ആമസോൺ തടത്തിലെ പരിസ്ഥിതി കുറ്റകൃത്യങ്ങൾ; യുഎഇയുടെ നേതൃത്വത്തിൽ നടന്ന റെയ്ഡിൽ 94 പേർ അറസ്റ്റിൽ, 6.4 കോടി ഡോളറിലധികം പിടിച്ചെടുത്തു

  അബുദാബി: ആമസോൺ തടത്തിൽ നടക്കുന്ന പാരിസ്ഥിതിക കുറ്റകൃത്യങ്ങൾക്കെതിരെ യുഎഇ ആഭ്യന്തര മന്ത്രാലയത്തിൻ്റെ നേതൃത്വത്തിൽ നടന്ന "ഓപ്പറേഷൻ ഗ്രീൻ ഷീൽഡ്" എന്ന ദൗത്യത്തിൽ 94 പേർ അറസ്റ്റിലായി. നിയമവിരുദ്ധമായി ശേഖരിച്ച 6.4 കോടി ഡോളറിലധികം (ഏകദേശം 534 കോടി രൂപ) വിലമതിക്കുന്ന വസ്തുക്കളും പിടിച്ചെടുത്തിട്ടുണ്ട്. രണ്ടാഴ്ച നീണ്ടുനിന്ന ഈ ഓപ്പറേഷനിൽ ബ്രസീൽ, കൊളംബിയ, ഇക്വഡോർ, പെറു എന്നീ രാജ്യങ്ങളിലെ 1,500-ലധികം ഉദ്യോഗസ്ഥർ പങ്കെടുത്തു. 350-ലധികം ഫീൽഡ് ഓപ്പറേഷനുകൾ ഇതിൻ്റെ ഭാഗമായി നടന്നു. നിയമവിരുദ്ധമായ ഖനനം, മരംവെട്ട്, വന്യജീവി കടത്ത്, ഇന്ധനക്കടത്ത് എന്നിവയായിരുന്നു പ്രധാനമായും ലക്ഷ്യമിട്ട കുറ്റകൃത്യങ്ങൾ. പിടിച്ചെടുത്തവയിൽ 310 ടണ്ണിലധികം നിയമവിരുദ്ധമായി ഖനനം ചെയ്ത ധാതുക്കളും, 61 ടൺ കാൽസ്യം ഓക്സൈഡും, 3,800 ക്യുബിക് മീറ്റർ നിയമവിരുദ്ധമായി മുറിച്ച മരങ്ങളും, 39,000 ഗാലനിലധികം കടത്തിയ ഇന്ധനവും ഉൾപ്പെടുന്നു. 2,100-ലധികം ജീവനുള്ള മൃഗങ്ങളെ രക്ഷപ്പെടുത്തുകയും, 6,350-ലധികം ചത്ത മൃഗങ്ങളെ (പക്ഷികൾ, പല്ലികൾ, സസ്തനികൾ ഉൾപ്പെടെ) പിടിച്ചെടുക്കുകയും ചെയ്തു. കൂടാതെ, കുറ്റകൃത്യങ്ങൾക്ക് ഉപയോഗിച്ച ബുൾഡോസറുകൾ, ട്രക്കുകൾ, ക്രഷറുകൾ എന്നിവയുൾപ്പെടെ 530 യൂണിറ്റ് ഉപകരണങ്ങളും പിടിച്ചെടുത്തിട്ടുണ്ട്. ആമസോൺ തടത്തിലെ പരിസ്ഥിതി സംരക്ഷണത്തിനും ഇത്തരം കുറ്റകൃത്യങ്ങൾക്കെതിരെ പോരാടുന്നതിനും യുഎഇയുടെ നേതൃത്വത്തിൽ നടന്ന ഈ ദൗത്യം ഒരു വലിയ മുന്നേറ്റമായി കണക്കാക്കപ്പെടുന്നു. കൂടുതൽ അറസ്റ്റുകൾ ഉണ്ടാകുമെന്നാണ് അധികൃതർ പ്രതീക്ഷിക്കുന്നത്.