പെരിന്തൽമണ്ണ മണ്ഡലത്തിലെ എണ്ണാതെ വെച്ച 348 സ്‌പെഷ്യൽ തപാൽവോട്ടിന്റെ വോട്ടുപെട്ടി കാണാനില്ല
പെരിന്തൽമണ്ണ നിയമസഭാ തെരഞ്ഞെടുപ്പ് ഫലത്തിൽ തർക്കവിഷയമായ വോട്ടുപെട്ടി കാണാനില്ല. തർക്കത്തെ തുടർന്ന് എണ്ണാതെ വെച്ച 348 സ്‌പെഷ്യൽ തപാൽ വോട്ടിന്റെ പെട്ടികളിലൊന്നാണ് കാണാതായത്. പെരിന്തൽമണ്ണ ട്രഷറിയിൽ ആയിരുന്നു പെട്ടി സൂക്ഷിച്ചിരുന്നത്. കഴിഞ്ഞ നിയമസഭാ തെരഞ്ഞെടുപ്പിൽ മണ്ഡലത്തിൽ 38 വോട്ടിന്റെ ഭൂരിപക്ഷത്തിലാണ് യുഡിഎഫ് സ്ഥാനാർഥി നജീബ് കാന്തപുരം വിജയിച്ചത്.
അപാകതകൾ ചൂണ്ടിക്കാട്ടി 348 സ്‌പെഷ്യൽ തപാൽ വോട്ടുകൾ എണ്ണിയിരുന്നില്ല. ഉദ്യോഗസ്ഥർ ബാലറ്റ് കവറിൽ ഒപ്പുവെച്ചില്ലെന്ന കാരണത്താലാണ് എണ്ണാതിരുന്നത്. ഈ വോട്ടുകൾ അസാധുവാക്കിയതിനെതിരെ എതിർ സ്ഥാർഥി കെപിഎം മുസ്തഫ ഹൈക്കോടതിയെ സമീപിച്ചിരുന്നു. പെരിന്തൽമണ്ണ സബ് ട്രഷറിയിൽ സൂക്ഷിച്ചിരുന്ന സ്‌പെഷ്യൽ തപാൽ വോട്ടുകളും മറ്റും ഹൈക്കോടതിയുടെ സംരക്ഷണയിലേക്ക് മാറ്റണമെന്ന മുസ്തഫയുടെ ആവശ്യം കോടതി അംഗീകരിച്ചിരുന്നു. ഇത് ഹൈക്കോടതിയിലേത്ക് മാറ്റാനായി ഉദ്യോഗസ്ഥർ എത്തിയപ്പോഴാണ് പെട്ടി കാണാനില്ലെന്ന കാര്യം മനസ്സിലായത്. പെട്ടി മറ്റൊരു ട്രഷറിയിലേക്ക് മാറ്റിയെന്നാണ് ഉദ്യോഗസ്ഥർ പറയുന്നത്.
