എം വിജിൻ എംഎൽഎയെ പോലീസ് അപമാനിച്ചു, കണ്ണൂർ എസ്ഐ പ്രകോപനമുണ്ടാക്കി: ഇ പി ജയരാജൻ
Jan 5, 2024, 11:34 IST
എം വിജിൻ എംഎൽഎയെ പോലീസ് അപമാനിക്കുകയാണ് ചെയ്തതെന്ന് എൽഡിഎഫ് കൺവീനർ ഇ പി ജയരാജൻ. കണ്ണൂരിൽ നടന്ന സംഭവത്തിൽ പോലീസ് കൃത്യനിർവഹണത്തിൽ വീഴ്ച വരുത്തി. ടൗൺ എസ് ഐ പ്രകോപനമുണ്ടാക്കി. പ്രസംഗിച്ചു കൊണ്ടിരിക്കുമ്പോൾ പോയി പേര് ചോദിച്ചു. എത്ര പരിഹാസ്യമായ നിലയാണത്. കേരളത്തിലെ പോലീസിനെ അപകീർത്തിപ്പെടുത്താനുള്ള ബോധപൂർവമായ ശ്രമമായിട്ടാണ് തോന്നിയതെന്നും ജയരാജൻ പറഞ്ഞു
ഒരു എംഎൽഎയോട് പെരുമാറേണ്ട രീതിയിൽ അല്ല എസ് ഐ പെരുമാറിയത്. കുറച്ച് ശബ്ദമുയർത്തി എന്നല്ലാതെ ഒരു തെറ്റായ വാക്കും വിജിൻ ഉപയോഗിച്ചിട്ടില്ല. ജനപ്രതിനിധി എന്ന നിലയിൽ പ്രതികരിക്കുക മാത്രമാണ് ചെയ്തത്. മാർച്ചിൽ പങ്കെടുത്തവർ വളരെ ശാന്തരായതു കൊണ്ട് വേറെ സംഭവങ്ങളൊന്നും കണ്ണൂരിലുണ്ടായില്ല. ആഭ്യന്തര വകുപ്പിന്റെ വീഴ്ചയായി ഇതിനെ കാണാനാകില്ലെന്നും ഇപി ജയരാജൻ പറഞ്ഞു.