നിർണായക തെളിവുകൾ കസ്റ്റംസിന് ലഭിച്ചു; സരിത്തിന്റെ സുഹൃത്ത് അഖിലും കസ്റ്റഡിയിൽ

സ്വർണക്കടത്ത് കേസിൽ നിർണായക തെളിവുകൾ കസ്റ്റംസിന് ലഭിച്ചു. ഒന്നാം പ്രതി സരിത്തിന്റെ സുഹൃത്ത് അഖിലിന്റെ പക്കൽ നിന്നാണ് തെളിവുകൾ കണ്ടെത്തിയത്. ഇയാളെ അന്വേഷണ സംഘം കസ്റ്റഡിയിലെടുത്തു. കോൺസുലേറ്റിന്റെ പേരിൽ വ്യാജരേഖയുണ്ടാക്കാൻ ഉപയോഗിച്ച ലാപ് ടോപ്പ്, സീൽ നിർമിച്ച മെഷീൻ എന്നിവയാണ് പിടിച്ചെടുത്തത്.

അഖിലിനെ കസ്റ്റംസ് സംഘം ചോദ്യം ചെയ്യുകയാണ്. നേരത്തെ സരിത്തിനെ എൻ ഐ എ കോടതിയിൽ ഹാജരാക്കിയിരുന്നു. കസ്റ്റംസ് കസ്റ്റഡിയിലുള്ള ഇയാളെ ചോദ്യം ചെയ്യലിനായി വിട്ടുകിട്ടണമെന്ന് എൻ ഐ എ ആവശ്യപ്പെട്ടിരുന്നു. തുടർന്നാണ് കോടതിയിൽ എത്തിച്ചത്.

അന്വേഷണം ശക്തമായി തന്നെ മുന്നോട്ടു പോകുകയാണ്. മൂന്നാം പ്രതി ഫൈസൽ ഫരീദിന്റെ വീട്ടിൽ കസ്റ്റംസ് ഇന്ന് റെയ്ഡ് നടത്തിയിരുന്നു. തൃശ്ശൂർ കൈപ്പമംഗലത്തുള്ള വീട്ടിലാണ് കസ്റ്റംസ് റെയ്ഡ് നടത്തിയത്.