🎶 സോളമന്റെ ഉത്തമഗീതം 🎶❤️: ഭാഗം 28

രചന: റിൻസി പ്രിൻസ്‌

അവളുടെ ഇടുപ്പിൽ പിടിച്ച് തന്നോട് ചേർത്തുനിർത്തി... ഒരു നിമിഷം അവൾ ഒന്ന് അമ്പരന്നു പോയി... പിന്നെ അവളുടെ മുഖത്തിന് നേരെ മുഖമടിപ്പിച്ചു, അവന്റെ നിശ്വാസം അവളുടെ മുഖത്ത് പതിച്ചു. " ഇത് പ്രണയത്തിന്റെ മുഖം...! ഏറെ പ്രണയാർദ്രമായി അവളുടെ മുഖത്തേക്ക് നോക്കി അവൻ പറഞ്ഞു... "സോളമാ... പെട്ടെന്നുള്ള അമലയുടെ വിളി കേട്ടപ്പോഴേക്കും രണ്ടുപേരും ഞെട്ടിപ്പോയി ആ നിമിഷം തന്നെ അവൻ അവളിൽ നിന്നും അകന്നു മാറിയിരുന്നു. പെട്ടെന്ന് ഒരു ഭയം അവളുടെ മുഖത്ത് നിഴലിച്ചിരുന്നു.. " നീ ഇത് ഇവിടെ എന്തെടുക്കുവാ..? അടുക്കളയിലേക്ക് വന്നുകൊണ്ട് സോളമൻ ചോദിച്ചു. " നല്ല തലവേദന ഒരു കട്ടൻ ചായ കിട്ടുമോന്ന് അറിയാൻ വേണ്ടി വന്നത് ആണ്.. അപ്പോൾ മരിയ പറഞ്ഞു ചായ ഇട്ടു തരാം എന്ന്. അതിനു വേണ്ടി വെയിറ്റ് ചെയ്യുകയായിരുന്നു.. യാതൊരു ഭാവ വ്യത്യാസവും ഇല്ലാതെ അവനത് പറഞ്ഞപ്പോൾ പെട്ടെന്ന് അമലയുടെ മുഖത്ത് വേദന നിറഞ്ഞു.. ഏക മകന്റെ ആരോഗ്യത്തെക്കുറിച്ച് ആകുലതയുള്ള ഒരു അമ്മയായി പെട്ടെന്ന് അവർ മാറിയിരുന്നു.. "എന്താടാ പെട്ടന്ന് ഒരു തലവേദന..? വല്ല പനിയുണ്ടോ..? യാത്ര ചെയ്തേന്റെ ആണോ..? അവന്റെ മുഖത്തും കവിളിലും ഒക്കെ തലോടിക്കൊണ്ട് അവർ ചോദിച്ചു... ഒരു നിമിഷം വല്ലാത്തൊരു വേദന മരിയയിലും നിറഞ്ഞു. തന്നോട് ഇങ്ങനെ തിരക്കുവാനും തനിക്കൊരു രോഗം വന്നാൽ ഒന്ന് സ്നേഹിക്കുവാനും ആരുമില്ലല്ലോ എന്ന ഒരു ദുഃഖമായിരുന്നു ആ നിമിഷം അവളിൽ നിറഞ്ഞു നിന്നത്... അവനും അത് മനസ്സിലായിരുന്നു സോളമന്.. അവളുടെ മുഖഭാവം മാറിയപ്പോൾ തന്നെ അവന്റെ ഉള്ളം ഒന്ന് വേദനിച്ചിരുന്നു.. " അത്രയ്ക്കൊന്നും ഇല്ല അമ്മേ, ചെറിയൊരു തലവേദന ചിലപ്പോൾ യാത്ര ചെയ്തതിന്റെ ആയിരിക്കും.. പിന്നെ ഞാൻ വൈകിട്ടത്തേക്ക് കഴിക്കാനുള്ള ഫുഡ് എല്ലാവർക്കും ഓർഡർ ചെയ്തിട്ടുണ്ട്.. അത് പറയാനും