ഇനിയുള്ള പോരാട്ടം മോദിക്കെതിരെ; രാജ്യമാകെ സഞ്ചരിച്ച് ജനങ്ങളുമായി സംസാരിക്കും: കെജ്രിവാൾ

ഇനിയുള്ള പോരാട്ടം നരേന്ദ്രമോദിക്കെതിരെയാണെന്ന് ആം ആദ്മി പാർട്ടി നേതാവും ഡൽഹി മുഖ്യമന്ത്രിയുമായ അരവിന്ദ് കെജ്രിവാൾ. മദ്യനയക്കേസിൽ ഇടക്കാല ജാമ്യം ലഭിച്ചതിന് പിന്നാലെ ഡൽഹിയിലെ ആംആദ്മി ആസ്ഥാനത്ത് സംസാരിക്കുകയായിരുന്നു കെജ്രിവാൾ. ജാമ്യം നേടിയ 21 ദിവസവും മോദിക്കെതിരായ പോരാട്ടാമാകും നടത്തുക. രാജ്യം മുഴുവൻ സഞ്ചരിച്ച് ജനങ്ങളുമായി സംസാരിക്കുമെന്നും കെജ്രിവാൾ പറഞ്ഞു

ആംആദ്മി പാർട്ടിയെ ഇല്ലാതാക്കാനായിരുന്നു മോദിയുടെ പദ്ധതി. എന്നാൽ നേതാക്കളെ ജയിലിലടച്ച് പാർട്ടിയെ ഇല്ലാതാക്കാമെന്ന് കരുതിയെങ്കിൽ തെറ്റി. അഴിമതിക്കെതിരെ എങ്ങനെയാണ് പോരാടേണ്ടതെന്ന് എന്ന് തന്നെ കണ്ടുപഠിക്കണം. ഇനിയും മുഖ്യമന്ത്രിമാരെ മോദി ജയിലിലിടും. കേരളാ മുഖ്യമന്ത്രി പിണറായി വിജയൻ അടക്കമുള്ളവരുടെ പേരും കെജ്രിവാൾ എടുത്തുപറഞ്ഞു

ഇനി മോദി സർക്കാർ അധികാരത്തിലെത്തില്ല. അമിത് ഷായെ പ്രധാനമന്ത്രിയാക്കാനാണ് മോദി വോട്ട് ചോദിക്കുന്നത്. എല്ലാ മുതിർന്ന ബിജെപി നേതാക്കളുടെയും ഭാവി മോദി ഇല്ലാതാക്കി. 230ൽ കൂടുതൽ സീറ്റ് ബിജെപിക്ക് കിട്ടില്ലെന്നും കെജ്രിവാൾ പറഞ്ഞു.