സുലൈമാനിയ റെയിൽവേ സ്റ്റേഷൻ തുറന്നു
![സുലൈമാനിയ റെയിൽവേ സ്റ്റേഷൻ തുറന്നു](https://metrojournalonline.com/static/c1e/client/89527/migrated/8b2d94149917fc741692310a73fefa9c.jpg)
ജിദ്ദ: മക്കക്കും മദീനക്കുമിടയിലെ അൽഹറമൈൻ റെയിൽവേയുടെ സുലൈമാനിയയിലെ സ്റ്റേഷൻ പ്രവർത്തനം പുനരാരംഭിച്ചു. അഗ്നിബാധയെ തുടർന്ന് 21 മാസത്തോളം അടച്ചിട്ട ശേഷം ആവശ്യമായ റിപ്പയറിങ് ജോലികൾ പൂർത്തിയാക്കിയാണ് സ്റ്റേഷൻ പഴയതുപോലെ പ്രവർത്തിക്കാൻ തുടങ്ങിയത്.
ചൊവ്വാഴ്ച മുതൽ ജിദ്ദയിലെ പ്രധാന സ്റ്റേഷൻ പ്രവർത്തിച്ചുതുടങ്ങുമെന്ന് ഗതാഗത, ലോജിസ്റ്റിക് സർവിസ് മന്ത്രി എൻജി. സ്വാലിഹ് അൽജാസിർ ട്വിറ്ററിലൂടെ അറിയിച്ചിരുന്നു. ജിദ്ദയിലെ പ്രധാന സ്റ്റേഷനാണ് സുലൈമാനിയയിലേത്. അഗ്നിബാധയെ തുടർന്ന് സ്റ്റേഷൻ പ്രവർത്തനം നിർത്തിവെച്ചപ്പോൾ പകരം ജിദ്ദ വിമാനത്താവള റെയിൽവേ സ്റ്റേഷനായിരുന്നു യാത്രക്ക് ആളുകൾ ഉപയോഗിച്ചിരുന്നത്.
നഗരമധ്യത്തിലുള്ള സുലൈമാനിയ സ്റ്റേഷൻ തുറന്നതോടെ മക്ക, മദീന എന്നിവിടങ്ങളിലേക്കുള്ള യാത്രക്കാർക്ക് വേഗത്തിൽ സ്റ്റേഷനുകളിലെത്താൻ സാധിക്കും.