കാർഡ് കൊണ്ടുവന്നിട്ടത് ഇ ഡി ഉദ്യോഗസ്ഥർ; ജയിലിൽ കിടക്കേണ്ടി വന്നാലും ഒപ്പിടില്ലെന്ന് പറഞ്ഞതായി ബിനീഷിന്റെ ഭാര്യ

27 മണിക്കൂർ നീണ്ടുനിന്ന റെയ്ഡിനൊടുവിൽ വീട്ടിൽ നിന്നും കൊണ്ടുപോയത് തന്റെ അമ്മയുടെ ഐ ഫോൺ മാത്രമാണെന്ന് ബിനീഷ് കോടിയേരിയുടെ ഭാര്യ റെനിറ്റ. ഇ ഡി സംഘം മടങ്ങിയ ശേഷം റെയ്ഡിനെ കുറിച്ച് സംസാരിക്കുകയായിരുന്നു റെനിറ്റ

മുഹമ്മദ് അനൂപിന്റേതെന്ന് പറയുന്ന ക്രെഡിറ്റ് കാർഡ് ഇവിടെ ഇ ഡി കൊണ്ടുവന്നിട്ടതാണ്. അല്ലെങ്കിൽ അത് കിട്ടിയപ്പോൾ ഞങ്ങളെ വിളിച്ച് കാണിക്കണമായിരുന്നു. രാത്രി വൈകി രേഖകളിൽ ഒപ്പിടണമെന്ന് പറഞ്ഞ് വിളിപ്പിച്ചു. അതുവരെ ഞങ്ങൾ മുറിയിലായിരുന്നു.

വീട്ടിൽ താഴത്തെ നിലയിലെ ഒരു മുറിയിൽ മാത്രമാണ് ഇ ഡി സംഘം പരിശോധിച്ചത്. ഇതിനകത്തെ ഡ്രോയറിൽ നിന്ന് ക്രെഡിറ്റ് കാർഡ് ലഭിച്ചുവെന്നാണ് ഇ ഡി സ്‌റ്റേറ്റ്‌മെന്റിൽ പറഞ്ഞത്. അതുവായിച്ച് കഴിഞ്ഞപ്പോഴാണ് മുഹമ്മദ് അനൂപിന്റേതാണെന്ന് മനസ്സിലായത്. ഇത് ഇവിടെ നിന്ന് ലഭിച്ചതല്ല. അതിൽ ഒപ്പിടില്ലെന്ന് പറഞ്ഞു. ഒപ്പിടണമെങ്കിൽ കാർഡ് ഇ ഡി കൊണ്ടുവന്നിട്ടതാണെന്ന് എഴുതണമെന്ന് പറഞ്ഞു.

ഒപ്പിടാതെ പോകില്ലെന്നും ബിനീഷ് ശനിയാഴ്ച മടങ്ങി വരണമെങ്കിൽ ഒപ്പിടണം, അല്ലെങ്കിൽ അവിടെ കിടക്കുമെന്നും പറഞ്ഞു. ജയിലിൽ കിടക്കേണ്ടി വന്നാലും ശരി, വീട്ടിൽ നിന്ന് കിട്ടാത്ത സാധനത്തിന് ഒപ്പിട്ട് തരാനാകില്ലെന്ന് ശക്തമായി പറഞ്ഞുവെന്നും റെനീറ്റ മാധ്യമങ്ങളെ അറിയിച്ചു.