പള്ളിപ്പുറത്ത് ബിജെപി ഭരണം വീണു; യുഡിഎഫ് അവിശ്വാസത്തെ പിന്തുണച്ച് എൽഡിഎഫ്

ആലപ്പുഴ: ചേന്നം പള്ളിപ്പുറം ഗ്രാമപഞ്ചായത്തിൽ ബിജെപി ഭരണസമിതിക്കെതിരായ അവിശ്വാസ പ്രമേയം പാസായി. പ്രസിഡന്റ് വിനീത കെ.ക്കെതിരെ യുഡിഎഫ് കൊണ്ടുവന്ന അവിശ്വാസ പ്രമേയത്തെ എൽഡിഎഫ് പിന്തുണച്ചതോടെയാണ് ബിജെപിക്ക് ഭരണം നഷ്ടമായത്. ഏഴിനെതിരെ 12 വോട്ടുകൾക്കാണ് അവിശ്വാസ പ്രമേയം പാസായത്.

​19 അംഗങ്ങളുള്ള പഞ്ചായത്തിൽ ബിജെപിക്കും യുഡിഎഫിനും (കോൺഗ്രസ്) 7 വീതവും എൽഡിഎഫിന് (സിപിഎം) 5 അംഗങ്ങളുമാണുള്ളത്. തെരഞ്ഞെടുപ്പിൽ നറുക്കെടുപ്പിലൂടെയാണ് ബിജെപി പ്രസിഡന്റ്, വൈസ് പ്രസിഡന്റ് സ്ഥാനങ്ങൾ നേടിയെടുത്തിരുന്നത്. ഭരണസ്തംഭനവും വികസന മുരടിപ്പും ആരോപിച്ചാണ് പ്രതിപക്ഷം അവിശ്വാസ പ്രമേയം നൽകിയത്.