കേരളത്തിൽ ഐഎസ് സ്‌ഫോടന പരമ്പരക്ക് പദ്ധതിയിട്ടെന്ന കേസ്; എൻഐഎ കോടതി വിധി ഇന്ന്

കേരളത്തിൽ ഐഎസ് ഭീകരർ സ്ഫോടനം ആസൂത്രണം ചെയ്‌തെന്ന കേസിൽ കൊച്ചി എൻഐഎ കോടതി ഇന്ന് വിധി പറയും. പാലക്കാട് കൊല്ലംകോട് സ്വദേശി റിയാസ് അബൂബക്കർ മാത്രമാണ് കേസിലെ പ്രതി. ഇയാൾ ശ്രീലങ്കയിലെ സ്ഫോടന പരമ്പരയുടെ സൂത്രധാരനുമായി ചേർന്ന് കേരളത്തിൽ സ്ഫോടന പരമ്പര ആസൂത്രണം ചെയ്തെന്നാണ് എൻഐഎ കണ്ടെത്തൽ. 

2018 മെയ് 15 നാണ് റിയാസ് അബൂബക്കറിനെ എൻഐഎ അറസ്റ്റ് ചെയ്തത്. യുഎപിഎയുടെ 38, 39 വകുപ്പുകളും ഗൂഢാലോചനയടക്കമുള്ള കുറ്റങ്ങളുമാണ് ഇയാൾക്കെതിരെ ചുമത്തിയിരിക്കുന്നത്.

സ്‌ഫോടനപരമ്പരക്കായി യുവാക്കളെ റിക്രൂട്ട് ചെയ്യാൻ സമൂഹ മാധ്യമങ്ങൾ വഴി ശ്രമം നടത്തിയതായും എൻഐഎ കണ്ടെത്തിയിട്ടുണ്ട്. റിയാസിന്റെ സമൂഹ മാധ്യമ അക്കൗണ്ടുകളും വീട്ടിൽ നിന്നും പിടികൂടിയ ഇലക്ട്രോണിക് ഉപകരണങ്ങളുമാണ് തെളിവായി നൽകിയിരിക്കുന്നത്.