സിനിമാ സെറ്റുകളിലെ ലഹരി ഉപയോഗം: അന്വേഷണം തുടങ്ങിയെന്ന് കൊച്ചി സിറ്റി പോലീസ് കമ്മീഷണർ

സിനിമ സെറ്റുകളിലെ ലഹരി ഉപയോഗം തടയാൻ അന്വേഷണം തുടങ്ങിയെന്ന് കൊച്ചി സിറ്റി പോലീസ് കമ്മീഷണർ സേതുരാമൻ. സിനിമ സെറ്റുകളിൽ ഇനി മുതൽ ഷാഡോ പോലീസിനെ വിന്യസിക്കും. ഇതുസംബന്ധിച്ച് വിവരം ലഭിച്ചാൽ റെയ്ഡ് നടത്തും. പക്ഷേ ഇതുവരെ ആരിൽ നിന്നും പോലീസിന് പരാതി ലഭിച്ചിട്ടില്ല. 

വെളിപ്പെടുത്തലുകൾ നടത്തിയവരുടെ മൊഴി എക്‌സൈസ് രേഖപ്പെടുത്തുന്നുണ്ട്. ആവശ്യമെങ്കിൽ പോലീസും മൊഴി രേഖപ്പെടുത്തും. ഇതുമായി ബന്ധപ്പെട്ട് കഴിഞ്ഞ ദിവസം പ്രത്യേക യോഗം ചേർന്നിരുന്നു. സിനിമ മേഖലയിലെ ലഹരി ഉപയോഗം സംബന്ധിച്ച് സിനിമാ പ്രവർത്തകരിൽ നിന്ന് തന്നെയുള്ള തുറന്നുപറച്ചിൽ സ്വാഗതാർഹമാണെന്നും കമ്മീഷണർ പറഞ്ഞു.