കൂടിയാ ഞാൻ ഇങ്ങോട്ട് വന്നത്... അത്രയും പറഞ്ഞു അവൾക്ക് മാത്രം കാണാവുന്ന പാകത്തിന് ഒന്ന് കണ്ണ് ഇറുക്കി കാണിച്ച് അവൻ അടുക്കളയിൽ നിന്നും പിൻവാങ്ങിയിരുന്നു.. " അതേതായാലും നന്നായി. ഞാനല്ലെങ്കിലും അത് പറയാനാ മോളോട് വന്നത്. നമുക്ക് വൈകിട്ട് പുറത്ത് എവിടെയെങ്കിലും പോയി ആഹാരം കഴിക്കാമെന്ന്, ഇനി എന്താണെങ്കിലും ഒന്നും ഉണ്ടാക്കണ്ട എന്ന് പറയാൻ വേണ്ടിയാണ് വന്നത്. അപ്പോഴേക്കും അവൻ ആഹാരം ഓർഡർ ചെയ്തല്ലോ. അത് ഏതായാലും നന്നായി. സന്തോഷത്തോടെ അവർ അത് പറഞ്ഞപ്പോൾ അവൾ ഒന്ന് ചിരിക്കുക മാത്രം ചെയ്തു. അപ്പോഴും ശരീരത്തിലെ വിറയിൽ വിട്ടു മാറിയിരുന്നില്ല. കുറച്ചുമുമ്പ് നടന്ന കാഴ്ച അമല കണ്ടുകൊണ്ടു വന്നിരുന്നുവെങ്കിൽ എന്താകുമായിരുന്നു തന്റെ സ്ഥിതിയെന്നാണ് അവൾ ചിന്തിച്ചത്.. " മോളുടെ മുഖത്ത് ഇപ്പോഴും വല്ലാത്ത വിഷമമാണല്ലോ..? വീട്ടിലെ കാര്യങ്ങൾ ഓർത്തിട്ടാണോ അവളുടെ മുഖത്തേക്ക് നോക്കി ഏറെ വിഷമത്തോടെ അമല ചോദിച്ചു.. "അങ്ങനെയൊന്നുമില്ല ആന്റി,അതൊക്കെ എനിക്ക് ശീലമായതാ.. അതുകൊണ്ട് വലിയ വിഷമങ്ങളും ബുദ്ധിമുട്ടുകളും ഒന്നും തോന്നാറില്ല.. " എന്ത് ചെയ്യാനാ മോളെ, ചിലർക്ക് ദൈവം ഇങ്ങനെ വലിയ ബുദ്ധിമുട്ടുകളും വിഷമങ്ങളും ഒക്കെ കൊടുക്കും. അതിനൊക്കെ ഒടുക്കം വലിയ സന്തോഷം അവർക്ക് കാത്തുവെച്ചിട്ടുണ്ടാവും. അതുകൊണ്ട് ഇങ്ങനെ കൊടുക്കുന്നത്, പിന്നെ ദൈവത്തിന് ഏറ്റവും കൂടുതൽ ഇഷ്ടമുള്ള ആളുകൾക്ക് ആണ് എപ്പോഴും ദൈവം പരീക്ഷണങ്ങൾ കൊടുക്കാറുള്ളത്.. ഇല്ലെങ്കിൽ അവർ ദൈവത്തെ മറന്നു പോവില്ലേ..? ഏറ്റവും കൂടുതൽ പരീക്ഷണങ്ങളിലൂടെ കടന്നുപോയാൽ ദൈവത്തെ അവർ ഓർക്കും, അവർ എപ്പോഴും ദൈവത്തെ ഓർക്കണം എന്ന ഒരു സ്വാർത്ഥ താല്പര്യ ഉണ്ടെന്നു കൂട്ടിക്കോ..! അതുകൊണ്ട് ഇങ്ങനെയൊക്കെ ചെയ്യുന്നത്, പക്ഷേ ഇതിനൊക്കെ അപ്പുറം വലിയൊരു സന്തോഷം അവർക്ക് വേണ്ടി ഈശ്വരൻ കാത്തുവെച്ചിട്ടുണ്ടാവും