റെ കൂടെ തന്നെ വരികയും ചെയ്തു.. അതൊക്കെ എന്ത് കൊണ്ടാ?"നെറ്റി ചുളിച്ചു കൊണ്ട് അവൻ ചോദിച്ചതും അവൾ ചുമൽ കൂച്ചി.. "സത്യത്തിൽ അതെന്ത് കൊണ്ടാണെന്ന് എനിക്കും അറിയില്ല.. പൊതുവേ പരിചയമില്ലാത്തവരോട് അങ്ങോട്ട് ചെന്ന് പരിചയപ്പെടുന്ന സ്വഭാവമല്ല എനിക്ക്.. പക്ഷെ തന്നെ കണ്ടപ്പോൾ എന്തോ..സംസാരിക്കാതിരിക്കാനേ കഴിയുന്നില്ല..

നിന്റെ കൂടെ ഇരിക്കുമ്പോ ഒരു ഭയവും തോന്നുന്നില്ല..എനിക്ക് തന്നെ എന്റെ പെരുമാറ്റം കണ്ട് അത്ഭുതം തോന്നുവാ" "അങ്ങനെയെങ്കിൽ you love me?"അവന്റെ ചോദ്യം കേട്ട് അവൾ കണ്ണ് മിഴിച്ചു.. "താനെന്തൊക്കെ ആടോ പറയുന്നത്.. എന്തോ ഒരു മുജന്മ ബന്ധം പോലെ..അത്രയുള്ളു.. അതിന് പ്രേമം എന്നൊക്കെ പറഞ്ഞാൽ.." "ഞാനെന്റെ സംശയം ചോദിച്ചെന്നേയുള്ളു.. സാധാരണ മൊഞ്ചുള്ള ചെക്കന്മാരെ കണ്ടാൽ പെമ്പിള്ളേർക്ക് സ്പാർക്ക് അടിക്കുമെന്ന് കേട്ടിട്ടുണ്ട്" "അത് മൊഞ്ചുള്ളവരെ.. തനിക്ക് ആ മൊഞ്ചില്ലല്ലോ.. ഏതാണ്ട് കുരങ്ങന്റെ മോന്ത പോലെയല്ലേ" പറഞ്ഞു കൊണ്ടവൾ വാ പൊത്തി ചിരിച്ചതും അവന്റെ മുഖം ചുവന്നു.. "കുരങ്ങൻ നിന്റെ മറ്റവൻ ആടി" "എന്റെ മറ്റവനെ പറഞ്ഞാലുണ്ടല്ലോ" "ഞാൻ പറയും.. നിന്റെ മറ്റവൻ.. മറ്റവൻ.. മറ്റവൻ..മാങ്ങാണ്ടി മോറൻ"ശബ്ദം കേട്ട് കണ്ടക്ടർ അടുത്തേക്ക് വന്നത് കണ്ട് രണ്ട് പേരും വാ അടച്ച് ഇരുന്നു.. അവരെ രണ്ട് പേരെയും മാറി മാറി ഒന്ന് നോക്കിയതിന് ശേഷം അയാൾ മുന്നിലേക്ക് പോയതും രണ്ടാളും പരസ്പരം നോക്കി കണ്ണുരുട്ടി.. "കുരങ്ങൻ"പിറു പിറുത്തു കൊണ്ടവൾ മുഖം തിരിച്ചു.. "അത് നീയാടീ കുരങ്ങത്തീ" .......തുടരും………..........

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...