എവിടെയെങ്കിലും, അതുറപ്പ് ആണ്... അതുപോലെ മോൾക്ക് വേണ്ടിയും ഒരു വലിയ സന്തോഷം എവിടെയോ ഈശോ കാത്തുവെച്ചിട്ടുണ്ട്.. അതിനുവേണ്ടിയാണ് ഈ വിഷമങ്ങളൊക്കെ... വിഷമിക്കേണ്ട..! അരുമയോടെ അവളുടെ തലമുടിയിഴകളിൽ തഴുകികൊണ്ട് അമല പറഞ്ഞു, അവൾ ഒന്ന് പുഞ്ചിരിക്കുക മാത്രം ചെയ്തു. അത്തരത്തിൽ ദൈവം തനിക്ക് വേണ്ടി കാത്തു വച്ചിരിക്കുന്ന സന്തോഷമാണ് അവൻ എന്നാണ് ആ നിമിഷം അവൾ ചിന്തിച്ചിരുന്നത്. " അവിടെ ഉണ്ടായിരുന്ന ജോണിന്റെ സഹോദരി മോളോട് ഇങ്ങനെ തന്നെയാണോ എപ്പോഴും ഇടപെടാറുള്ളത്? അവരെ കണ്ടിട്ട് ഒരു കൾച്ചർ ഇല്ലാത്ത സ്ത്രീയെ പോലെ ആണ് എനിക്ക് തോന്നിയത്.. " അവിടെ എല്ലാവരും എന്നോട് ഇങ്ങനെയൊക്കെ തന്നെയാണ് ഇടപെടുന്നത്, അവരെ സംബന്ധിച്ചിടത്തോളം പൈസ കൊടുക്കാതെ നിർത്തുന്ന ഒരു വേലക്കാരി മാത്രമാണ് ഞാൻ.. കുട്ടിക്കാലത്ത് എനിക്ക് പരിഭവങ്ങളും വിഷമങ്ങളും ഒക്കെ തോന്നിയിട്ടുണ്ട്. എന്നോട് എന്താ ഇങ്ങനെ, അമ്മയെന്താ ഒന്നും പറയാത്തത് എന്റെ അമ്മയല്ലേ അച്ഛനല്ലേ അവരെന്താ ജീനായോട് കാണിക്കാത്തതൊക്കെ എന്നോട് കാണിക്കുന്നത് എന്നൊക്കെ ചിന്തിച്ചിട്ടുണ്ട്. കുറച്ച് അറിവ് വെച്ചപ്പോൾ പപ്പയുടെ അമ്മ തന്നെയാ പറഞ്ഞു തന്നത് ഞാൻ പപ്പയുടെ മോളല്ലെന്നും ഇവിടെ എനിക്ക് ഒരു വേലക്കാരിയുടെ സ്ഥാനം മാത്രമേ ഉള്ളൂ എന്നും.. പിന്നീട് അത് അറിഞ്ഞു ഞാൻ നിന്നിട്ടുള്ളൂ, എങ്കിലും അത് വീണ്ടും ഓർമ്മിപ്പിക്കാൻ എന്നതുപോലെ എല്ലാവരും എന്നോട് ഇടപെടുന്നത് അത് ഉറപ്പാക്കുന്ന തരത്തിലാ, ആന്റി പറഞ്ഞപോലെ ഒരു സന്തോഷകരമായ ജീവിതം എനിക്ക് ഉണ്ടാകുമെന്ന് ഞാൻ ഇതുവരെ വിശ്വസിച്ചിട്ടില്ല. എനിക്ക് വേണ്ടി ഈശ്വരൻ എന്തെങ്കിലും വലിയ സന്തോഷം മാറ്റിവെച്ചിട്ടുണ്ട് എന്നും ചിന്തിച്ചിട്ടില്ല, പക്ഷേ ഇപ്പോൾ എവിടെയൊക്കെയോ എനിക്ക് തോന്നുന്നുണ്ട്, എനിക്ക് വേണ്ടി എന്തൊക്കെയോ ഈശ്വരൻ കരുതി വെച്ചിട്ടുണ്ടെന്ന്. " ഉണ്ട് മോളെ..! അങ്ങനെ ഒരു മനുഷ്യനെ നശിക്കാൻ വേണ്ടി മാത്രം ദൈവം വിടില്ല, ഒരു കയറ്റത്തിന് ഒരു ഇറക്കമുണ്ട്. അത് സ്വാഭാവികമായ കാര്യമാണ്.. വിഷമിക്കേണ്ട, ഞാൻ ഒന്ന് കുളിച്ചിട്ട് വരാം, ഞാൻ ഈ കാര്യം മോളോട് പറയാൻ വേണ്ടി വന്നത് ആണ്... അതും പറഞ്ഞു അവർ അകത്തേക്ക് പോയപ്പോൾ എവിടെ നിന്നോ സ്വിച്ചിട്ട പോലെ വീണ്ടും വരുന്നുണ്ടായിരുന്നു സോളമൻ... " അമ്മ പറഞ്ഞത് കേട്ടില്ലേ എല്ലാത്തിനും ഉപരി ഒരു വലിയ സന്തോഷം കാത്തിരിപ്പുണ്ടെന്ന്, അത് മറ്റൊന്നുമല്ല അമ്മയുടെയും മോൻ തന്നെയാണ്... സോളമൻ പറഞ്ഞപ്പോൾ ആ മുഖത്തേക്ക് തന്നെ നോക്കിയിരുന്നു മരിയ, " പിന്നെ കുറച്ചു മുമ്പ് ഞാൻ പറഞ്ഞില്ലേ വേറെ ഭാവങ്ങളൊക്കെ ഉണ്ടെന്ന്, ഇനി ഏതു ഭാവമാ കാണേണ്ടത്..? കുറച്ചും കൂടി റൊമാന്റിക് ആയിട്ടുള്ള ഭാവം കാണണോ...? അവൾക്കരിലേക്ക് കുറച്ചു നീങ്ങി നിന്നുകൊണ്ട് അവൻ ചോദിച്ചു... " മുൻപ് ഞാൻ അതിലും മനോഹരമായ ഒരു ഭാവം കണ്ടിരുന്നു, പേടിച്ചു അറ്റാക്ക് വരും എന്ന് പറഞ്ഞതുപോലെയുള്ള ഒരു ഭാവം, ഈ എലി പാമ്പിനെ കാണുമ്പോൾ പേടിച്ചു ഓടില്ലേ അതുപോലെ... ആ ഭാവം ഒന്നുകൂടി കാണിച്ചു തരുമോ..? "ഓഹോ.. മറിയാമ്മോ നീ ഗോളടിച്ചു തുടങ്ങിയല്ലോ അവളുടെ മുഖത്തേക്ക് നോക്കി മീശ ഒന്ന് പിരിച്ച് ഒരു കുസൃതിയോടെ അവൻ പറഞ്ഞപ്പോൾ അവൾ ഒന്ന് ചിരിച്ചിരുന്നു... " കുറച്ച് മുൻപ് മമ്മയോട് പറഞ്ഞല്ലോ എന്തൊക്കെയോ തോന്നുന്നുണ്ടെന്ന്, ഈശ്വരൻ എന്തൊക്കെയോ കരുതിവച്ചു എന്ന് തോന്നുന്നുണ്ടെന്നോ അങ്ങനെ എന്തൊക്കെയോ പറയുന്നത് കേട്ടു.. ഇതൊക്കെ എന്നെ ഉദ്ദേശിച്ച് പറഞ്ഞതല്ലേ...? ചെറുചിരിയോടെ അവൻ ചോദിച്ചപ്പോൾ അവളുടെ മുഖത്തും ഒരു നാണം അലഅടിച്ചിരുന്നു.. അവളുടെ മുഖത്തോട് കുറച്ചുകൂടി അരികിലേക്ക് വന്നുകൊണ്ട് അവൻ ഒരിക്കൽ കൂടി ചോദിച്ചപ്പോൾ ചെറുചിരിയോടെ അവന് ഒട്ടും വേദനിക്കാത്ത തരത്തിൽ അവന്റെ നെഞ്ചിൽ പിടിച്ച് തള്ളിയിരുന്നു അവൾ... " ഒന്ന് മാറി നിക്ക്, ഇനി ആരെങ്കിലും വന്നു കണ്ടാ അത് മതി... " അപ്പോൾ ആരുമില്ലെങ്കിൽ കുഴപ്പമില്ല..? കുസൃതിയോടെ അവളുടെ മുഖത്തേക്ക് നോക്കി അവൻ ചോദിച്ചു... അവളൊന്നു കൂർപ്പിച്ചു നോക്കി, അവൻ ഒരു കണ്ണിറുക്കി കാണിച്ചു... "പിന്നെ നമ്മൾ എപ്പോഴാ കാര്യമായിട്ടൊന്നു സംസാരിക്കുന്നത്..? ഇതുവരെ നമ്മൾ നന്നായിട്ടൊന്ന് സംസാരിച്ചില്ലല്ലോ, " എന്താണെങ്കിലും ഇവിടെവച്ച് സംസാരിക്കണ്ട. എനിക്ക് പേടിയാ ഇങ്ങനെ ഉള്ളില് തീയും ആയി നിൽക്കാൻ... " എങ്കിൽ മറ്റെവിടെയെങ്കിലും വെച്ച് സംസാരിക്കാം, തൽക്കാലം നമുക്ക് നാളെ ഹോസ്പിറ്റലിൽ വെച്ച് കാണാം അല്ലേ..? പിന്നെ നാളെ എനിക്ക് കഷ്ടപ്പെട്ട് ബസ്സിന് ഒന്നും കയറാൻ വയ്യ, ബസ് സ്റ്റോപ്പിൽ വന്ന് ഞാൻ വിളിക്കും "അയ്യോ അതൊന്നും വേണ്ട, ആരെങ്കിലും കണ്ടാൽ പിന്നെ അതൊക്കെ പ്രശ്നമാവും.. " നമ്മളെ ഒരു വീട്ടിൽ താമസിക്കുന്നവരല്ലേ, എന്ത് സംഭവിക്കാനാ..? " അത് വേണ്ട എനിക്ക് പേടിയാ " നിനക്കെന്തിനാ പേടി ഇല്ലാത്തെ, ആന്റി കണ്ടാലോ എനിക്ക് പേടിയാ, "എങ്കിൽ ഹോസ്പിറ്റലിൽ വച്ച് കാണാം അല്ലേ..? " അതും വേണ്ട അങ്കിൾ അവിടെ ഇല്ലേ, " അങ്ങനെ നോക്കിയ നമ്മൾ എവിടെ വച്ച് കാണും..? എന്താണെങ്കിലും ഹോസ്പിറ്റലിൽ വെച്ച് ഒന്നും സംസാരിക്കേണ്ട, "എങ്കിൽ ഒരു കാര്യം ചെയ്യാം ഹോസ്പിറ്റൽ വച്ചു വീട്ടിൽ വച്ചും ഒന്നും സംസാരിക്കേണ്ട നാളെ ക്ലാസ് കഴിയുമ്പോൾ നീ നേരെ ഹോസ്പിറ്റലിന്റെ ബാക്കിലുള്ള ഗേറ്റിൽ വന്ന് നിൽക്കു, ഞാൻ അവിടേക്ക് വരാം.. "അയ്യോ അത്..... "ഒരു അയ്യയോയും പറയണ്ട എന്തോ പറയാൻ വന്നവളുടെ ചുണ്ടിൽ ചൂണ്ടുവിരൽ വച്ച് അവൻ പറഞ്ഞു, ഒരു നിമിഷം മിഴികൾ തമ്മിൽ കോർത്ത് പോയിരുന്നു.. അവളുടെ മിഴികളിൽ ആദ്യമായി പ്രണയം നിറഞ്ഞു നിൽക്കുന്നത് അവൻ കണ്ടു.. ആ വിരലുകൾ അവളുടെ ചുണ്ടിനേ മൃദുവായി തഴുകി തലോടി.........കാത്തിരിക്കൂ.........

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...